Paťas, hoj fest rado dikhes le Jehovas. Na des tut ňikaha aňi ňisoha lestar te odcirdel. Predal o Jehovas hin igen baro, hoj leske kames pro furt te ačhel verno. (Pregen 1. Kroník 28:9) Kana šaj el tuke phares te ačhel verno le Jehovaske? So tuke pomožinela te na vzdel pes?

1) Sar tut šaj odcirden averdžene le Jehovastar?

Šunďal imar pal o odpadlika? On hine sar sapa. Kamen andre tute te mukhel o jedos. Ajso jedos, kaj te preačhes te služinel le Jehovaske. Sar oda keren? Thoven pro internetos članki the videji. Odoj čhiven mel pro Jehovas the pre leskeri organizacija. Vaš oda lengere članki the videji na dikhas. Na pisinas kije oda komentara. Te peske vareko na del te phenel a paťal savoreske, so genel the dikhel, odľidžan les le čačipnastar. The o rašaja the pastora previsaren čačipen pal e Jehovaskeri organizacija. O Ježiš amenge phenďa pal o odpadlika, rašaja the pastora, so keren sa, kaj te na služinas le Jehovaske: „Mukhen len avke! On korkore hine kore u kamen te ľidžan [avre koren]. U te o koro ľidžala le kores, sodujdžene perna andre chev.“ (Matúš 15:14 NZ)

Kana šaj el mek phares te ačhel verna le Jehovaske? Te vareko, kas igen rado dikhas, imar preačhiľa te el le Jehovaskero svedkos. Akor amenge džal te pukinel o jilo. A nekgoreder hin, te amenge phenel: „Kide tuke avri, me abo o Jehovas.“ Dukhal amen o jilo, aľe sikavas, hoj andre amaro dživipen nane ňiko bareder sar o Jehovas. (Matúš 10:37) Šunas le Jehovas a ajsenca, so les omukhle, pes na arakhas aňi lenca na vičinas, na pisinas. (Pregen 1. Korinťanom 5:11)

2) Mek andre soste šaj sikavas, hoj sam verna le Jehovaske?

Amen igen rado dikhas le Jehovas. Vaš oda amen na chal ňič le falošnone vjerenca. Aňi predal lende na keras ňisavi buťi. A te bi uľahas mek vareso, soha sam spojimen le falošnone vjerenca, o Jehovas amenge phenel: „Džan odarig het [le Bare Babilonostar], mire manušale.“ (Zjavenie 18:2, 4)

 DODŽAN TUT BUTER

3) De pozoris pre ola, so previsaren o čačipen

Varekana šaj šunas nalačhe hiri pal e Jehovaskeri organizacija. So akor? Pregen Príslovia 14:15 a paľis vakeren jekhetane:

• Soske našťi paťas savoreske, so šunas?

Pregen 2. Jána 10 a paľis vakeren jekhetane:

• Save mušinas te el pro odpadlika?

• Amen le odpadlikenca na vakeras. Aľe prekal soste pes ke amende the avka šaj dochuden?

• So phenes, sar ela le Jehovaske, te bi furt dikhahas nalačhe hiri pal leste the pal leskeri organizacija?

4) Ačh verno le Jehovaske buter sar le manušeske

So musaj te keras, te dikhľam, hoj vareko andal o zboros kerďa baro binos? Le Mojžišoskero zakonos amenge sikavel, so kampel te kerel. Pregen 3. Mojžišova 5:1.

Pal ala lava, mušinas te phenel le zborove phurederenge, so pes ačhiľa. Aľe peršo džas pal koda manuš, so kerďa binos. Phenaha leske, hoj hin les vajkeci ďivesa te džal pal o zborova phuredera. Mi phenel lenge, so kerďa. Te oda na kerela, džas pal lende amen, bo sam verna le Jehovaske. Sar oleha sikavas, hoj rado dikhas...

• le Jehovas?

• kole manušes, so kerďa binos?

• le phralen the le pheňen andro zboros?

 5) Amen na chal ňič le Bare Babilonoha

 SO SIKHĽIĽAM

Olenca, so omukhle le Jehovas, aňi le odpadlikenca na vakeras, na vičinas, na pisinas. Avka sikavas, hoj sam verna le Jehovaske. A tiš mušinas te sikavel, hoj amen ňič na chal la falošnona vjeraha.

So bi phenehas

• Soske našťi genas, dikhas aňi šunas, so vakeren odpadlika?

• Save mušinas te el kije ola, so imar preačhile te el le Jehovaskere svedki?

• Sar sikavas, hoj amen na chal ňič la falošnona vjeraha?