True Christen wellen sikj opp kjeene Wajch loten von Jehova aufbrinjen. Secha jeit die daut krakjt soo. Jehova räakjent daut sea väl, daut du tru bliewen west (läs 1. Chronik 28:9). Waut kunn die daut schwoa moaken, am tru to bliewen? Un waut kaun die halpen?

1. Woo kjennen aundre ons proowen, von Jehova auftobrinjen?

Eenje woaren ons wellen bat doa brinjen, daut wie opphieren, Jehova to deenen. Wäa wudd soowaut doonen? Soone, waut de Woarheit veloten haben. Dee vetalen Läajes von Gott siene Organisazion, om ons vom Gloowen auftobrinjen. Dise Menschen woat Aufjefolne jenant. Uk eenje Gloowesleidasch vetalen Läajes äwa ons toom soone, waut nich väasechtich sent, bat doa brinjen, de Woarheit to veloten. Daut es jefäadlich fa ons, met dise Jäajna to räden. Dee äare Bieekja un waut dee em Internet schriewen, dee äare Websieden un dee äare Videos sent uk jefäadlich. Jesus säd von soone Menschen: “Lot dee toch. Daut sent blinje Blinjenleida! Un wan een blinja Maun een aundren blinjen leit, faulen see beid em Growen” (Matäus 15:14).

Waut, wan sikj wäa es eenich jeworden, daut dee nich mea well eent von Jehova siene Zeijen sennen? Soont kaun sea schwoa sennen, wan daut wäa es, dän wie väl räakjnen. Deejanja well ons veleicht bemotten, daut wie tweschen am un Jehova wälen. Wie motten ons gaunz eenich sennen, Gott äwa aules tru to bliewen (Matäus 10:37). Doawäajen hool wie ons aun Jehova sien Jeboot un haben nuscht met soone Menschen to doonen (läs 1. Korinta 5:11).

2. Waut kunn daut noch oppe Proow stalen, aus wie Jehova tru bliewen?

Onse Leew fa Jehova woat ons halpen, von aules wajchtobliewen, waut met faulsche Gloowes to doonen haft. Onse Oabeit ooda irjent Gruppen, wua wie ons haben loten enschriewen, ooda irjent aundre Sachen, waut wie doonen, sellen nuscht met dän faulschen Gloowen to doonen haben. Jehova sajcht to ons: “Mien Volkj, got ut ar [daut groote Babel] rut” (Openboarunk 18:2, 4).

 DOLLA UNJASTONEN

3. Pauss opp fa faulsche Lierasch

Waut sell wie doonen, wan wie waut schlajchtet äwa Jehova siene Organisazion hieren? Läst Spricha 14:15 un dan got toop dise Froag derch:

• Wuarom mott wie oppaussen, nich aules to jleewen, waut wie hieren?

Läst 2. Johanes 10 un dan got toop dise Froagen derch:

• Woo sell wie met Aufjefolne omgonen?

• Wan wie uk nich perseenlich met Aufjefolne räden, woo wudd wie doawäajen doch kjennen met dee äare Lieren to doonen kjrieen?

• Woo jleefst du, wudd Jehova sikj feelen, wan wie doano horchen wudden, wan wäa schlajcht äwa am ooda siene Organisazion rät?

4. Bliew Gott tru, wan een Brooda sindicht

Waut mott wie doonen, wan wie enwoaren, daut irjentwäa enne Vesaumlunk eene groote Sind begonen haft? See mol eenen Gruntsauz von daut Jesaz, waut Gott de Israeliten jeef. Läst 3. Mose 5:1.

Soo aus dee Varsch sajcht, mott wie de Eltestasch daut weeten loten, wan wie enwoaren, daut wäa eene groote Sind begonen haft. Oba ea wie daut doonen, wudd daut leeftolich sennen, daut wie dänjanjen säden, daut dee daut selfst sull to de Eltestasch sajen. Wan dee daut nich deit, dan woa wie Jehova tru sennen un de Eltestasch daut sajen, waut wie weeten. Woo wudd wie doaderch truhoatje Leew wiesen fa ...

• Jehova Gott?

• dänjanjen, waut jesindicht haft?

• de aundre enne Vesaumlunk?

 5. Hool die von daut groote Babel wajch

 KAPITEL TOOPJEFOT

Wan wie Jehova wellen tru sennen, mott wie nuscht met soone to doonen haben, waut am nich tru sent. Wie motten ons uk gaunz un goa von faulsche Gloowes wajchhoolen.

Waut hast du jelieet?

• Wuarom sell wie nich Sachen von de Aufjefolne läsen, kjikjen ooda horchen?

• Woo sell wie met soone omgonen, waut nich lenja wellen Jehova siene Zeijen sennen?

• Woo kjenn wie ons aun de Woarnunk hoolen, von de faulsche Gloowes wajchtoranen?