XIDONDZRO 58
Tama U Dumbeka Ka Yehovha
A vakriste va ntiyiso va tiyimiseli kuva va nga tsrhiki ntxhumu nambi ko va mhunu wa kukazri a va tsrhindzreta kule na Yehovha. Ha tiyiseka leswaku na wene u titwisa xileswo. Yehovha a ku nyika lisima ku dumbeka kwaku. (Dondzra 1 Makronika 28:9.) I swiyimu muni leswi nga dzringaka ku dumbeka kwaku, nakone u nga swi hlulisa kuyini?
1. Xana vambeni va nga dzringa ku dumbeka kwezru ka Yehovha hi ndlela yini?
Vambeni va ta dzringisa ku hi sivela ku gandzrela Yehovha. Kambe i mani lweyi a taka yentxa leswo? Vambeni lava va tsrhikiki ntiyiso, va vulavula madzrimi hi nhlengeletanu ya Xikwembu Nkulukumba akuva va tsranisa lipfumelo dzrezru. Vhanu lavo va vitaniwa madukwa. Handle ka leswo, vazrangeli va wukhongoti va hangalasa madzrimi ha hine na va dzringisa ku yentxa vambeni va tsrhika ntiyiso. Swi ni khombo ku dzringisa ku vulavula ni vakaneti vezru, ku dondzra mabuku yavu, ku nghena ka mapajina yavu ya internet kumbe ku hlalela mavhidiyu yavu. Yesu a hlaye leswi mayelanu ni vhanu lava va dzringisaka ku yentxa vambeni va tsrhika ku tizrela Yehovha: “Va tsrhikani, i vakongomisi lava fiki matihlo. Loko mhunu lweyi a fiki matihlo a kongomisa mhunu lweyi a fiki matihlo, hi wubidzri byavu va ta pela xikheleni.”—Matewu 15:14.
Swi nga kuyini loko mhunu lweyi hi mu tivaka a tsrhika ku va Mboni ya Yehovha? Hi nga kazrateka ngopfu loko mhunu lweyi hi mu zrandzraka a yentxa leswo. Mhunu yelweyo a nga ha hi sindzrisa ku hlawula a xikazri ka yene na Yehovha. Hi fanela ku tiyimisela ku tama hi dumbeka ka Yehovha, ku tlula ntxhumu wini na wini. (Matewu 10:37) Xileswo, hi yingiseta xilayu xa Yehovha xa kuva hi nga titlhanganisi ni vhanu va muxaka lowo.—Dondzra 1 Ba-le-Korinte 5:11.
2. Xana swiboho swezru swi swi kombisa hi ndlela yini leswaku ha dumbeka ka Yehovha?
A lizrandzru ledzri hi nga na dzrone ha Yehovha dzri ta hi susumetela kuva hi nga titlhanganisi ni wukhongoti bya madzrimi. Leswo swi djula ku hlaya leswaku a hi hambi xiyenge xa nhlengeletanu leyi tizrisanaka ni wukhongoti bya madzrimi. Leswo swi nga patsra ntizro ni ntxhumu wun’wana ni wun’wana lowu hi wu yentxaka. Yehovha awa hi basopisa a ku: ‘Humani ka [Babilona Lwenkulu], vhanu vanga.’—Apfuletelo 18:2, 4.
KELISISA
Vona leswi u nga swi yentxaka akuva u nga pfumeleli mhunu a tsranisa ku dumbeka kwaku ka Yehovha. Tlhela u vona leswaku ku huma ka Babilona Lwenkulu swi kombisa ku dumbeka kwaku hi ndlela yini.
3. Tivonele ka tidondzro ta madzrimi
Xana hi fanela ku yentxa yini loko hi yingela madzrimi hi nhlengeletanu ya Yehovha? Dondzrani Amaproverbia 14:15, mi gama mi bulisana hi xivutiso lexi landzrelaka:
-
Ha yini hi fanela ku tivonela akuva hi nga pfumeli hinkwaswu leswi hi swi twaka?
Dondzrani 2 Yohan 10, mi gama mi bulisana hi swivutiso leswi landzrelaka:
-
Hi fanela ku ma vona hi ndlela yini madukwa?
-
Ha swi tiva leswaku a hi wutlhazri ku khanela ni madukwa, kambe a miyanakanyu yavu yi nga hi hlohlotela hi ndlela yini?
-
U vona leswaku Yehovha a nga titwisa kuyini loko hi yingiseta mintxhumu leyi hoxekiki ha yene ni nhlengeletanu yake?
4. Tama u dumbeka ka Xikwembu Nkulukumba nambiloko makwezru wa kukazri a dohile
Loko hi tiva leswaku ku ni mhunu a bandleni a hambiki xidoho lexikulu, hi fanela ku yentxa yini? Vona leswi Xikwembu Nkulukumba a swi byeliki Vaisrayele nkameni lowu khalutiki. Dondzrani Levitika 5:1.
Hi lani yi hlayaka ha kone ndzrimana leyi, loko hi tiva leswaku ku ni mhunu lweyi a hambiki xidoho lexikulu, hi fanela ku byela vakulu va bandla. Ku sungula, ku ta va wutlhazri ku va hi kutxa mhunu yelweyo leswaku a ya byela vakulu xidoho xake. Kambe loko a nga swi yentxi leswo, a ku dumbeka kwezru ka Yehovha ku fanela ku hi susumetela ku byela vakulu leswi hi swi tivaka. Loko hi yentxa leswo, hi swi kombisisa kuyini leswaku hi zrandzra . . .
-
Yehovha Xikwembu Nkulukumba?
-
mhunu lweyi a dohiki?
-
vambeni a bandleni?
Loko makwezru wa kukazri a tlhangavetana ni swikazratu, mu pfune!
5. Huma hi ku helela ka Babilona Lwenkulu
Dondzrani Luka 4:8 ni Apfuletelo 18:4, 5, mi gama mi bulisana hi swivutiso leswi landzrelaka:
-
Xana vito dzranga dzra ha li kone ka mabuku ya wukhongoti bya madzrimi?
-
Xana ni lumba nhlengeletanu leyi tizrisanaka ni wukhongoti byimbeni?
-
Xana a ntizro wanga wu seketela wukhongoti bya madzrimi hi ndlela ya kukazri?
-
Xana ku ni xiyenge xa kukazri a wuton’wini byanga lexi ni fanelaka ku xi tsrhika?
-
Loko nhlamulo yanga ka xin’we xa swivutiso leswi a li ina, i yini leswi ni fanelaka ku swi txintxa?
Ka swiyimu leswi hinkwaswu, teka swiboho leswi kombisaka leswaku wa dumbeka ka Yehovha, leswi taka ku siya ni lipfalu ledzri basiki.
A wu ta yentxa yini loko a wo kombeliwa kuva u hamba xihanano lexi taka seketela wukhongoti bya kukazri?
VAN’WE VA LI: “Mine ni djula ku tiva leswi madukwa ma swi hlayaka hi Timboni ta Yehovha akuva ni ta tiva ku tiyimelela.”
-
Xana a swi ta va wutlhazri ku pimisa hi ndlela leyo? Ha yini?
NKATSRAKANYU
Hi djula ku tama hi dumbeka ka Yehovha, xileswo hi fanela ku tingawula ku titlhanganisa ni vhanu lava kalaka va nga dumbeki ka Yehovha. Handle ka leswo, hi fanela ku titsravuxa hi ku helela ka wukhongoti bya madzrimi.
Mpfuxeto
-
Ha yini hi nga fanelanga ku hlalela, ku dondzra kumbe ku yingiseta leswi hlayiwaka hi madukwa?
-
Hi fanela ku va khoma hi ndlela yini vhanu lava va kalaka va nga ha swi djuli ku va Timboni ta Yehovha?
-
Hi nga xi landzrisa kuyini a xibasopiso xa ku huma ka wukhongoti bya madzrimi?
HANDZRISISA
Vona leswi u nga swi yentxaka loko vambeni va hangalasa madzrimi mayelanu ni Timboni ta Yehovha.
“Xana U Tiva Mhaka Hinkwayu?” (Xihondzro Xa Ku Zrindzra, Agoxto wa 2018)
U nga swi tivisa kuyini leswaku nhlengeletanu ya kukazri kumbe ntizro lowu u wu yentxaka wu seketela Babilona Lwenkulu kumbe im-him?
I yini leswi madukwa mambeni ma zamiki ku swi yentxa akuva ma tsranisa lipfumelo dzrezru?
Akuva u tiva leswi muprista wa kukazri wa wukhongoti bya xintu a byi tsrhikisiki xiswone wukhongoti bya madzrimi, dondzra mfambu lowu wa wutomi: “A Ni Djuletela Xikwembu Nkulukumba Ku Sukela Loko Na Ha Li Ntsrongo”.
“Bibele Dzri Txintxa Wutomi Bya Vhanu” (Xihondzro Xa Ku Zrindzra, 1 ka Julhu wa 2011)
