Bena Kidishitu ba binyibinyi abekalaa na kitshibilo kia kupela kuleka kintu su nkimune sunga muntu bua kuibemika buabadia kulanguila Yehowa. Atushinkamisha’shi nyi kitshibilo kiodi namu nakio. Yehowa ata lulamato lobe na mulo. (Badika 1 Myanda 28:9.) Mmianda kinyi ilombene kutompa lulamato lobe kui Yehowa, na mbikunyi biodia kuiyikambila?

1. Bangi be kutompa lulamato lobe kui Yehowa naminyi?

Bangi bantu be kutompa kuituimika buatudia kupela kulanguila Yehowa. Mbantu kinyi be kukita biabia? Bangi bantu bakatukie mu bia binyibinyi, abakula mianda ya madimi pabitale ndumbuluilo a Yehowa bua kuluisha lukumino luetu. Abebetanyina bu bantu basumbule lukumino. Dingi, bakata ba bipuilo, abapalakasha mianda ya madimi pa bitutale bua kutakula bantu bashi banyingie mu kikudi bua kukatuka mu bia binyibinyi. Bi masaku akata kuisamba na bantu basumbule lukumino, kubadika mikanda yabo, kuenda ku ma site abo a internete sunga kubandila ma video abo. Pabitale baba abakiebe kubofusha bangi buashi tabafubilanga Yehowa na lulamato loso, Yesu bakuile’shi: “Ebalekyeleyi; Nyi mba-mpofu, bakunkushi ba ba-mpofu. Na su mpofu akunkusha mungi mpofu, abakapono boso babidi mu bwina.”​—Mateo 15:14, Kilombeno kipya 2014.

Tui kukita naminyi su muntu atuku bata kitshibilo kia kupela kuikala dingi Temwe a Yehowa? Bi kuitutapa kuishimba su muntu atudi naye mu kipuano ata kino kitshibilo. Yawa muntu e kuitutakula bua kuata kitshibilo kia kumusangula aye sunga kusangula Yehowa. Abitungu tuikale na kitshibilo kia kushala na lulamato kui’Efile Mukulu kumpala kua muntu oso yawa. (Mateo 10:37) Biabia, atulondaa muiya wa Yehowa wa kupela kuikala mu kipuano na bantu be biabia.​—Badika 1 Bena-Kodinda 5:11.

2. Bitshibilo bietu bi kulesha naminyi’shi tui na lulamato kui Yehowa?

Kifulo kietu bua Yehowa akitutakula bua kupela kukita kintu kioso kiakia ki mu kuipushina na lulanguilo lua madimi. Biabia, sunga mudimo wetu, sunga mu kisaka kampanda kiatudi, sunga kingi kintu kioso kiatutshi, tabitungu kikale mu kuipushena na bipuilo bia madimi nya. Yehowa etudimusha’shi: “Tuukayi munkatshi mwa [Babilone mukata], mwilo wande.”​—Kibafumbwilwe 18:2, 4, Kilombeno kipya 2014.

 TUKIMBUULE BOSO

3. Dimukila malongiesha a madimi

Tui kukita naminyi su tubapusha abakula mianda ya madimi pabitale ndumbuluilo a Yehowa? Badika Nkindji 14:15, akupu nuisambile luno lukonko alulondo:

• Buakinyi abitungu tudimukie bua kupela kukumina bioso biatupusha?

Badika 2 Yowano 10, akupu nuisambile ino nkonko ailondo:

• Abitungu tumone bantu basumbule lukumino naminyi?

• Sunga biekela’shi tatukuete kuisamba na bantu basumbule lukumino, mbikunyi biatudi balombene kufika mu kupusha malongiesha abo?

• Omono’shi Yehowa e kupusha naminyi su okuete kutemesha bantu abakula bi bubi pa bimutale na pa bitale ndumbuluilo aye?

4. Shala na lulamato kui Efile Mukulu nsaa aikitshi mukuetu muluisho

Su tuawuka’shi mukuetu kampanda mu kakongye mmukite muluisho ukata, abitungu tukite kinyi? Tala eyi dia kulonda di mu muiya ubadi Efile Mukulu mupe bena Isalele a kala. Badika Bena-Levi 5:1.

Nka bu biabalesha mu yawa verse, su tubauku’shi kui muntu mukite muluisho ukata, abitungu tulungule bakulu mianda yatuku. Anka, kumpala kua kuibikita, bi buwa kulungula yawa muntu mukite muluisho buadia kuenda aye nabene mu nkatonda muluisho waye kui bakulu. Su ta mukumine kukalungula bakulu, lulamato luetu kui Yehowa aluitutakula buatudia kuibalungula wawa muanda. Kukita bino akulesha naminyi’shi tui na kifulo na lulamato kui . . .

• Yehowa Efile Mukulu?

• yawa muntu mukite muluisho?

• na bangi mu kakongye?

 5. Tualukanga mu Babilone mukata

 MU KIKOSO

Buatudia kushala na lulumato kui Yehowa, tabitungu tuikale mu kipuano na boso bashi na lulamato kuadi. Abitungu dingi tuilamune mu mianda yoso ya bipuilo bia madimi.

Kuambuula

• Buakinyi tabitungu kutala, kubadika sunga kutemesha mianda ya bantu basumbule lukumino?

• Mbikunyi biatudi balombene kukitshina baba boso bashabakumina dingi kuikala bu ba Temwe ba Yehowa mianda?

• Mbikunyi biatudi balombene kukokiela elango dia kutuka mu bipuilo bia madimi?