LESOGNE 58
Ko Mivalike amy i Jehovah
Tapa-kevetse ty tena Kristiana fa tsy hagnenga ndra inogn’ino, ndra ia ndra ia hikalagne aze tsy hanompo i Jehovah. Azo antoke fa hoe izay ka rehe. Tena sarobily amy i Jehovah ty tsy fivaliha’o ama’e. (Vakio ty 1 Tantara 28:9.) Faie amy ty raha manao akore iaby ro va’e ho sarotse amantikagne ty tsy hivalike, sady inogne ty hagnampe antikagne tsy hivalike?
1. Nagnino ty raha atao ty ndaty ila’e ro va’e hahavy antikagne hivalike amy i Jehovah?
Va’e hisy ndaty hanao raha hikalagnagne antikagne tsy hanompo i Jehovah. Ia iaby ty va’e hanao izay? Agnisa izay ty ndaty niala tamy ty hamarenagne. Mirehake vande miomba ty fandamina i Jehovah iareo mba hahavy antikagne tsy hanam-pinoagne sasa. Atao tihoe mpivalim-pinoagne iareo. Magnely vande miomba antikagne ka ty mpitarike fivavahagne ila’e. Va’e hiala amy ty hamarenagne ze tsy mitao fa mino i vande iareoy. Magnoho-doza ty mialy hevetse amo o ndaty mpanohetseo, ndra mamaky ty boke’e ndra magnente ty fagnazavagne amy ty tragnom-poraro iareo amy Internet ao, ndra magnente ty video’e. Nirehake miomba o ndaty manao raha mba hahavy ty hafa tsy hanompo i Jehovah-o ty Jesosy. Hoe reke: “Engao iareo, fa mpitarike goa. Naho o goao ro mitarike goa, le sambe ho tonta an-davake agne iareo.”—Matio 15:14.
Akore areke naho miala tsy ho Vavolombelo i Jehovah sasa ty ndaty raike fantantikagne? Mampalahelo ty raha hoe izay, lohotsie naho ndaty tena marine antikagne ty manao izay. Va’e hampifilie’e tikagne tie, i reke sa i Jehovah ty teantikagne. Mila asehontikagne amy izay fa ty tsy hivalike aman’Andrianagnahare ro tena lahibey amantikagne. (Matio 10:37) Magnorike i lily i Jehovah-y areke tikagne, le tsy mifagnosehose amy ty ndaty hoe izay.—Vakio ty 1 Korintianina 5:11.
2. Trea amy ty fanapahan-kevetse rambese’o vao fa tsy mivalike amy i Jehovah rehe?
Naho tena tea i Jehovah rehe, le tsy hanao raha misy ifandrambesa’e amy ty fivavahan-diso. Tsy toko’e hisy ifandrambesa’e amy ty fivavahan-diso ka ty asantikagne ndra ty fikambanagne idirantikagne ndra ty raha ila’e ataontikagne. Mampitao antikagne ty Jehovah tie: “Miakara boake ama’e ao [amy i Babilona Lahibey], nareo ndatiko.”—Apokalypsy 18:2, 4.
ANDAO HANDINEKE TY PITSOPITSO’E
Hodinehentikagne ato tie, ino ty toko’e hatao’o naho misy ndaty manao raha hahavy azo hivalike amy i Jehovah. Akore ty ampisehoa’o fa tsy mifandrambe amy i Babilona lahibey rehe?
3. Mitaoa amy ty mpampianatse sandoke
Ino ty toko’e hataontikagne naho maharey ndaty magnaraty ty fandamina i Jehovah tika? Vakio ty Ohabolana 14:15, sady iharò midineke ty fagnonteneagne toy:
-
Nagnino tikagne ro tsy toko’e le avy le hino ze kila raha reintikagne?
Vakio ty 2 Jaona 10, sady iharò midineke ty fagnonteneagne retoa:
-
Tsy toko’e hataontikagne akore o mpivalim-pinoagneo?
-
Va’e tsy hifampirehake amo o mpivalim-pinoagneo mivantagne tikagne. Faie akore ty hahavy antikagne hitsanogne ty fampianara’e?
-
Naho ty heve’o, ino ty va’e ho tsapa i Jehovah naho mitsanogne ty fagnaratia o ndatio aze naho ty fandamina’e tikagne?
4. Ko mivalike amy i Jehovah ndra tie misy manao fahotagne lahibey
Ino ty toko’e hataontikagne naho misy rahalahy ndra rahavave fantantikagne tie nanao fahotagne lahibey? Andao tikagne handineke toro lalagne raike boake amy ty Lalàn’Andrianagnahare hoahy o Israelita talohao. Vakio ty Levitikosy 5:1.
Treantikagne boake amo o andine’e iohoe, fa mila mirehake amo o androanavi-pagnahio tikagne naho fantantikagne tie nanao fahotagne lahibey ty ndaty raike. Faie aloha ty hanoagne izay, le soa naho risihentikagne hirehake amo o androanavi-pagnahio i raha natao’ey i ndatỳ. Naho tsy manao izay reke, le asehontikagne tie tsy mivalike amy i Jehovah tika naho mirehake ze raha fantantikagne amo o androanavi-pagnahio. Nagnino ty fanoagne izay ro mampiseho tie, tena teantikagne...
-
ty Jehovah Andrianagnahare?
-
i ndaty nanotay?
-
o rahalahy naho o rahavave amo o fiangonagneo eò?
Naho misy mpiara-manompo hai’o fa nanao raha tsy mete, le ampeo reke!
5. Miakara boake amy i Babilona Lahibey ao
Vakio ty Lioka 4:8 naho ty Apokalypsy 18:4, 5, sady valeo ty fagnonteneagne retoa naho fa avy eo:
-
Mbe voasoratse amo o fivavahan-disò agne vao ty agnarako?
-
Agnate ty fikambanagne misy ifandrambesa’e amy ty fivavahan-diso vao raho?
-
Manohagne o fivavahan-disò vao ty asa ataoko?
-
Mbe misy ifandrambesa’e amo o fivavahan-disò vao ty raha ila’e ataoko?
-
Naho misy eka ty vale’e amy ireo, le ino ty fiovagne toko’e hataoko?
Ndra inogn’ino ty fanapahan-kevetse rambese’o, le anò azo antoke soa tie hampilamigne ty eretsere’o i rahay sady mampiseho tie tsy mivalike amy i Jehovah rehe.
Ino ty toko’e hatao’o naho ampagnomeigne vola rehe mba hanohagnagne ty asa atao o fivavahagneo?
MISY TY MIREHAKE TIE: “Aleo fantareko hey ty raha rehafe o mpivalim-pinoagneo miomba ty Vavolombelo i Jehovah amy izay raho miaro ty hamarenagne.”
-
Fahendreagne vao zay? Ino ty anto’e?
FAMINTIGNAGNE
Tsy hivalike amy i Jehovah tikagne naho tsy mifandrambe amy ze ndaty mivalike ama’e. Tsy toko’e hifandrambe amo o fivavahan-disò ka tikagne.
Fameregnagne
-
Nagnino tikagne ro tsy toko’e hagnente, ndra hamaky ndra hitsanogne ty fampianara o mpivalim-pinoagneo?
-
Akore ty toko’e ho findesantikagne ze ndaty miala tsy ho Vavolombelo i Jehovah sasa?
-
Akore ty ampisehoantikagne tie, tena magnalavitse ze raha misy ifandrambesa’e amo o fivavahan-disò tikagne?
FAGNAZAVAGNE FAGNAMPE’E
Ino ty toko’e hatao’o naho misy ndaty mampiparitake vande miomba ty Vavolombelo i Jehovah?
“Mamantatse Soa ty Raha Tena Misy vao Rehe?” (Fitalakesan-davitse Aogositra 2018)
Akore ty hahafantara’o tie misy ifandrambesa’e amy i Babilona lahibey ty fikambanagne ndra ty asa raike?
Ino ty natao ty mpanohetse ila’e mba hampihegnagne ty finoantikagne?
Ino ty nahavy ty pretra shintoista toy hiala amy ty fivavahan-diso?
“Magnova Ndaty ty Baiboly” (Fitalakesan-davitse 1 Jolay 2011)
Va'e ho Tea'o Ka
FAGNONTENEAGNE FAPETRA O NDATIO
Inogne ty Atao Tihoe Fianaragne Baiboly?
Afake mampiasa ze Baiboly tea’o rehe naho fa mianatse Baiboly amy ty Vavolombelo i Jehovah. Maimaimpoagne i fianaragney sady afake taone’o hiarake hianatse ama’o ka ty keleia’o ndra ty ragne’o.
