Hindi hahayaan ng mga tunay na Kristiyano na sirain ng anuman o sinuman ang kaugnayan nila kay Jehova. Siguradong ganiyan din ang nararamdaman mo. Pinapahalagahan ni Jehova ang katapatan mo. (Basahin ang 1 Cronica 28:9.) Sa anong mga sitwasyon puwedeng masubok ang katapatan mo sa kaniya, at ano ang makakatulong sa iyo?

1. Paano puwedeng masubok ang katapatan mo kay Jehova?

Sinusubukan ng ilang tao na pahintuin tayo sa paglilingkod kay Jehova. Sino ang gagawa nito? Ang ilan sa mga huminto na sa paglilingkod kay Jehova ay nagsasabi ng kasinungalingan tungkol sa organisasyon ng Diyos. Gusto nilang sirain ang pananampalataya natin. Tinatawag silang mga apostata. Nagkakalat din ng maling mga impormasyon tungkol sa atin ang mga lider ng relihiyon. Gusto kasi nilang ilayo sa katotohanan ang mga lingkod ni Jehova nang hindi namamalayan ng mga ito. Mapanganib kung makikipag-usap tayo sa kanila, magbabasa ng aklat o blog nila, magpupunta sa kanilang website, o manonood ng mga video nila. Tungkol sa mga gustong sumira sa katapatan natin kay Jehova, sinabi ni Jesus: “Pabayaan ninyo sila. Sila ay bulag na mga tagaakay. At kung isang taong bulag ang umaakay sa taong bulag, pareho silang mahuhulog sa hukay.”​—Mateo 15:14.

Paano kung may kakilala tayo na ayaw nang maging Saksi ni Jehova? Napakasakit nito, lalo na kung malapít siya sa atin. Baka papiliin niya tayo: siya o si Jehova? Dapat na determinado tayong manatiling tapat sa Diyos. (Mateo 10:37) Kaya sinusunod natin ang utos ni Jehova na huwag makisama sa gayong mga tao.​—Basahin ang 1 Corinto 5:11.

2. Anong mga desisyon o sitwasyon ang puwedeng sumubok sa katapatan natin kay Jehova?

Dahil mahal natin si Jehova, iiwasan nating masangkot sa huwad na relihiyon. Kaya dapat na walang koneksiyon o kaugnayan sa huwad na relihiyon ang trabaho natin, organisasyong sinasalihan natin, o anumang gawain natin. Nagbabala si Jehova: “Lumabas kayo sa [Babilonyang Dakila], bayan ko.”​—Apocalipsis 18:​2, 4.

 PAG-ARALAN

3. Mag-ingat sa mga huwad na guro

Ano ang dapat na maging reaksiyon mo kapag may narinig kang negatibo tungkol sa organisasyon ni Jehova? Basahin ang Kawikaan 14:15. Pagkatapos, talakayin ang tanong na ito:

• Bakit hindi tayo dapat maniwala sa lahat ng naririnig natin?

Basahin ang 2 Juan 10. Pagkatapos, talakayin ang mga tanong na ito:

• Paano natin dapat pakitunguhan ang mga apostata?

• Kahit hindi tayo direktang nakikipag-usap sa mga apostata, paano tayo puwedeng maimpluwensiyahan ng mga turo nila?

• Ano kaya ang mararamdaman ni Jehova kung makikinig tayo sa mga sinasabi nilang negatibo tungkol sa kaniya at sa organisasyon niya?

4. Manatiling tapat sa Diyos kapag nagkasala ang isang kapatid

Kung malaman natin na nakagawa ng malubhang kasalanan ang isang kapatid sa kongregasyon, ano ang dapat nating gawin? Tingnan ang isang prinsipyo mula sa Kautusan ng Diyos sa sinaunang Israel. Basahin ang Levitico 5:1.

Gaya ng sinasabi sa teksto, kung malaman natin na nakagawa ng malubhang kasalanan ang isang kapatid, dapat natin itong sabihin sa mga elder. Pero bago natin ito gawin, makakabuting payuhan siya na ipagtapat sa mga elder ang nagawa niyang kasalanan. Pagpapakita ito ng kabaitan sa kaniya. Kung hindi niya ito gagawin, sasabihin natin sa mga elder ang ginawa niya kasi tapat tayo kay Jehova. Paano nito ipinapakita ang tapat na pag-ibig natin . . .

• sa Diyos na Jehova?

• sa taong nagkasala?

• sa iba pa sa kongregasyon?

 5. Manatiling hiwalay sa Babilonyang Dakila

 SUMARYO

Para manatiling tapat kay Jehova, kailangan nating iwasan ang mga taong hindi tapat sa kaniya. Kailangan din nating lubusang humiwalay sa huwad na relihiyon.

Ano ang Natutuhan Mo?

• Bakit hindi tayo dapat manood, magbasa, o makinig ng anumang mula sa mga apostata?

• Paano natin dapat pakitunguhan ang mga ayaw nang maging Saksi ni Jehova?

• Paano natin masusunod ang babala na tumakas sa huwad na relihiyon?