Atâ Chrétien aleke na bê ti ala ti zia lâ oko ape si mbeni ye wala mbeni zo akanga lege na ala ti voro Jéhovah. Kite ayeke dä ape so mo kue mo pensé tongaso. Jéhovah abâ na nene ni mingi dutingo be-ta-zo ti mo. (Diko 1 Chronique 28:9.) Aye wa la apeut ti sara si a yeke ngangu na mo ti duti be-ta-zo? Nyen la apeut ti aidé mo ti gbu ngangu dä?

1. Tongana nyen la ambeni zo apeut ti sara si a yeke ngangu na e ti duti be-ta-zo na Jéhovah?

Ambeni zo ayeke gi ti kanga lege na e ti sara na Jéhovah. Azo wa la apeut ti sara mara ti ye tongaso? Ambeni zo so azia tâ tënë ayeke tene amvene na ndö ti bungbi ti Jéhovah ti sara si e duti na mabe encore ape. A iri ala a-apostat. Ambeni kota zo ti nzapa ayeke tene nga amvene na ndö ti e ti pusu azo so lê ti ala ahan ape ti zia ti sara na Jéhovah. Ti sara lisoro na azo so ake e, ti diko ambeti ti ala wala atënë so ala zia na ndö ti Internet, ti gue na ndö ti asite ti ala wala ti bâ avidéo ti ala ayeke ga na kpale. Jésus asara tënë ti azo so ayeke gi ti découragé amba ti ala ti sara na Jéhovah be-ta-zo ape, lo tene: “Ala zia aFarizien so. Ala yeke awaziba so ayeke fa lege na zo. Tongana waziba afa lege na mba ti lo waziba, ala use kue ayeke tï na dû.”​—Matthieu 15:14.

Ka tongana mbeni zo so e hinga lo atene ni ye ti duti Témoin ti Jéhovah encore ape? Vundu apeut ti sara e tongana mbeni zo so e ye lo asara tongaso. Zo ni so apeut ti forcé e ti fa zo so e ye lo: lo wala Jéhovah. E doit ti leke na bê ti e ti ngbâ be-ta-zo na Nzapa ahon azo kue (Matthieu 10:37). Tongaso, e yeke sara ye alingbi na commandement ti Jéhovah so ahunda na e ti sara songo na mara ti azo tongaso ape.​—Diko 1 aCorinthien 5:11.

2. Tongana nyen la adesizion ti e apeut ti fa wala e yeke be-ta-zo na Jéhovah?

Yengo so e ye na Jéhovah ayeke pusu e ti sara pëpe mbeni ye so abungbi ti vorongo nzapa ti wataka ayeke sara. A yeke nzoni mbeni ye ti abungbi ti vorongo nzapa ti wataka aduti pëpe na yâ ti kua ti e, na yâ ti mbeni bungbi so e yeke na yâ ni wala na yâ ti aye so e yeke sara. Jéhovah awa e, atene: “Azo ti mbi, ala sigi na yâ ti [Babylone, Ngangu gbata].” ​—Apocalypse 18:2, 4.

 GI TI HINGA AYE MINGI

3. Sara hange na awafango ye ti wataka

A yeke nzoni e sara ye tongana nyen tongana e mä asioni tënë so a tene na ndö ti bungbi ti Jéhovah? Diko aProverbe 14:15, na pekoni kiri tënë na hunda so:

• Ngbanga ti nyen la a yeke nzoni e sara hange si e yeda pëpe na atënë kue so e mä?

Diko 2 Jean 10, na pekoni kiri tënë na ahunda so:

• A yeke nzoni e sara ye na mbage ti a-apostat tongana nyen?

• Même tongana e sara lisoro droit na a-apostat ape, tongana nyen la afango ye ti ala apeut ti si na e?

• Mo pensé a yeke sara Jéhovah tongana nyen, tongana e dengi mê ti mä asioni tënë so a tene na ndö ti lo wala na ndö ti bungbi ti lo?

4. Ngbâ ti duti be-ta-zo na Nzapa tongana mbeni ita asara siokpari

Tongana e mä so mbeni zo na yâ ti congrégation asara mbeni kota siokpari, nyen la e doit ti sara? Bâ mbeni mama-ndia so ayeke na yâ ti Ndia so Nzapa amû lani na azo ti Israël. Diko Lévitique 5:1.

Tongana ti so versê so afa, tongana e hinga so mbeni zo asara mbeni kota siokpari, a yeke nzoni e sara tënë ni na a-ancien. Me kozo ti sara tongaso, a yeke duti nzoni ti wa zo so asara siokpari ni ti gue ti bâ a-ancien ti fa na ala siokpari so lo sara. Tongana lo sara ni ape, e yeke ngbâ be-ta-zo na Jéhovah na e yeke fa na a-ancien ye so lo sara. Tongana nyen la sarango tongaso afa so e yeke na tâ ndoye . . .

• na mbage ti Jéhovah Nzapa?

• na mbage ti zo so asara siokpari ni?

• na mbage ti aita ti congrégation?

 5. Sigi na yâ ti Babylone, Ngangu gbata

 NA NDURU TËNË

Ti ngbâ be-ta-zo na Jéhovah, e doit ti sara songo ape na azo so ayeke be-ta-zo na lo ape. E doit nga ti zi terê ti e biani biani na yâ ti abungbi ti vorongo nzapa ti wataka.

Dango bê

• Ngbanga ti nyen la a yeke nzoni pëpe ti tene e bâ, e diko wala e mä atënë so a-apostat ayeke tene?

• A yeke nzoni e sara ye tongana nyen na mbage ti azo so aye ti ngbâ aTémoin ti Jéhovah encore ape?

• Tongana nyen la e peut ti sara ye alingbi na wango so a hunda na e ti sigi na yâ ti abungbi ti vorongo nzapa ti wataka?