Rasunpa cristianucunaca decidiśhan cayanchic manam mayanpis ni imapis impidimäśhunchu Jehovata adorananchicpä. Ampis chaynü caytaćh munanqui, Jehová allictam valoran lluy śhun’unninchicwan serviptinchic (liguicuy 1 Crónicas 28:9). ¿Imacunam Diospi calupächiśhunquiman? ¿Imanuypam chaycunacta vencichwan?

1. ¿Mayancunam ñatac imanuypam Diospi calupächita munamanchic?

Waquin nunacuna manam munanchu Diosta servinanchicta. Waquincunañatacmi Jehovapi laquicaculcul yan’almi limapäcun Diospa malcanpi. Cay nunacunatam ninchic Diosta-contracücuna o apostatacuna. Cantacmi pantaśha religioncunapä lidernincuna ya’anchiccunapi yan’alpi limapäcun chayman creilcul calupänanchicpä. Manam nunca limananchicchu Diospa enemiguncunawan, nï libruncunacta liguinanchicchu, nï internetman ćhulaśhancunacta, nï videuncunacta manam licananchicchu. Jesús chay nunacunatam nila: “Apla-pula puśhaycaćhanacücänümi cayalcan. Chaymi cuscan ima ućhcumanpis palpapäcun’a” (Mateo 15:14).

¿Imactam lulananchic familianchic o amistäninchic manaña testigo cayta munaptin? Chay pasamaptinchic śhun’unchicpis nanamanchicmi. Chaynü captin manam imanaytapis atipaśhunchu. Mayanpis quiquillan Jehovata caćhayculuptin, ya’anchic jinallam śhun’unchicpi serviśhun Jehovata (Mateo 10:37) Jehovatam cäsucunanchic payta caćhaycücunawan amañam jucllachacuśhunchu (liguicuy 1 Corintios 5:11).

2. ¿Ima decisiontam lulananchic Jehovata lluy śhun’unchicwan servinanchicpä?

Jehovata cuyalmi, pantaśha religioncunapa ima lulaynincunapipis aśhucunanchic. Pantaśha religioncunapä manam trabajaśhunchu, nï ima lulaynincunactapis apoyaśhunchu. Jehovami nimanchic: Jatun Babiloniapi “waraylla yalapämuy” (Apocalipsis 18:2, 4).

 MASTA YAĆHAYCUŚHUN

3. Pantaśha yaćhachicücunapi aśhuculcay

Jehovapi yan’al nunacuna limapäcuptin ñatac testiguncunapi, ¿creinanchicchun chayta? Liguiśhun Proverbios 14:15 ñatac limaśhun caypi:

• ¿Imapïmi mana creinanchicchu yan’al limacunaman?

Liguiśhun 2 Juan 10 ñatac limaśhun caypi:

• ¿Imapïmi mana limananchicchu apostatacunawan?

• Masqui apostatacunawan mana limalpis; pero, ¿imapïmi escribiśhancunacta o lulaśhancunacta mana licananchicchu, nï uyalinanchicchu?

• Apostatacunaca yan’al limaśhanta uyaliptinchic, ¿imanuymi Jehová sienten?

4. Mayannin hermanunchicpa juchantapis manam pacananchicchu

¿Imactam lulananchic juc hermanunchic jucha lulaśhanta yaćhalul? Jehová Israel malcanman juc mandatucta uśhanmi yanapamäśhun. Liguiśhun Levítico 5:1.

Cay textućhu nishannü, juc hermanunchic juchacta lulaśhanta yaćhalul, willananchicmi punta-li-yaśhacunaman. Pero manaläpis chayta lulal, puntacta limananchic quiquin hermanuwanmi jucha lulaśhanta willananpä, chaynüpam cuyaśhanchicta licachiśhun. Pero mana juchanpi willaptin, Jehovata cuyaśhanchicpïmi, ya’anchic willananchic punta-lï-yaśhacunata.

• ¿Imanuypam chayta lulaśhanchicwan Jehovata cuyaśhanchicta licachiśhun?

• ¿Imanuypam chayta lulaśhanchicwan juchapacü hermanunchicta cuyaśhanchicta licachiśhun?

• ¿Imanuypam chayta lulaśhanchicwan lluy hermanunchiccunacta cuyaśhanchicta licachiśhun?

 5. Aśhucunanchicmi Jatun Babiloniapi

 IMACTAM YAĆHALUNCHIC

Jehovaman leal cayta munal’a, manam jucllachacunanchicchu apostatacunawan. Ñatac aśhucunanchicmi pantaśha religioncunapi.

Yalpaśhun

• ¿Imapïmi mana licananchicchu, nï liguinanchicchu, nï uyalinanchicchu apostatacunaca nishanta?

• ¿Imapïmi manaña limananchicchu Jehovapi aśhucuśhacunawan?

• ¿Imactam lulananchic aśhucunanchicpä lluy pantaśha religioncunapi?