Сар чачутне христијања решиме сием те на дозволина ништо хем никој те чхинавел амен те служина е Јеховаске. Сигурно ту да мислинеа аѓаар. О Јехова бут ценинела со сиан леске верно. (Читин 1. Летописи 28:9.) Кола ситуацие шај те чхивен ко испит тли верност спрема лесте хем со шај те поможинел туке тегани?

1. Сар шај о јавера те керен аменге пхаро те ачхова верна е Јеховаске?

Несаве мануша мангена те чхинавен амен те служина е Јеховаске. Кој тане адала мануша? На пример, шај те овен о отпадникија — мануша кола со чхинавѓе те служинен е Јеховаске хем акана вакерена ховајба баши лескири организација, адалеске со мангена те уништинен амари вера. Исто аѓаар, несаве религиозна водачија ширинена ховајба баши аменде. Ако на пазинаја шај те пера ки замка те верујна ки ленде хем те мукха о чачипе. Адалеске, опасно тано те кера лафи акале противниконцар, те читина ленгере лила, те читина адава со чхивена ко интернет или те дикха ленгере видеоклипија. Најшукар тано те шуна е Исусескере лафија: „Мукхен лен. Ола тане короле водачија. А кеда короло ка водинел короле, о солдуј ка перен ки дупка“ (Матеј 15:14).

Со ако некој кас со џанаја одлучинѓа те на овел више е Јеховаскоро сведоко? Шај бут те дукхавел амен ако некој касаја со сием паше керела адава. Адаја личност шај ка чхивел амен те бирина машкар лате хем о Јехова. Ки асавки ситуација најважно таро са ваљани те овел аменге те ачхова верна е Девлеске (Матеј 10:37). Адалеске сием послушна ки е Јеховаскири заповед те на дружина амен асавке манушенцар. (Читин 1. Коринќаните 5:11.)

2. Сар шај амаре одлуке те сикавен кај сием верна е Јеховаске?

О мангипе спрема о Јехова ка поттикнинел амен те цида амен таро са сој тано поврзимо е ховавне религијаја. Адалеске, кеда ваљани те ана одлуке башо адава сави бути ка кера или дали те ова дело тари несави организација, мора те пазина ола те на овен поврзиме е ховавне религијаја. Амен мангаја те цида амен таро са со шај те поврзинел амен е ховавне религијаја. О Јехова поттикнинела амен: „Икљовен [таро Баро Вавилон], мло народо“ (Откровение 18:2, 4).

 ДОЗНАЈН ПОВИШЕ

3. Аракх тут таро окола со ширинена ховајба

Со ваљани те кера ако шунаја негативна информацие баши е Јеховаскири организација? Читин Изреки 14:15, а пало адава керен лафи башо акава пучибе:

• Соске на ваљани те верујна ко са со шунаја?

Читин 2. Јованово 10, а пало адава керен лафи башо акала пучиба:

• Сар ваљани те понашина амен спрема о отпадникија?

• Сар шај те мукха о отпадникија те влијајнен упри аменде иако нане амен директно контакт ленцар?

• Со мислинеа, сар би осетинела пе о Јехова ако мангаја те шуна негативна информацие баши лесте или баши лескири организација?

4. Ачхов верно е Девлеске кеда некој таро собрание грешинела

Со сием должна те кера ако дознајнаја кај некој таро собрание керѓа сериозно грево? Те дикха јекх начело таро Закони со денѓа ле о Девел е Израелцонге. Читин 3. Мојсеева 5:1.

Спрема акава начело, ако дознајнаја кај некој керѓа сериозно грево ваљани адава те вакера е старешиненге. Сепак, англедер те кера адава, љубезно тано те поттикнина е грешнико ов те џал ко старешине хем те признајнел пло грево. Ако на керела адава, тегани амари верност спрема о Јехова ка поттикнинел амен те вакера е старешиненге адава со џанаја. Сар адалеа со ка кера адава ка сикава верно мангипе...

• е Јеховаске?

• е грешникоске?

• е јаверенге ко собрание?

 5. Циде тут таро Баро Вавилон

 СО СИКЛИЛЕМ

Те шај те ачхова верна е Јеховаске, на смејнаја те дружина амен околенцар со нане леске верна. Исто аѓаар, ваљани те цида амен таро са сој поврзимо е ховавне религијаја.

Сар ка одговорине?

• Соске на ваљани те дикха, те читина или те шуна адава со сикавена о отпадникија?

• Сар ваљани те понашина амен спрема окола со на мангена више те овен е Јеховаскере сведокија?

• Сар шај те сикава кај на мангаја те ова дело тари ховавни религија?