Tchatche christe mukenn tchi un kekes mank pende un i Jehoweste te well, te krell kowa lengro malepen leha paash. Tu te djiweh i Jehoweske loyaltikes, dikell lo kowa — kowa hi leske bud moldo (Dik pal an 1. Familjakro Liil 28:9). Hawe situatione nai krans tuke kowa phares, te atchess loyal, un hoi te kress, te hi tuke kowa phares?

1. Har nai testrenn wawar maro loyalepen ap i Jehoweste?

Kote denn sawe, kai kamenn gar, te djiwas i Jehoweske. Koon hin jon? Sawe, kai mukan o tchatchepen pal pende, anenn chochepen ap i Debleskri organisationa. Jaake kamenn le maro patsepen paash te krell. Jon kharenna Abtrynnige. Denna ninna rashaja un pastore, kai anenn chochepen pral mende pre. Jon kamenn, te djiwas buder gar an o Jehoweskro tchatchepen. Menge hi kowa i gefahra, te rakrah lentsa, te drawerah kowa, hoi jon an libre oder an o internet tchinenna, oder te dikah lengre videos. Pral kolende, kai kamenn maro loyalepen ap i Jehoweste paash te krell, penas o Jesus: “Mukenn le te rakrell! Jon hi korele un kamenn i korelen ap o wast te lell. Un te lell i korelo i koreles ap o wast, perenn hake dui” (Mateo 15:14).

Hoi hi, te kamell jek, koles mer prindjrah, buder gar i Rakepaskro i Jehowestar te atchell? Maro dji dukella, te hi kowa jek, koles mer kamah. Nai well ninna jaake, kai kamell lo, te penas mer, koon menge budeder moldo hi — job oder o Jehowah. Maro tselo djieha hunte las mer men an sawi situationa glan, te atchas i Jehoweske loyal. Maro kamlepen ap o Debleste hunte wella bareder har ap hako wawareste (Mateo 10:37). Mer kamah ap o Jehoweskro lab te shunell, te was gar sawe menshentsa khetne (Dik pal an 1. Korintarja 5:11).

2. Hawo privat koowa nai testrell maro loyalepen ap i Jehoweste?

Kamlepen ap i Jehoweste krella, kai tserdah mer men tseles ko koomastar krik, hoi dran kola chochene religione wella. Tchi — kek budi mendar, kek organisationa kai dre ham, oder tchomone wawar — derfte wella dran i chocheni religiona. O Jehowah dell men trad: “Mire menshe! Djan dran [koi bari Babilon] win” (Debleskro Tsiro 18:2, 4).

 RODAS DUREDER

3. De jak glan kolende, kai rakrenn chochepen

Har te reagieras mer, mer te hunah tchilatcho koowa pral i Jehoweskri organisationa? Dikenn pal an Gosewe Laba 14:15, un rakrenn khetne pral:

• Hoske te patsas gar halauter, hoi mer hunah?

Dikenn pal an 2. Johanni 10, un rakrenn khetne pral:

• Har te reagieras ap kolende, kai peran o patsepastar tele?

• An hawe situatione nai hunams mer kolen, kai Abtrynnige hin, ninna te rakrah lentsa gar direkt?

• Har hunte well i Jehoweske kowa, mer te dah wawaren koi chance, kai nai rakrenn le mentsa tchilatches pral leste oder pral leskri organisationa?

4. Atch o Debleske loyaltikes, te krell i phraal i doosh

Hoi te kress, tu te djineh, kai kras jek dran i Versammlunga i bareder doosh? Dikas ap i biblakri prinzipa. Kowa hatsah an i lab, hoi o Dewel kola phure Isaelitarjen das. Dikenn pal an 3. Mose 5:1.

Har ko verso penella, hunte rakras mer i Phurentsa, te djinah mer, kai kras jek i bareder doosh. Dran maro kamlepen ap koleste, kai tchomone kras, rakrah mer leha glanstunes, un penah leske, te djal lo pash i Phurende, te rakrell lo lentsa pral kowa, hoi lo kras. Job te kamell lentsa gar te rakrell, krell maro loyalepen ap i Jehoweste, kai penah mer i Phurenge, hoi mer djinah. Hoske hi kowa — mer te krah kowa jaake, har kate tchinlo hi — maro loyaltiko kamlepen …

• ap i Jehoweste?

• ap koleste, kai koi bari doosh kras?

• ap wawarende an i Versammlunga?

 5. Atch win dran koi bari Babilon

 HOI KATE PENLO WAS

Te nai atchas i Jehoweske loyal, hunte tserdas mer men kolendar pale, kai leske gar loyal hin. Mer hunte tserdas men ninna tseles kol chochene religionendar pale.

Hoi penals tu?

• Hoske te dikas, te draweras oder te shunas mer tchi, hoi kol Abtrynnigendar wella?

• Hoi hunte sikras mer, te kamell jek, koles mer prindjrah, buder kek Rakepaskro i Jehowestar te atchell?

• Har nai rikrah mer men ap ko lab, te djas dran kol chochene religione win?