Nahorɛ Kristofoɛ asi bɛ hue kyɛ, bɛngɔmaa sona, anaa nikyee foforɛ biala ngɔtwetwẽ bɛ maa bɛngɔyakyi Yehowa sõen. Yedé yedi paa kyɛ sɔ yeɛ wɔ koso ɛte ngã ɔ. Yehowa nye sɔ nahorɛ bɔ edi ma ye ne paa. (Kenga 1 Beresosɛm 28:9.) Tebea beni yeɛ ɔkɔhora kɔsɔ nahorɛ bɔ edi ma Yehowa ne kɔnea ɔ, na ɛkɔyɛ sɛɛ na ahora agyina yenoa?

1. Sɛɛ yeɛ afoforɛ kɔhora kɔmaa edwirɛ kɔwa nahorɛ bɔ yedi yɛma Yehowa nanwo ɔ?

Ebiemɔ bɔ mmɔden kyɛ bekosi sõen bɔ yɛfa yɛma Yehowa ne atẽe. Nwama yeɛ bɛkɔhora bɛkɔyɛ sɔ ɔ? Bɛbɔ bafi asafo nanu ne kekã Nyameɛpiri ahyehyɛdeɛ nanwo dwirɛ tɛɛ kyɛbɔ ɔkɔyɛ a, bɛkɔsɛkye yɛ gyidie ɔ. Bɛfrɛ sɔ mmenia nemɔ awaefoɛ. Afei koso asɔfoɛ biemɔ kekã yɛnwo dwirɛ bɔ ɔtte nahorɛ, kyɛbɔ ɔkɔyɛ a, bɛkɔmaa bɛbɔ bɛwale asafo nanu hyɛlle ne kofi nu ɔ. Asane wɔ nu kyɛ yɛne mmenia bɔ bɛdwɔso betia yɛ ne kosu aprowaa, yɛkɔkenga bɛ nwomaa ahoroɛ, yɛkɔhɔ bɛ wɛbsit so, na yanea bɛ vidio ahoroɛ ɔ. Bɛbɔ bɛyere bɛnwo kyɛ bɛkobu y’abanu, wɔ sõen bɔ yɛkɔsõ Yehowa nahorɛ nu nanwo ne, Yesu hãfale bɛnwo kyɛ: “Ɛmɔyakyi bɛ. Bɛnye asi. Na sɛ anyesiniwaaniɛ kyire obiengo anyesiniwaaniɛ atẽe a, bemunyɔ bɛkɔɔtɔ kumaa nu.”​—Mateo 15:14.

Na sɛ ebie bɔ opingyé yɛ paa si gyinaeɛ kyɛ ɔngɔyɛ Yehowa Danzeniɛ kõ koso ɛɛ? Sɛ ebie bɔ opingyé yɛ paa yɛ sɔ a, ɔkɔhora kobubu yɛ ahõne. Sɔ sona ne kɔhora kɔhyɛ yɛ kyɛ, ɔne Yehowa yɛye nu kõ. Odikyɛ yesi yɛ hue kyɛ, yekoli nahorɛ yɛkɔma Yehowa wɔ nikyeebiala nu. (Mateo 10:​37) Yeti yetie Yehowa afutue bɔ ɔkã kyɛ, nnɛmaa yɛne sɔ mmenia nemɔ bɔ ne.​—Kenga 1 Korintofoɛ 5:11.

2. Sɛɛ yeɛ gyinaeɛ bɔ yesisi ne kɔhora kɔhã nahorɛ bɔ yekoli yɛkɔma Yehowa ne ɔ?

Ɔdɔ bɔ yɛle yɛma Yehowa ne kɔhã yɛ maa yɛkɔhwẽ yɛnwo yekofi ngondombo sõen nwo koraa. Ɔnzɛkyɛ yɛmaa adwuma bɔ yɛyɛ, ahyehyɛdeɛ bɔ yɛwɔ nu, anaa nikyee foforɛ biala bɔ yɛfa yɛnwo yewura nu ne, ɔne ngodombo sõen nya abusuabɔ biala. Yehowa bɔ yɛ kɔkɔ kyɛ: “Ɛmɔfi [Babilɔn Pirikua Nanu], me maen.”​—Nyekyire 18:​2, 4.

 SUA PẼE BOKASO

3. Nea wɔnwo yé wɔ ngondombo ngyerɛkyerɛ nwo

Sɛ yɛte ngondombo dwirɛ bie yɛfa Yehowa Adanzefoɛ nwo a, nzu yeɛ odikyɛ yɛyɛ ɔ? Kenga Anyandera 14:​15, na susu nzɛmmisa he anwo:

• Nzuati yeɛ ɔnzɛkyɛ yedé edwirɛ bɔ yɛkɔte biala yedi ɔ?

Kenga 2 Yohane 10, na susu nzɛmmisa hemɔ anwo:

• Sɛɛ yeɛ odikyɛ yɛnea yɛnwo yé wɔ awaefoɛ nwo ɔ?

• Sɛ yɛne awaefoɛ andwudwo tẽe po, na sɛ yɛkenga bɛ nwomaa, yɛnea bɛ vidio, anaa yɛkɔ bɛ wɛbsait so a, sɛɛ yeɛ bɛkɔhora bekonya yɛso ngɛndɛensoɛ ɔ?

• Sɛ yetie ngondombo dwirɛ bɔ bɛkã bɛfa Yehowa anaa y’ahyehyɛdeɛ nanwo ne a, sɛɛ yeɛ esusu kyɛ ɔkɔte ngã ɔ?

4. Sɛ aliemaa bie yɛ bɔne a, kɔso di nahorɛ ma Nyameɛpiri

Sɛ yenwu kyɛ ebie bɔ ɔwɔ asafo nanu ayɛ bɔne bɔ enu yɛ nõ a, asɛyɛdeɛ beni yeɛ ɔla yɛso wɔ yenwo ɔ? Susu nnyinasoɛdwirɛ bɔ ɔwɔ Nyameɛpiri Mmraa bɔ ɔfa mane y’asomvoɛ bɔ bɛtenane ase tete nanwo nea. Kenga Leviticus 5:1.

Kyɛbɔ bahã ye wɔ sɔ ngyekyɛmuɛ nanu ne, sɛ yenwu kyɛ ebie ayɛ bɔne bɔ enu yɛ nõ a, odikyɛ yɛkã bɔ yɛse yɛfa edwirɛ nanwo yekyire asafo nu mbanyi ne. Kora bɔ yɛkɔhã yekohyire mbanyi ne, ɔte pá kyɛ yɛkɔhã yekohyire sona ne bɔbɔ kyɛ, ɔɔbɔ asafo nu mbanyi ne amaneɛ. Sɛ wangɔ anga a, nahorɛ bɔ yɛpena kyɛ yedi yɛma Yehowa ne kɔhã yɛ maa, yɛkɔhã bɔ yɛse wɔ edwirɛ nanwo yekohyire mbanyi ne. Sɔ bɔ yɛkɔyɛ ne, sɛɛ yeɛ okohyire kyɛ yɛdɔ . . .

• Yehowa Nyameɛpiri ɔ?

• sona bɔ wayɛ bɔne ne ɔ?

• afoforɛ bɔ bɛwɔ asafo nanu ne ɔ?

 5. Twẽ wɔnwo fi Babilɔn Pirikua nanwo

 YEMUABƆLƐ

Sɛ yɛkɔhora yɛkɔhɔ so yekoli nahorɛ yɛkɔma Yehowa a, odikyɛ yɛtwẽ yɛnwo yefi bɛbɔ benni ye nahorɛ nanwo. Odikyɛ yesa koso yɛtwẽ yɛnwo yefi ngondombo sõen nwo koraa.

Ndimu

• Nzuati yeɛ ɔnzɛkyɛ yetie, yɛkenga, anaakyɛ yɛnea awaefoɛ vidio ahoroɛ ɔ?

• Bɛbɔ bɛmbena kyɛ bɛyɛ Yehowa Adanzefoɛ kõ ne, sɛɛ yeɛ odikyɛ yɛne bɛ di ɔ?

• Yɛkɔyɛ sɛɛ na y’atie kɔkɔbɔ bɔ ɔkã kyɛ, yɛhwẽ yɛnwo koraa yefi ngondombo sõen nwo ne ɔ?