Kare te au Kerititiano mou e akatika ana i tetai ua atu apinga me kore tangata kia tamanata i ta ratou akamorianga kia Iehova. Papu te manako akapera ra koe. Akaperepere a Iehova i toou tu tiratiratu. (E tatau ia 1 Paraleipomeno 28:9.) Eaa te au turanga te ka timata i toou tu tiratiratu kiaia, e eaa taau ka rave me tupu te reira?

1. Akapeea tetai pae me timata i to tatou tu tiratiratu kia Iehova?

Ka tauta tetai aronga i te tāpū ia tatou kia kore e tavini ia Iehova. Koai mā ratou? E aronga teia tei akaruke i te tuatua mou e kua tuatua pikikaa no runga i ta te Atua akaaerenga e kia takore i to tatou akarongo. Kapikiia ratou ko te au apoteiti, e aronga teia tei akaruke i te akarongo. Te akatotoa ra te au arataki akonoanga i te au pikikaa no runga ia tatou kia akakeu i te aronga mārama kore kia akaruke i te tuatua mou. E kino kia taumāro ki teia aronga patoi, te tatau i ta ratou puka e te au blog, te aere ki runga i ta ratou website, e te akara i ta ratou au vitio. Karanga a Iesu no te aronga tei tāpu i tetai pae kia kore e tavini tiratiratu ia Iehova: “E vaoo ua atu; e matapo arataki matapo ïa. E kia arataki te matapo i te matapo, e topa kapipiti ïa ki roto i te vaarua.”​—Mataio 15:14.

Akapeea me kua kite tatou i tetai kare e inangaro kia riro akaou ei Au Kite no Iehova? Ka tupu rai te mamae ngakau. Penei ka māro mai te reira tangata kia iki tatou i rotopu iaia e Iehova. Ka vai tiratiratu tatou kia Iehova noatu eaa te tu. (Mataio 10:37) Ka akarongo tatou ki ta Iehova akaueanga auraka e piri atu ki teia aronga.​—E tatau ia 1 Korinetia 5:11.

2. Eaa te au ikianga te ka timata i toou tiratiratu kia Iehova?

Me akaperepere tatou ia Iehova ka kopae tatou i tetai ua atu angaanga akonoanga pikikaa. Kare katoa tatou e o atu ki te ngai angaanga e te au akaaereanga e tetai ua atu angaanga te o maira te akonoanga pikikaa. Akamatakite maira a Iehova: “Ka aere ke mai ana kotou ki vao [ia Babulonia Maata], e aku au tangata.​—Apokalupo 18:2, 4.

 KIMI OONU

3. Kia matakite i te au puapii pikikaa

Eaa ta tatou ka rave me rongo tatou i te au mea tau kore tei akakiteia no runga i ta Iehova akaaerenga? E tatau ia Maseli 14:15, e oti uriuri i teia uianga:

• Eaa tatou ka matakite ei auraka e irinaki ua i ta tatou ka akarongo?

E tatau ia 2 Ioane 10, e oti uriuri i teia au uianga:

• Eaa ta tatou ka rave ki te au apoteiti?

• Noatu kare tatou e piri atu ki te au apoteiti, akapeea tatou te rongo anga i ta ratou apiianga?

• Eaa toou manako i to Iehova manako me akarongo tatou ki te au tuatua tau kore no runga iaia e tana akaaerenga?

4. Kia vai tiratiratu ki te Atua me rave tetai taeake i te ara

Me kua kite tatou i tetai i roto i te putuputuanga tei rave i te ara kino, eaa ta tatou ka rave? Akamanako i teia kaveinga i roto i ta te Atua Ture ki to Iseraela taito. E tatau ia Levitiku 5:1.

Mei tei taikuia i tera irava, me kite tatou e kua rave tetai i te ara kino, ka akakite tatou ki te aronga pakari. Inara, i mua ake ka rave ei i te reira, ka akamaroiroi tatou iaia kia aere ki te aronga pakari kia aaki i tana ara. Me kare aia e aere, ka akakite tatou ki te aronga pakari kia tiratiratu kia Iehova. Akapeea teia te akaari anga i te aroa tiratiratu no . . .

• te Atua ko Iehova?

• te tangata tei ara?

• te putuputuanga?

 5. Akaatea mai ki vao ia Babulonia Maata

 APIIANGA

Kia vai tiratiratu kia Iehova, auraka tatou e piri atu ki te aronga tiratiratu kore. Ka akaatea mai tatou ki vao i te akonoanga pikikaa.

Uriurianga

• Eaa tatou ka kore ei e akara, tatau, e te akarongo i te au manako o te au apoteiti?

• Akapeea tatou me ariu atu ki te aronga kare e inangaro kia riro akaou ei Kite no Iehova?

• Akapeea tatou me aru i te akamatakiteanga kia akaatea mai ki vao i te akonoanga pikikaa?