Kristian mehlel kan kin koasoanehdi teng ren dehr mweidohng mehkot de mehmen en kauhiraildihsang kaudokiong Siohwa. Se ese me komw kin ahneki soangen pepehm wet. Siohwa ketin kesempwalki omw loalopwoat. (Wadek 1 Kronikel 28:9.) Soahng dah kan me kak kasonge omw loalopwoatohng ih, oh dahme kak seweseiuk?

1. Ia duwen ekei aramas ar pahn kasonge atail loalopwoatohng Siohwa?

Ekei aramas pahn song kauhkitaildihsang papah Siohwa. Ihs me pahn kak wia met? Ekei me kesehla oh uhwongada kaudok mehlel kin kinehda likamw duwen sapwellimen Koht pwihn pwehn kauwehla atail pwoson. Oh pil, ekei kaunen pelien lamalam kan kin koasoia soahng likamw kan duwen kitail pwehn kahrehiong irail kan me sohte kanahieng ren sohla papah Siohwa. E keper kitail en akamaiong me uhwong kan, wadek neirail pwuhk de blog kan, kohla nan neirail website kan de kilang neirail kasdo kan. Sises mahsanih duwen irail akan me kin song kauhdi meteikan sang ar kin loalopwoat papah Siohwa: “Kumwail pohnsehsehla irail. Sounkaweid maskun kei irail. Eri ma me maskun men kin kahre me maskun men, ira koaros pahn pwupwudiong nan pwoahr.”​—Madiu 15:14.

Ia duwen ma aramas emen me kitail ese pilada en sohla wia emen Sounkadehdehn Siohwa? Met uhdahn pahn kansensuwed ma aramaso karanih kitail. Mweinele aramaso pahn idingkihong kitail en pilada ih de Siohwa. Kitail anahne koasoanehdi teng en loalopwoatohngete Koht mwohn mehkoaros. (Madiu 10:37) Eri kitail peikiong sapwellimen Siohwa kehkehlik en dehr patehng soangen aramas pwukat.​—Wadek 1 Korint 5:11.

2. Ia duwen atail pilipil kan eh kin kasalehda ma kitail kin loalopwoatohng Siohwa?

Atail poakohng Siohwa pahn kamwakid kitail en soikala soahng koaros me pidada pelien lamalam likamw. Atail doadoahk de pwihn me kitail kin iang de soahng kan me kitail kin wia sohte pahn pidada pelien lamalam likamw. Siohwa ketin mahsanihong kitail: “Pedoisang [Papilon Lapalap], nei aramas akan.”​—Kaudiahl 18:2, 4.

 KALAUDEHLA OMW ESE MET

3. Kanahieng sounpadahk likamw kan

Dahme kitail pahn wia ma kitail rong soahng suwed kan duwen sapwellimen Siohwa pwihn? Wadek Lepin Padahk 14:15, oh mwuri koasoiapene peidek wet:

• Dahme kahrehda kitail en kanahieng en dehr uhdahte kamehlele soahng koaros me kitail rong?

Wadek 2 Sohn 10, oh mwuri koasoiapene peidek pwukat:

• Dahme kitail sohte pahn wia ong irail akan me kesehla oh uhwongada kaudok mehlel?

• Mehnda ma kitail sohte kin koasoiong soangen aramas pwukat, ia duwen atail kakete rong arail padahk kan?

• Ia omw madamadau, ia pahn sapwellimen Siohwa pepehm ma kitail rong soahng suwed kan duwen ih de sapwellime pwihn?

4. Loalopwoatohngete Koht ni riomw Kristian men eh wiahda dihp

Ma kitail esehda me emen nan mwomwohdiso wiahda dihp laud ehu, dahme kitail pwukoahki wia? Tehk dahme kitail kak sukuhlkihsang Kosonned en Koht ong mehn Israel en mahs ko. Wadek Lipai 5:1.

Nin duwen me kileldi nan iretikitik wet, ma kitail esehda me aramas emen wiahda dihp laud ehu, kitail anahne ndaiong elder kan dahme kitail ese. Ahpw, mwohn atail wia met, e pahn wia elen kadek en kangoange aramaso en pein kohla rehn elder kan oh wehkada dipeo. Ma e sohte wia met, atail loalopwoatohng Siohwa pahn kamwakid kitail en ndaiong elder kan dahme kitail ese. Dahme kahrehda soangen mwekid wet wia kasalepen limpoak loalopwoat ong . . .

• Siohwa Koht?

• aramas me wiahda dihpo?

• meteikan nan mwomwohdiso?

 5. Keisang Papilon Lapalap

 DAHME KE SUKUHLKIER

Pwe kitail en loalopwoatohngete Siohwa, kitail anahne dehr patehng irail akan me soaloalopwoatohng ih. Kitail pil anahne katohreikitailsang douluhl pelien lamalam likamw.

Kousapahl

• Dahme kahrehda kitail en dehr kilang, wadek de rong soahng kan me irail me kesehla oh uhwongada kaudok mehlel kin koasoia?

• Dahme kitail sohte pahn wia ong irail akan me sohla men wia Sounkadehdehn Siohwa?

• Ia duwen atail kak peikiong kehkehlik en tangasang pelien lamalam likamw?