Pya kaka Nɛɛ Kraist biaɛfii kɔ ba naale elɛɛebahloo kɔ lɔgɔ nu ale nɛɛ a gbānasī wa taāŋabah Jɛhova. Baɛbaɛ beenyiɛ naale loo kɔ kɛ̄ a tɔɔ̄nage loo olo doolo. Jɛhova tɔgɛ nia loo o tɔɔ̄ agara. (Buū 1 Nu a bee lu edoo 28:9.) Pya amunu kɛ̄tɔɔ̄ na a dap doā-ɛp o tɔɔ̄ agara ye nɛ a, e o aabaloo doodoo wa?

1. Mɛ sīdee na pya dɔɔ̄na dap doā-ɛp i tɔɔ̄ agara nɛ Jɛhova a?

Pio nɛɛ egbī e’ɔbɛ i lɛɛ loo etaāŋabah Jɛhova. Ba mɛɛ na edoo dua piya nu ama a? Pio pya ebee dɔ aabu kaka dap kɔ esah akiiloo bɔŋanaloo Bari lokwa ba gbee i yira. Lu ekue wa pya ana yira. Gbaāloo wo, pio pya ekwɔ sīdee yigabari kɔ esah i kumaloo lo edoo kɔ pya a sii agaloo bu taāŋabah Jɛhova a aabu kaka. Nyɔɔnɛ pya gbānasī amkɛ̄, buū wa kpa, si wa dɔ intanɛt, ale si ee pya wa vidio dap doo kɔ i dɔ aaloo taāŋabah Jɛhova. Kiiloo pya a gbī e’ɔbɛ pya dɔɔ̄na lɛɛ loo etaāŋabah Jɛhova, Jizɔs bee kɔ: “Lɛraa wa baloo; ba lu pya ture zima dɛɛ̄. Lo a le nɛɛ zima dɛɛ̄ tɔgɛ dee nɛ nɛɛ zima dɛɛ̄, baɛ aba edɔ bu bana.”—Matiu 15:14.

E lo a le ziī nɛɛ i suā loo ebiaɛrafii kɔ a naale elunae nɛɛ Ekeebee Jɛhova a? A dap i kiɛ̄ gbɛnɛ sɔ̄ nɛɛ a i tɔɔ̄ waɛloo doo lo ama. Lo nɛɛ dap i su bah ekpo aā kɔ i sagɛ lo a le i doo nu a ye nia ale i doo nu a nia Jɛhova. I ɛrɛ ebiaɛfii lo etɔɔ̄ agara nɛ Bari eenyɔɔ dɛ̄dɛɛ̄ nɛɛ. (Matiu 10:37) Nyɔɔwo, i gbaɛ̄tɔ̄loo lok Jɛhova a kɔ i aa yii gbo pya a le doo wo.—Buū 1 Pya Kɔrint 5:11.

2. Pya amunu biaɛfii i doo na edap doā-ɛp i tɔɔ̄ agara nɛ Jɛhova a?

Wereloo i ɛrɛ loo Jɛhova ezū i kɔ i kpooraloo lɛɛ loo ekwɔ sīdee taāŋabah. Ii lee iye kɔ tam i yaa si, eku pya nɛɛ i le yɛɛ ale ɛrɛgeba nu i gaa doo a ɛrɛ nu edoo kiiloo ekwɔ sīdee taāŋabah. Jɛhova zuura i bahtɔ̄ kɔ: “Pya mda, luaa . . . aa bu [Babilɔn lo Gbɛnɛ].”—Mumuuna 18:2, 4.

 NƆ YERELOO

3. Nwaɛ̄dɛɛ̄ loo pya a tɔgɛ esah tɔgɛnu

Ena i doo lo i dā pɔrɔ pɔrɔ nu pya nɛɛ kɔ kumaloo bɔŋanaloo Jɛhova a? Buū Kam 14:15, lɛɛ o agara ebip ama:

• Ena anua i nwaɛ̄dɛɛ̄ sa ii le e’yiga dɛ̄dɛɛ̄ nu i dā a?

Buū 2 Jɔn 10, lɛɛ o agara pya ebip ama:

• I ɛp pya a ana yira doodoo wa?

• Kere ii nyɔɔnɛ pya a ana yira kɔnia ue sī le sī, bu mɛ sīdee na wa tɔgɛnu i dap ɛrɛ pah nyɔɔ lo i buū pya kpa, si pya wa dɔ intanɛt, ale ɛp pya wa vidio a?

• O kɛɛrɛ kɔ etɔɔ̄loo Jɛhova doodoo wa lo i gbaɛ̄tɔ̄loo pɔrɔ pɔrɔ ue egbɛa alu ekɔ ye kumaloo ale kumaloo ye bɔŋanaloo ni?

4. Kiisī lo etɔɔ̄ agara nɛ Bari sɔ̄ ziī wuga si pɔrɔ

Amunu toh na a i yii bee lo i suā kɔ ziī nɛɛ a le bu bɔŋanaloo esia gbɛnɛ pɔrɔ ani? Naa ɛp ziī daakuu a le bu Lok Bari bee nɛ pya Izrɛl a dee kere. Buū Levitikɔs 5:1.

Dookɛ̄ dɔ kpa kaɛ ama i zuurabahtɔ̄ doo, lo a le i suā kɔ ziī nɛɛ esia gbɛnɛ pɔrɔ, i kɔ nu i suā akiiloo lo pɔrɔ nɛ pya kanɛɛ. Kerewo, lɛɛ i gae doo wo, elu nu a tɔge fɛgɛ dogo lo a le i dasī ye kɔ nɛ kɔ a si loo pya kanɛɛ sa kɔ ye pɔrɔ siā wa nɛ. Lo a le a naa yiga edoo wo, i tɔgɛ i tɔɔ̄ agara nɛ Jɛhova tɛ̄maloo esi loo pya kanɛɛ sa wa kɔ nɛ. Bu mɛ sīdee na dodoo wo tɔgɛ kɔ i ɛrɛ wereloo a naa wee nyaa kumaloo . . .

• Jɛhova Bari a?

• nɛɛ a bee si pɔrɔ a?

• pya dɔɔ̄na a le bu bɔŋanaloo a?

 5. Tɔɔ̄ kee aaloo Babilɔn lo Gbɛnɛ

 TƐƐ̄NYƆƆ

Alu ebɛɛ̄ kɔ i aa suloo gbaloo pya a naa yira agara lokwa i dap kiisī lo etɔɔ̄ agara nɛ Jɛhova. Alunage ebɛɛ̄ kɔ i kpoora i loo lɛɛloo ekwɔ sīdee yigabari.

Ebip Tɛ̄ma Nyɔɔ

• Ena anua ii le e’ɛp fim pya ana yira, buū wa kpa, ale gbaɛ̄ wa tɔ̄loo bu ɛrɛgeba sīdee a?

• I sere pya nɛɛ a naa gbīna elu Pya Ekeebee Jɛhova doodoo wa?

• I dap gbaɛ̄tɔ̄loo zuurabahtɔ̄ a kɔ i teera aaloo ekwɔ sīdee yigabari doodoo wa?