Mam Ikristayon lukabeit ecamakinete idiobore arai idiotunganan aitukurworit kes aima Yawe. Kijeni ebe epone ngope ngon ipupio jo da. Eyait Yawe amunoonutukon kwape ibore yenepol noi. (Kosiom 1 Aisiitonokin 28:9.) Ani bo ejautene loepedori aitem amunoonutukon, ido epone ani ipedoria ijo aipikor?

1. Epone ani epedoriata luce aitem amunokinawok neejai Yawe?

Epedorete icetunga aitam aitukurwor oni aijaanakin Yawe. Lu bo angai aticepak epedorete aswam ngun? Ice kotoma kaluajalata abeit isiarakinitos nukaisab nuikamunitos atukot naka Edeke kanu ainakin oni aijal aiyuuniwok. Enyaritai kesi luapaasi kotoma abeit. Bobo da, isiarakinitos icengarenok luka idiinin akiro nukaisab nuainakisi ice kalumam ecoito koinacanawok ajalakin abeit. Erai ibore yenerono noi oni einer arai bo epeget keda luapaasi kotoma abeit, arai bo nat aisiom itaabonokec, aipejonokin elagokec, ka aite ibidion luitolomunitos kesi. Inera nuikamunitos ngul lueutasi aitapaar luce kotoma aijaanakin Yawe, abala Yesu ebe: ‘Kinyeis ngul; eraas ikengarenok lumudukiok, arai emuduk ingarenikini emuduk, ibirokinos kere iarei toma aipany.’​—Matayo 15:14.

Do bo arai eseu idiotunganan yenijeni oni ajalakin aijaanakin Yawe? Erai ibore yenitipipili noi arai keseu itunganan yenenaikina kaoni aswam ngun. Epedori itunganan ngin aitam abuikin oni da ajalakin Yawe kasodete atupaar nges. Ibusakinit oni asalakinit imunokina Yawe adepar amunokina idiotunganan. (Matayo 10:37) Kanuangun, ekot oni aitup nuicorakinit Yawe mam aimorianakin keda luikote nen.​—Kosiom 1 Ikorinton 5:11.

2. Anu bo aseuneta nuepedorete aitem amunokinawok neejai Yawe?

Amin Yawe, ingarakini oni aseun aisac aiswamanara keda idiinin lukaisab. Ekot oni aisac adioswam kere, arai adiotukot ka idiobore kere yenimoriarit idiinin lukaisab. Ikwenyakinit Yawe oni ebe: “Ikatunga, kolomutu [kotoma Babulon Nakapolon].”​—Apukokinio 18:2, 4.

 KISISIAU NUIPU

3. Kocoite esisianakinak lukaisab

Anyoika bo nuibusakinit oni aswam arai kipupu oni akiro nueroko nuinerasi itunga kanuikamunitos atukot naka Yawe? Kosiom Awaragasia 14:15, kosodete aimor aingiset nata:

• Kanuinyo mam ibusakinitor oni aiyuun kanginikirot kere naipupuni oni?

Kosiom 2 Yokana 10, kosodete aimor aingiseta nuta:

• Epone ani ibusakinitor oni ayait ngul luapaasi kotoma abeit?

• Epone ani aticepak ipedoria oni atereikin keda aisisianakineta nuka kaluapaasi kotoma abeit karaida mam oni iriamuna kakes ikulepek?

• Iwomit ijo epone ani epupio Yawe arai itoikinit oni aki neejaasi akiro nueroko nuinerasi itunga aitoronitor ngesi keda aketukot?

4. Osalak imunokina Edeke kediaka idiopet koinacan

Anyoika bo nuibusakinit ijo aswam kingicu ijo ebe eswamau idiopet koinacan adiakaret naerono noi? Kisisiau kotoma aicoretait naidumakini oni Okisila luainakinit Edeke Isiraelin. Kosiom Ilebin 5:1.

Kwape icorakinitere kokokoro kangol, arai kisisiau oni ebe iswamaunit idiopet koinacanawok aronis naepol, ibusakinit oni alimokin imakio akiro nuijenu oni. Eroko oni kiswamauna ngun, edolit oni ber aige alimokin yeniswamat aronis kolimok imakio nuiswamat ngesi. Kenger ngesi atupakin ngun, ibusakinit amunokinawok neejai Yawe ainakin oni adolokin imakio kanu aitejenikin kes aronis naiswamat ngesi. Kiswama oni kwangin, epone ani itoduniata ngun ebe imunokina oni . . .

• Edeke Yawe?

• itunganan yenadiaka?

• luce da kotoma atukot?

 5. Kosac Babulon Nakapolon

 NUIDAU AISISIAUN

Kanu asalakinit imunokina Yawe, ibusakinit oni aisac aupa kangul lumam emunokina nges. Ibusakinit bobo oni ajalakin idiinin lukaisab.

Ainyogoor

• Kanuinyo mam ibusakinitor oni asesen, aisiom, arai bo aipup nuinerasi ngul luapaasi kotoma abeit?

• Epone ani ibusakinitor oni ayait ngul lumam bobo ekotosi araut Ajenak Luka Yawe?

• Epone ani ipedoria oni arimaar aikwenyaret naebala ebe konyoutu kotoma odiinin lukaisab?