Akhrisitu chaiwo ni wotsimikiza kusabvuma kuti aliyese panango kuti chilichose chiwakangise kutumikira Yahova. Mosakaika imwepombo muchabvambo tene. Yahova achalemekeza kukhulupirika kwanu. (Lewengani 1 Mbiri 28:9.) Ko ni vochitika viponi vomwe vingayese kukhulupirika kwanu kwa iye, ndipo mungavipirire tani?

1. Ko anango angayese tani kukhulupirika kwathu kwa Yahova?

Wanthu anango adzayesese kutikangisa kutumikira Yahova. Ko ni mbani yemwe angachite vinthu vimwivi? Wanthu anango omwe adasiya chonadi achalewa vabodza vokhudza gulu yathu na chakulinga chakuti afowokese chikhulupiriro chathu. Iwo achachemerewa kuti ampatuko. Kuingizira pamwapa, azitsogoleri anango wavipembedzo achalewa mabodza yolewa va ise, na chakulinga chakuti wale omwe ankukaikira asiye chonadi. Ni ngozi ikulu maninge kwa ise kumbakambirana na wanthu mwawa wotsutsa, mwakulewenga mabukhu yawo, kuyenda m’mawebusayaiti yawo panango kunyang’anira mavidiyo yawo. Pakulewa va wale omwe achayesesa kufokesa anango kutumikira Yahova, Yesu adati: ‘Asiyeni. Iwo ni atsogoleri wa alombe. Ndipomwapa, peno munthu mulombe ankutsogolera mulombe munzake wose awiri adzagwere muchidindo.’—Mateyu 15:14.

Manje tani peno munthu yemwe tichamudziwa bwinobwino wasaina vakuti achadalini pomwe kukhala wa Mboni za Yahova? Vichakhala vowawa maninge vikakhala kuti munthu muyo niwapafupi na ise. Munthu moyu panango angatilimbikise ise kuti tisalule pakati pa iye na Yahova. Tichadekana kukhala wotsimikiza kukhala wokhulupirika kwa Mulungu kuposha munthu aliyese. (Mateyu 10:37) Ndipomwapa isepano tichabvera lamulo ya Yahova yakuti ayi kumbabverana na wanthu ninge mwawa.—Lewengani 1 Akorinto 5:11.

2. Ko ni vosalula viponi vomwe aliyese angachite vomwe nthawe zinango vingayese kukhulupirika kwathu kwa Yahova?

Chikondi chathu kwa Yahova chidzatithandize kuti timbapewe kumbabverana na wanthu omwe ali muchipembedzo chabodza. Gulu yomwe tili panango basa yomwe tichaphata ichadikanalini kukhala yobverana na chipembedzo chabodza. Yahova achatichenjeza kuti: ‘Bulani mwa iye [Babulo nkulu], wanthu wangu.’—Chivumbulutso 18:2, 4.

 PFUNZIRANI VIZINJI

3. Khalani tcheru na vipfunziso va bodza

Ko tichadekana kuchita chani tikabva vinthu vosalimbikisa volewa va Mboni za Yahova? Lewengani Miyambo 14:15, ndipo patsogolo pake kambiranani mbvunzo uyu:

• Ndawa chani tichadekana kukhala wosamala maninge kuti tileke kumbakhulupirira vilivose vomwe tabva?

Lewengani 2 Yohane 10, ndipo patsogolo pake kambiranani mibvunzo aya:

• Ko tichadekana kuchitatani vinthu na wanthu wa mpatuko?

• Olo kuti tinkuchezanawolini maso na maso wanthu wa mpatuko, ko ni mwanjira yanyi yomwe tingagumanirane nawo muvipfunziso vawo?

• Ko munkuganiza kuti Yahova achabva tani tikakhala kuti isepano tinkuikhira nzeru ku mawu yawo yosalimbikisa yolewa iye pabodzi na gulu yake?

4. Pitirizani kukhala wokhulupirika kwa Mulungu m’bale akachimwa

Tikadziwa vakuti munthu munango mu mpingu wachita chimo ikulu, tichadekana kuchitatani? Onani mpfundo zochokera m’Mawu ya Mulungu kwa Aizirayeli. Lewengani Levitiko 5:1.

Ninge mwavafotokozerewa mu vesi mweyi, tikadziwa kuti munthu munango wachita chimo ikulu, tichadekana kuwuza akulu vomwe tinkudziwa. Koma tikanati tachita vimwivi, mokoma moyo tichadekana kulimbikisa wochimwa ule kuti akafotokoze yekha va chimo yake kwa akulu. Koma iye akaleka kuchita vimwivi, kukhulupirika kwathu kwa Yahova kuchadekana kutilimbikisa kuti tiyende tikawauze akulu vomwe tinkudziwa. Ko vochita ninge vimwivi vichawonesa tani kukhulupirika kwathu kwa . . .

• Yahova Mulungu?

• munthu yemwe wachita chimo?

• anango mu mpingu?

 5. Khalani kutali na Babulo nkulu

 CHIGWATO

Kuti tipitirize kukhala wokhulupirika kwa Yahova, tichadekana kupewa kubverana kulikose na wale omwe niwosakhulupirika. Tichadekana pomwe kuchoka kuvipembedzo vabodza.

Kubwerezera

• Ndawa chani tichadekanalini kunyang’anira, kubvesera panango kulewenga maganizo ya wanthu wa mpatuko?

• Ko tichadekana kukhala tani na wanthu wale omwe achadalini kukhala wa Mboni za Yahova?

• Ko tingabvere tani chenjezo yakuti bulani mu vipembedzo va bodza?