Jehoväpa sirweqninkunaqa manam permitiyätsu ni imapis Jehoväta sirwiyänäta michäyämänanta. Segürum këkäyä qampis Teytantsik Jehoväta mana dejëpa sirwinëkipaq kaqta, y tsëtaqa Jehovä alläpam valoran (leyi 1 Crönicas 28:9). Peru ¿imakunatan Jehoväta sirwinata michämashwan? Y ¿imatataq rurashwan sirwir sïguinapaq?

1 KAQ: Jehoväta sirwinata michämarnintsik, ¿imatataq wakinkuna rurayanman?

Wakin nunakunaqa Jehoväta sirwita dejanatam munayan. ¿Pikunatan tsëtaqa munayan? Wakinqa kayan Jehoväpa contran churakashqakunam. Pëkunaqa Jehoväpa testïgunmi kayarqan, peru kananqa Jehoväpa contranmi churakäyashqa, tsëmi mana rasumpa kaqta parlayan. Tsënöllam, mana alli religionkunachö mandakoqkunapis Jehoväpa testïgunkunapaq ulikur o llullakur nunakunata mana kaqta creitsiyan. Tsëmi pëkunawanqa parlanantsiktsu, librunkunata leyinantsiktsu ni Internetchö churayämunqankunata rikänantsiktsu. Jehoväpa contran churakashqakunapaq parlarmi Jesus kënö nirqan: “Ama pëkunata cäsuyëtsu, pëkunaqa wisku pushakoqkunam kayan. Juk wisku o qapra, wisku mayinta pushaptinqa, ishkanmi jatun uchkuman jeqarkuyanqa” (Mateu 15:14).

Peru juk familiantsik o amïguntsik Jehoväpa testïgun këta manana munaptinqa, ¿imaraq pasanman? Capazchi pëkunaqa kënö nimäshun: “¿Pitataq mas kuyanki, Jehovätaku o noqataku?”. Tsënö pasaptinqa, Jehoväta sirwiqa manachi fäciltsu kanman. Peru Teytantsik Jehoväta sirwitaqa ama dejashuntsu (Mateu 10:37). Pëkunawan mana juntakunapaq y mana parlapänapaq Jehovä mandamanqantsiktam imëpis cäsukunantsik (leyi 1 Corintius 5:11).

2 KAQ: ¿Imakunapitataq cuidakunantsik Jehoväta mana dejanapaq?

Teytantsik Jehoväta kuyarmi mana alli religionkunamanqa mëtikuntsiktsu. Tsëmi cuidakunantsik trabäjuntsikchö o imata ruranqantsikchöpis mana alli religionkuna rurayanqankunaman mana mëtikunapaq. Sirweqninkunata Teytantsik Jehovä kënö ninqantam cäsukunantsik: “Tsëpita yarqukuriyë kuyë sirwimaqnïkuna”. Awmi, mana alli religionkunapitaqa yarqukunantsikmi (Apocalipsis 18:2, 4).

 MASLLA YACHAKUSHUN

3 KAQ: Mana rasumpa kaqta yachatsikoqkunapita cuidakuy

Jehoväpa sirweqninkunapaq mana allita o mana rasumpa kaqta parlayaptinqa, ¿imataraq rurashwan? Leyiyë Proverbius 14:15 ima ninqanta y këpaq parlayë:

• ¿Imanirtan pipis imatapis nimanqantsikta creikurkunantsikpa rantin alliraq pensanantsik?

Leyiyë 2 Juan 10 ima ninqanta y këkunapaq parlayë:

• Kë versïculuchöqa, ¿ima nimantsiktaq Diospa contran churakashqakunapaq?

• Diospa contran churakashqakunawan mana parlarpis, ¿imanirtan librunkunata o Internetchö churayanqankunata rikänantsiktsu ni leyinantsiktsu?

• ¿Imanöraq Jehovä sientikunman pëpaq o sirweqninkunapaq mana allita parlaqkunawan parlashqa?

4 KAQ: Pipis jutsata rurashqa kanqanta musyarqa willakunantsikmi

Juk wawqi o juk pani jutsata rurashqa kanqanta musyarqa, ¿imatataq ruranantsik? Moises qellqanqan Leychömi nimantsik imata ruranapaq kaqta. Leyiyë Levïticu 5:1 ima ninqanta.

Kë versïculuchö ninqannöpis, pipis jutsallakushqa kanqanta musyarqa anciänukunatam willanantsik. Peru puntataqa, tsë wawqita o panitam ninantsik jutsata rurashqa kanqanta anciänukunata willanampaq. Mana willaptinqa, noqantsikmi anciänukunata willanantsik. Levïticu 5:1 ninqanta cäsukunqantsikqa, ¿imanötan rikätsikun...

• ... Jehoväta kuyanqantsikta?

• ... jutsata ruraqta kuyanqantsikta?

• ... congregacionchö wawqi panikunata kuyanqantsikta?

 5 KAQ: Mana alli religionkunamanqa ama mëtikuytsu

 KËTAM YACHAKURQUNKI

Jehoväta mana dejëpa sirwinapaqqa pëpa contran churakashqakunapitam cuidakunantsik y mana alli religionpitam chipyëpa yarqukunantsik.

¿Yarpankiku?

• ¿Imanirtan Jehoväpa contran churakashqakuna rurayämunqankunata leyinantsiktsu ni rikänantsiktsu?

• ¿Imatataq rurashwan pipis Jehoväpa testïgun këta dejaptin?

• ¿Imatataq ruranantsik mana alli religionpita chipyëpa yarqukunapaq?