SIFUNDVO 58
Hlala Wetsembekile KuJehova
EmaKhristu eliciniso atimisele kungavumeli muntfu nobe lenye intfo iwaphatamise ekukhonteni kwawo Jehova. Siyaciniseka kutsi nawe utiva ngaleyondlela. Kwetsembeka kwakho kuligugu kuJehova. (Fundza 1 Tikhronike 28:9.) Ngutiphi timo letingavivinya kwetsembeka kwakho kuye, futsi yini longayenta ngephansi kwaleto timo?
1. Labanye bantfu bangakuvivinya njani kwetsembeka kwetfu kuJehova?
Labanye bantfu batawetama kusivimba kutsi sikhonte Jehova. Ngubani nje longenta intfo lenjalo? Labanye bantfu labalishiyile liciniso bakhuluma emanga ngenhlangano yaNkulunkulu kuze bacedze kukholwa kwetfu. Babitwa ngekutsi tihlubuki. Labanye baholi benkholo basakata kwatiswa lokungemanga ngatsi kuze bente bantfu labangakanaki kutsi bangamkhonti Jehova. Sisuke sitibeka engotini nasiphikisana netihlubuki, sifundza tincwadzi tato nobe ema-blogs ato, singene kuma-website ato nobe sibukele ema-video ato. Nakakhuluma ngalabo labetama kuphatamisa labanye ekukhonteni Jehova ngekwetsembeka, Jesu watsi: “Bayekeleni. Babaholi labatimphumphutse. Nangabe imphumphutse ihola imphumphutse, totimbili titawugcumkela emgodzini.”—Matewu 15:14.
Yini lesingayenta nangabe umuntfu lesimatiko ancuma kutsi akasafuni kuba nguFakazi waJehova? Kungaba buhlungu kakhulu nakungentiwa ngumuntfu losihlobo sakho. Loyo muntfu angasiphocelela kutsi sikhetse emkhatsini wakhe naJehova. Kufanele sitimisele kuhlala setsembekile kuJehova. (Matewu 10:37) Ngako-ke silalela umtsetfo waJehova ngekungatihlanganisi nebantfu labanjalo.—Fundza 1 KubaseKhorinte 5:11.
2. Indlela lesenta ngayo tincumo ingakhombisa njani kutsi setsembekile kuJehova?
Indlela lesimtsandza ngayo Jehova itasenta sibalekele nobe nguyiphi intfo lengasenta sitihlanganise nenkholo yemanga. Ngako-ke umsebenti wetfu, tinhlangano lesingemalunga ato, kanye nanobe yini lesiyentako akukafaneli kusebentelane nenkholo yemanga. Jehova uyasecwayisa: “Phumani [eBhabhulona Lenkhulu] bantfu bami.”—Sembulo 18:2, 4.
CHUBEKA UFUNISISA
Tfola kutsi ungakubalekela njani kuvumela bantfu bente kwetsembeka kwakho kuJehova kube butsakatsaka. Phindze ubone kutsi ungakukhombisa njani kwetsembeka kwakho ngekutsi uphume eBhabhulona Lenkhulu.
3. Caphela bafundzisi bemanga
Yini lokufanele siyente nasiva tintfo letingasilo liciniso ngenhlangano yaJehova? Fundza Taga 14:15, bese nicoca ngalombuto:
-
Kungani kufanele sicaphele kuze singakholwa yonkhe intfo lesiyivako?
Fundza 2 Johane 10, bese nicoca ngalemibuto:
-
Kufanele sitiphatse njani tihlubuki?
-
Ngisho nobe singachumani ngalokucondzile netihlubuki, singatitfola kuphi timfundziso tato?
-
Ucabanga kutsi Jehova angativa njani nasilalela tinkhulumo letingemanga ngaye nangenhlangano yakhe?
4. Hlala wetsembekile kuNkulunkulu nangabe umzalwane wakho enta sono
Yini lokufanele siyente nasiva kutsi lomunye ebandleni wente sono lesikhulu? Cabanga ngesimiso lesivela emtsetfweni Nkulunkulu lebekawunikete ema-Israyeli asendvulo. Fundza Levithikhusi 5:1.
Njengobe kuvetiwe kulelivesi, nasiva kutsi umuntfu lotsite wente sono lesikhulu kufanele sitjele labadzala belibandla loko lesikwatiko. Nobe kunjalo, ngaphambi kwekwenta loko, kungaba sento semusa kukhutsata lona lowonile kutsi aye kulabadzala ayobatjela ngesono sakhe. Nakehluleka kwenta loko, kwetsembeka kwetfu kuJehova kufanele kusente sitjele labadzala loko lesikwatiko. Kwenta ngalendlela kungakhombisa njani kutsi sitsandza . . .
-
Jehova Nkulunkulu?
-
lomuntfu lowente sono?
-
labanye ebandleni?
Nangabe umzalwane wakho asenkingeni, msite!
5. Ungatihlanganisi neBhabhulona Lenkhulu
Fundza Lukha 4:8 neSembulo 18:4, 5, bese uphendvula lemibuto:
-
Ngisebhaliswe njengelilunga lenkholo yemanga yini?
-
Ngililunga lenhlangano lesebentelana nenkholo yini?
-
Kungenteka yini umsebenti lengiwentako usekela inkholo yemanga ngandlela tsite?
-
Tikhona yini tici ekuphileni kwami lapho kusadzingeka ngitehlukanise khona nenkholo yemanga?
-
Nangabe ngiphendvula nga-yebo kuleminye yalemibuto, nguluphi lushintjo lokufanele ngilwente?
Kunobe ngusiphi simo, yenta sincumo lesitakushiya unanembeza lohlantekile, futsi ukhombise kutsi wetsembekile kuJehova.
Ungenta njani nawungacelwa kutsi unikelele inhlangano letsite yenkholo?
LABANYE BANTFU BATSI: “Ngidzinga kukwati loko lokushiwo tihlubuki ngaBoFakazi BaJehova kuze ngitovikela liciniso.”
-
Kungaba kuhlakanipha yini kwenta kanjalo? Yini lekwenta usho njalo?
LOKO LESICOCE NGAKO
Kuze sihlale setsembekile kuJehova kufanele singatihlanganisi nalabo labangaketsembeki kuye. Kufanele sitehlukanise ngalokuphelele nenkholo yemanga.
Yini Loyifundzile?
-
Kungani kungakafaneli sibukele, sifundze nobe silalele loko lokushiwo tihlubuki?
-
Kufanele sibaphatse njani labo labangasafuni kuba BoFakazi BaJehova?
-
Yini lesingayenta kuze sikhombise kutsi siyasilalela secwayiso sekuphuma eBhabhulona Lenkhulu?
LOKUNYE LONGAKUHLOLA
Fundza kutsi yini longayenta nawuva labanye bantfu basakata emanga ngaBoFakazi BaJehova.
“Uwati Onkhe Yini Emaciniso?” (Sicongosekulindza, sa-August 2018)
Ungatibona njani tinhlangano nobe imisebenti lesekela iBhabhulona Lenkhulu?
Yini leyentiwe baphikisi kuze betame kwenta kukholwa kwetfu kube butsakatsaka?
Endzabeni letsi “Ngangilokhu Ngifuna UNkulunkulu Kusukela Ngiyingane,” fundza kutsi umphristi longumShinto watehlukanisa njani nenkholo yemanga.
“IBhayibheli Lishintsha Ukuphila” (Sicongosekulindza, sa-October 1, 2011 lesitfolakala ngesiZulu)
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
