58 УРОКИ
Ачшов верно е Йеховаске
О истинска християня на манген те мукен нищо тай никхой те аравел ленгоро амалипе е Йеховаса. Сигурно ту-да на мангес те аравес то амалипе леса. О Йехова бут ценинел, кай синян леске верно. (Четине 1 Летописи 28:9.) Саве букиенде ащи те овел туке пхаро те ачшовес верно е Йеховаске тай со ащи те помагинел туке?
1. Со ащи те керен десаве мануша, за те траден амен те иринас думо е Йеховаске?
Десаве мануша ка манген те спиринен амен те служинас е Йеховаске. Кола си он? Калка мануша спиринде те служинен е Йеховаске тай хоратинен хохавне букя лескере организацияке, соскето манген те спиринас те верувинас лесте. Ленге пхенас отстъпникя. Десаве пасторя тай поповя също шунярен хохавне букя за аменге, соскето манген те траден калкен, колато си наивна, те спиринен те служинен е Йеховаске. Опасно си те споринас калке манушенца, те четинас ленгере лила тай те дикхас о букя, колато чшиен ко интернети. О Исусес пхенгяс за е манушенге, колато манген те спиринен амен те служинас е Йеховаске: „Мукен лен. Он си коре водачя. А ако йекх коро водинел авере корес, о дуй-да ка перен десаве хевяте.“ (Матей 15:14)
Со те керас, ако декхой амаре семействостар или амаре амалендар на мангел вече те овел е Йеховаскоро Свидетели? Ащи те овел аменге бут пхаро. Кавка мануш ащи даже те традел амен те избиринас или лес, или е Йеховас. Со-да те ачшол, аме требе те ачшовас верна е Девлеске тай те сикавас, кай амаре животосте нанай никхой по-важно лестар. (Матей 10:37) Аке соске на кидас амен салке манушенца тай на хоратинас ленца, сарто пхенел аменге о Йехова. (Четине 1 Коринтяни 5:11.)
2. Сар ащи о решения, колато лас, те сикавен дали синям верна е Йеховаске?
Аме дехас е Йеховас, аке соске мангас те овас дуре таро хохавне религиес. На мангас те овел амен нищо общо ленца тай на мангас те подкрепинас лен нито амаре букяса, нито авере букиенца, колато керас. О Йехова пхенел аменге: „Икльовен [таро Баро Вавилон].“ (Откровение 18:2, 4)
РОДЕ ПО-ХОРЕСТЕ
Ахальов сар те на мукес нищо тай никхой те аравел то амалипе е Йеховаса тай дикх сар те сикавес, кай синян леске верно, като икльовес таро Баро Вавилон.
3. Пазине тут манушендар, колато сикавен хохавне букя
Со требе те керас, ако шунас кханиле букя е Йеховаскере организацияке? Четинен Притчи 14:15 тай хоратинен калке въпросиеске:
-
Соске на требе те верувинас всичконасте со шунас?
Четинен 2 Йоан 10 тай хоратинен калке въпросиенге:
-
Сар требе те икерас амен е отстъпникиенца?
-
Даже ако на хоратинас лично е отстъпникиенца, сар ащи о хохавне букя, колато сикавен он, те ден амаре гогяте?
-
Сар мислинес, кай ка чувствинел пес о Йехова, ако шунас о кханиле букя, колато хоратинен о отстъпникя за леске тай лескере организацияке?
4. Ачшов верно е Йеховаске, кана декхой таро сбори керел безех
Со требе те керас, ако ахальовас, кай декхой таро сбори кергяс баро безех? Дикх со пхенел о закони, ковато о Дел диняс е израилтяниен. Четинен Левит 5:1.
Кавка стихи сикавел аменге, кай ако ахальовас, кай декхой кергяс баро безех, требе те пхенас е старейшиниенге. Ама първо требе те пхенас е манушеске, ковато кергяс безех, кай си шукар ов коркоро те жал те хоратинел е старейшиниенца. Ако ов на хоратинел ленца, аме ка пхенас ленге о букя, колато ахалилям, соскето мангас те ачшовас верна е Йеховаске. Сар, като керас калка букя, сикавас, кай наистина дехас...
-
е Йеховас?
-
е манушес, ковато кергяс безех?
-
околе пхрален тай пхениен таро сбори?
Ако те пхралеске требел помощ, ма пханде те якха!
5. Пазине тут таро Баро Вавилон
Четинен Лука 4:8 тай Откровение 18:4, 5. После отговорине калке въпросиенге:
-
Дали още синьом запишиме десаве хохавне кхангеряте? a
-
Дали синьом десаве организацияте, която си йекхе хохавне религиятар?
-
Дали мере букяса помагинав хохавне религияке?
-
Иси ли авер букя мере животосте, колато требе те мукав, соскето си таро хохавне религиес?
-
Ако десаве калке въпросиенге пхенгьом „ва“, тогава со требе те керав?
Винаги ле решения, колендар нанай те ачшовес пишмани тай колато ка сикавен, кай синян верно е Йеховаске.
Со ка керес, ако йекх кхангери кидел парес, за те керен лачшипе, тай манген парес тутар-да?
ДЕСАВЕ МАНУША ПХЕНЕН: „Требе те жанав со пхенен о отстъпникя за е Йеховаскере Свидетеленге, за те ащи те защитинав е Йеховас.“
-
Ка овел ли шукар, ако декхой мангел те жанел салка букя? Соске?
СО СИКЛИЛЯМ
За те ачшовас верна е Йеховаске, на требе те тховас амен манушенца, колато нанай леске верна. Требе също те дикхас те на овел амен нищо общо е хохавне религиенца.
О най-важна букя таро уроки
-
Соске на требе те дикхас, те четинас или те шунас букя, колато си таро отстъпникя?
-
Сар требе те икерас амен калкенца, колато вече на манген те овен е Йеховаскере Свидетеля?
-
Со требе те керас, за те на овел амен нищо общо е хохавне религиенца?
АХАЛЬОВ ПО-БУТ
Ахальов со те керес, кана десаве мануша шунярен хохавне букя е Йеховаскере Свидетеленге.
Сар те ахальовес дали десави организация или десаве авер букя, си таро Баро Вавилон?
Бъди зает в края на „последните дни“ („Стражева кула“ октомври 2019, 16-18 абзац)
Со керен десаве таре Йеховаскере душманя, за те траден амен те спиринас те верувинас лесте?
Андо разкази „Търсех Бога още от детството си“ четине сар йекх свещеники мукляс и хохавни религия, колате сине.
Библията променя живота на хората („Стражева кула“ 1 юли 2011)
a Ако декхой бут бреша на жал десаве кхангеряте, ащи те решинел дали те бичшалел писмо, колесте те пхенел соске вече на мангел те овел част калке кхангерятар.
