Nuje di ꞌmu̱ihe desidido hingä hopäbihe ninꞌa rä kosa ninꞌa rä jäꞌi dä hñägägihe de gä pe̱päbihe rä Zi Dada Jeoba ja ngu adi. Di pädihe xä ñho ge njabu̱ gi senti ꞌnehe, ꞌne rä Zi Dada Jeoba xa di numäñho gatꞌho näꞌä gi pe̱fi pa gi johyabi rä koraso (hñeti 1 Crónicas 28:9). ¿Hanja ma dä trata rꞌa yä jäꞌi dä ꞌuegägihu̱ de rä ꞌñuu rä Zi Dada Jeoba? ¿Te dä za gä pe̱fihu̱ ora thogi njabu̱?

1. ¿Hanja ma dä trata rꞌa yä jäꞌi dä ꞌuegägihu̱ de rä ꞌñuu rä Zi Dada Jeoba?

Xa mähyoni gä pädihu̱ ge ma dä mꞌu̱pu̱ rꞌa yä jäꞌi nuꞌu̱ ma dä ne dä ꞌuegägihu̱ de rä ꞌñuu rä Zi Dada Jeoba. ¿Xi toꞌoꞌu̱? ꞌMu̱pu̱ rꞌa yä jäꞌi nuꞌu̱ bi bädi xä ñho toꞌo rä Zi Dada Jeoba, pe nuꞌu̱ bi desidi ya hindä me̱päbi, ꞌne nubye̱ yꞌobu̱ xatuäbi yä nkꞌuamba rä hnini rä Zi Dada Jeoba ꞌne nuꞌu̱ yä ꞌme̱go. ¿Por hanja pe̱fi njabu̱? Ngeꞌä nuꞌu̱ ne dä tsꞌoni näꞌä rä ntsitsꞌi di pe̱ꞌtsihu̱ ko rä Zi Dada Jeoba. Nuyu̱ yä jäꞌi tꞌembäbi yä apostata. ꞌNehe rꞌa yä jäꞌi nuꞌu̱ gu̱tꞌi rä ꞌñuu ha yä nijä, mängä yä nkꞌuamba de yä testigo rä Jeoba, pa njabu̱ toꞌo dä ne dä yꞌo̱de nuꞌu̱ yä nkꞌuamba dä ꞌuengi de rä ꞌñuu rä Zi Dada Jeoba. Hänge xi nꞌa rä däta peligro toꞌo dä ho dä ñäui nuꞌu̱ yä jäꞌi o dä hñeti nuꞌu̱ yä libro, nuꞌu̱ yä página de Internet ꞌne nuꞌu̱ yä bideo xä hyoki habu̱ pede yä nkꞌuamba de yä testigo rä Jeoba. Rä Hesu bi ꞌñenä de nuꞌu̱ yä jäꞌi: «Tsohu̱bu̱. Yä goda lider geꞌu̱ yä ꞌme̱fi. Mu̱ nꞌa rä goda lider di gu̱hni mä nꞌa rä goda, di yoho ma dä dagi ha nꞌa rä oꞌtsi» (Mateo 15:​14, TNM).

¿Te di sentihu̱ ora nꞌa rä kristianu näꞌä xa di mädihu̱ di desidi ya hindä ntestigo rä Jeoba? ¡Xa di u̱ mä mfenihu̱ ꞌne mä korasohu̱! Ngeꞌä ko näꞌä pe̱fi, di obligagihu̱ gä huahnihu̱ entre näꞌä rä amista di pe̱ꞌtsihu̱ kongeꞌä ꞌne näꞌä rä amista di pe̱ꞌtsihu̱ ko rä Zi Dada Jeoba. Hää, nuju̱ di ꞌmu̱ihu̱ desidido gä ꞌmu̱ihu̱ de rä lado rä Zi Dada Jeoba ke de rä lado nuꞌu̱ yä jäꞌi di u̱tsabi yä mhända (Mateo 10:​37). Koꞌmu̱ di mädihu̱ rä Zi Dada Jeoba, nuju̱ di o̱tehu̱ ora engägihu̱ ge hindi debe gä ntsitsꞌihu̱ ko nuꞌu̱ yä jäꞌiꞌu̱ (hñeti 1 Corintios 5:​11, TNM).

2. ¿Habu̱ ma dä nheki mu̱ xa mäjuäni gi mädi rä Zi Dada Jeoba?

Näꞌä rä mhäte di pe̱ꞌspäbihu̱ rä Zi Dada Jeoba, geꞌä ma dä maxkägihu̱ pa hinte gä nthintꞌihu̱ ko näꞌä pe̱fi yä hyate relijion. Hindi debe gä mfaxtehu̱ ha nuꞌu̱ yä grupo uni o adi yä mfatsꞌi, pe go di pertenese ha nuꞌu̱ yä hyate relijion. Nixi debe gä aseptahu̱ nꞌa rä ꞌme̱fi näꞌä di apoya yä hyate relijion. Rä Zi Dada Jeoba engägihu̱ ge di debe gä ꞌuegehu̱ de nuꞌu̱ yä hyate relijion ꞌne hinte mä ntsitsꞌi di debe gä pe̱ꞌtsihu̱ kongeꞌu̱ (Apocalipsis 18:​2, 4, TNM).

 HANJA DÄ ZA DÄ MAXꞌÄꞌI RÄ NOYA ÄJUÄ

3. Ogi tagi ha nuꞌu̱ yä trampa xä me̱gi yä hyate xahnäte

¿Te di debe gä pe̱fihu̱ mu̱ gä o̱dehu̱ toꞌo dä ñä xä ntsꞌo de rä hnini rä Zi Dada Jeoba? Hñetihu̱ Proverbios 14:​15, ꞌnepu̱ thädihu̱ nunä rä ntꞌani:

• ¿Por hanja hindi debe gä kamfrihu̱ gatꞌho näꞌä di o̱dehu̱?

Hñetihu̱ 2 Juan 10, TNM, ꞌnepu̱ thädihu̱ nuya yä ntꞌani:

• ¿Hanja di debe gä tratahu̱ nuꞌu̱ yä jäꞌi ñä en kontra de rä hnini rä Zi Dada Jeoba?

• Mäske hindi ñähu̱ directamente ko yä apostata, pe mu̱ hingä nsuhu̱, ¿po habu̱ dä za dä zo̱kägihu̱ nuꞌu̱ yä nkꞌuamba xani?

• ¿Hanja gi kamfri ge ma dä senti rä Zi Dada Jeoba mu̱ gä ho gä o̱dehu̱ o gä handihu̱ nuꞌu̱ yä nkꞌuamba mhää en kontra de rä hnini?

4. Mu̱ gi pädi ge nꞌa rä ku xä yꞌo̱tꞌe nꞌa rä pekado, mähyoni gi mää

Mu̱ di pädihu̱ ge nꞌa rä kristianu xä yꞌo̱tꞌe nꞌa rä pekado ꞌne hinte xä mää, ¿te mä obligasio di pe̱ꞌtsihu̱? Ma gä handihu̱ te dä za gä pädihu̱ de näꞌä rä Ley bi tꞌumbäbi rä hnini Israel de mäyaꞌmu̱. Hñetihu̱ Levítico 5:1.

Ja ngu dä handihu̱ ha nunä testo, mu̱ di pädihu̱ xä ñho ge nꞌa rä kristianu xä yꞌo̱tꞌe nꞌa rä pekado, pe̱ꞌtsi te gä xipäbihu̱ yä anciano de rä mhuntsꞌi. Pe änte de gä pe̱fi njabu̱, mähyoni ge ko rä tꞌekꞌei ꞌne rä ñhojäꞌi gä ñähu̱ mꞌe̱tꞌo ko näꞌä kristianu, pa gä animäbihu̱ ge go dä xipäbise̱ yä anciano näꞌä rä pekado xä yꞌo̱tꞌe. Pe mu̱ hinte dä mää, nuꞌmu̱ po näꞌä rä mhäte di pe̱ꞌspäbihu̱ rä Zi Dada Jeoba pe̱ꞌtsi te gä xipäbihu̱ yä anciano näꞌä di pädihu̱. Ora di pe̱fihu̱ njabu̱, ¿por hanja gi kamfri ge di udihu̱ rä mhäte...

• ... po rä Zi Dada Jeoba?

• ... po näꞌä kristianu toꞌo xä yꞌo̱tꞌe nꞌa rä pekado?

• ... po gatꞌho yä ku de rä mhuntsꞌi?

 5. ꞌUege de gatꞌho nuꞌu̱ yä kosa bi ehe de yä hyate relijion

 NÄꞌÄ DÄ PÄDIHU̱

Hinto di debe gä hopäbihu̱ dä ꞌuegägihu̱ de rä ꞌñuu rä Zi Dada Jeoba. Hänge hindi debe gä ntsitsꞌihu̱ ko nuꞌu̱ di rechaza rä Zi Dada Jeoba ꞌne nuꞌu̱ yä mhända. ꞌNehe mähyoni gä ꞌuegehu̱ de gatꞌho nuꞌu̱ yä kosa bi ehe de yä hyate relijion.

Pa gä benihu̱

• ¿Por hanja hindi debe gä handihu̱, nixi gä hetihu̱ o gä o̱dehu̱ näꞌä udi yä apostata?

• ¿Hanja di debe gä tratahu̱ nuꞌu̱ xä desidi ya hindä ntestigo rä Jeoba?

• ¿Te debe gä pe̱fihu̱ pa gä asegurahu̱ ge hinte mä ntsitsꞌi di pe̱ꞌtsihu̱ ko nuꞌu̱ yä hyate relijion?