Tau Kristen tutune mětẹ̌tawakal᷊i tawe měmala maning i sai arau maning apa makakoạ si sire měngědo mẹ̌tahamawu si Yehuwa. I kau lai tantu piạ pěndang kerene. Yehuwa měngẹ̌ngarěga kasasatianu. (Basa 1 Tawarikh 28:9.) Situasi apa botonge makasal᷊ukạ kasasatianu si Yehuwa, kụ kerea i kau botonge tumatěngo hal᷊ẹ̌ ene?

1. Kerea taumata wal᷊inẹ makasal᷊ukạ kasasatiang i kitẹ si Yehuwa?

Piạ taumata sarung mẹ̌tawakal᷊i měkoạ si kitẹ měngědo mẹ̌tahamawu si Yehuwa. I sai i sire? Pirang katau apang něněntang katěngadẹ̌ něhabarẹ̌ konti soal u organisasing Mawu gunang měndusạ pangangimang i kitẹ. I sire ini nisěbạ taumata murtad. Bọu ene lai, pirang katau těmbonangu agama něhabarẹ̌ informasi konti soal i kitẹ gunang měkoạ taumata apang tawe maingatẹ̌ měněntang katěngadẹ̌. Hakị u ene, sěbạe makawahaya mạeng i kitẹ mẹ̌bisara dingangi sire, mẹ̌basa bukẹ̌, mẹ̌biala manga video, arau měmuka situs web i sire. Soal u taumata apang mětẹ̌tawakal᷊i měkoạ taumata wal᷊inẹ tawe masatia si Yehuwa, Yesus naul᷊ị, ”Balạe i sire. I sire kai měngangahạ buta. Mạeng taumata wuta měngahạ taumata wuta, i rẹ̌dua sarung manawo su lohang.”​—Matius 15:14.

Kerea mạeng taumata nikěnalẹ̌ i kitẹ seng madiri makoạ Sahiding Yehuwa? I kitẹ tantu sěbạe masusah naung mạeng taumata marani dingangi kitẹ někoạ hal᷊ẹ̌ ene. I sie aramanung měngoro si kitẹ měmile si sie arau si Yehuwa. I kitẹ harusẹ̌ mẹ̌tawakal᷊i limembong masatia si Yehuwa. (Matius 10:37) Hakị u ene, i kitẹ tumuhụ parentang i Yehuwa gunang tawe mědal᷊ahapị dingangu taumata kerene.​—Basa 1 Korintus 5:​11.

2. Kerea putusang i kitẹ něnodẹ i kitẹ masatia si Yehuwa?

Ual᷊ingu makěndagẹ̌ si Yehuwa, i kitẹ madiri měkoạ barang piạ sěmpụe dingangu agama palsu. Hal᷊ẹ̌, manga organisasi tẹ̌tol᷊eng i kitẹ, dingangu manga kegiatan kẹ̌koateng i kitẹ, ene tawe wotonge piạ sěmpụe dingangu agama palsu. Yehuwa něgělị laingatẹ̌ si kitẹ, ”Umatẹ̌-Ku, sěbangke bọu [Babelẹ̌ Gěguwạ].”​—Wahyu 18:​2, 4.

 BANGKA PAKARAL᷊UNG

3. Pakaingatẹ̌ su manga guru palsu

Apa koateng i kitẹ mạeng nakaringihẹ̌ hal᷊ẹ̌ dal᷊akị soal u organisasing Yehuwa? Basa Amsal 14:​15, bọu ene bisarai kakiwal᷊o ini:

• Kawe nụe i kitẹ harusẹ̌ maingatẹ̌ kụ tawe mangimang su kěbị apa nikaringihang i kitẹ?

Basa 2 Yohanes 10, bọu ene bisarai manga kakiwal᷊o ini:

• Kerea i kitẹ měkoạ taumata murtad?

• Maning i kitẹ tawe nẹ̌bisara langsung su taumata murtad, kerea těntirong i sire bědang makapěngaruh si kitẹ?

• Tumuhụ si kau, kerea pěndang i Yehuwa mạeng i kitẹ dumaringihẹ̌ bisara ral᷊akị soal i Sie arau soal u organisasi-Ne?

4. Tatapẹ̌ pakasatia si Yehuwa su tempong piạ u někoạ dosa

Mạeng i kitẹ nakasingkạ piạ sěngkatau su sidang seng někoạ dosa serius, apa tanggung jawab i kitẹ? Pẹ̌tiněna sěmbaụ prinsip bọu Hukungu Mawu gunang tau Israel su tempong tamai. Basa Imamat 5:1.

Kere parenta nilahẹ su ayatẹ̌ ene, mạeng i kitẹ makasingkạ piạ u někoạ dosa serius, i kitẹ harusẹ̌ mẹ̌běke ene su manga penatua. Katewe, těntal᷊ang bědang tawe někoạ ene, mapaelẹ̌ mạeng i kitẹ maul᷊ị su tau seng někoạ dosa gunang makoạ sarang penatua kụ měngaku pẹ̌sasal᷊ane. Mạeng i sie tawe nẹ̌běke su penatua, kasasatia si Yehuwa sarung makakoạ si kitẹ mẹ̌běke apa seng nikasingkạ i kitẹ su manga penatua. Kerea měkoạ manga hal᷊ẹ̌ ene něnodẹ i kitẹ masatia su . . .

• Mawu Yehuwa?

• tau seng někoạ dosa?

• anạu sěmbaụ wal᷊inẹ su sidang?

 5. Pẹ̌těngkarau bọu Babelẹ̌ Gěguwạ

 RINGKASAN

Tadeạu tatapẹ̌ masatia si Yehuwa, i kitẹ tawe wotonge mědal᷊ahapị dingangu taumata apang tawe masatia si Sie. I kitẹ lai harusẹ̌ kahěngang-hěngang mẹ̌těngkarau bọu agama palsu.

Apa seng nikaěndungangu?

• Kawe nụe i kitẹ tawe wotonge mẹ̌biala, mẹ̌basa, arau dumaringihẹ̌ těntirong taumata murtad?

• Kerea i kitẹ měkoạ taumata apang seng madiri makoạ Sahiding Yehuwa?

• Kerea i kitẹ tumuhụ laingatẹ̌ gunang suměbang bọu agama palsu?