SAMBIRU 58
Lutirizgani Kuja Akugomezgeka Kwaku Yehova
Akhristu auneneska akhumba cha kuti chinthu pamwenga munthu weyosi watimbanyizgi ubwezi wawu ndi Yehova. Tikayika cha kuti ndivu namwi mukhumba. Yehova wakondwa ukongwa asani mulutirizga kuja akugomezgeka. (Ŵerengani 1 Mbiri 28:9.) Kumbi ndi vinthu wuli vo vingachitiska kuti muleki kuja akugomezgeka kwaku Yehova, nanga mungamalana navu wuli?
1. Kumbi ndi vinthu wuli vo ŵanthu anyaki angachita kuti muleki kuja wakugomezgeka kwaku Yehova?
Ŵanthu anyaki angayesesa kuti atilekesi kuteŵete Yehova. Kumbi mbayani wo angachita venivi? Ŵanthu anyaki wo akuleka uneneska akamba maboza ngakukwaskana ndi gulu laku Chiuta kuti anangi chivwanu chidu. Ŵanthu ŵenaŵa adanika kuti ampatuku. Pe so alongozgi anyaki a visopa wo akamba maboza ngakukwaskana ndi gulu lidu kuti apusisi ŵanthu ambula kukho mu uneneska. Kukambiskana ndi ŵanthu wo asuska gulu lidu, kuŵerenga mabuku ngawu, kusere pa mawebusayiti ngawu pamwenga kuwonere mavidiyo ngo apanga, nkhwakofya ukongwa. Pakukamba vakukwaskana ndi ŵanthu wo agongowesa anyawu kuti aleki kuteŵete Yehova mwakugomezgeka, Yesu wanguti: “Alekeni ŵaka, mbalongozgi achibulumutiya. Asani wachibulumutiya walongozga wachibulumutiya munyaki, wosi ŵaŵi abirengi muzenji.”—Mateyu 15:14.
Kweni wuli asani munthu munyaki yo titimuziŵa, wasankha kuti wajengi so Kaboni waku Yehova cha? Vingatiŵaŵa ukongwa asani mubali widu pamwenga mubwezi widu ndiyu wachita venivi. Venivi vingachitiska kuti tisankhepu kuja wakugomezgeka kwaku iyu pamwenga kwaku Yehova. Kweni tikhumbika kusimikiza mtima kuti tilutirizgengi kuja wakugomezgeka kwaku Chiuta. (Mateyu 10:37) Tikhumbika kuvwiya dangu laku Yehova lakuti tingachezanga nawu cha ŵanthu a viyo.—Ŵerengani 1 Akorinto 5:11.
2. Kumbi vo tisankha vilongo kuti te akugomezgeka kwaku Yehova?
Chifukwa chakuti titanja Yehova, tingachitaku cha chinthu chechosi chakukwaskana ndi visopa vaboza. Mwaviyo, tikhumbika cha kusere ntchitu, magulu pamwenga mawupu ndipuso kuchitaku chechosi cho chikoliyana ndi visopa vaboza. Yehova watititcheŵeska kuti: ‘Tuwanimu [mu Babiloni Mukulu], mwaŵanthu ŵangu.’—Chivumbuzi 18:2, 4.
SAMBIRANI VINANDI
Wonani vo mungachita kuti munthu weyosi waleki kukutondekesani kuja wakugomezgeka kwaku Yehova. Wonani so mo mungalongore kuti mwe akugomezgeka mwakutuwa mu Babiloni Mukulu.
3. Phweriyani ndi ŵanthu wo asambiza vaboza
Kumbi tikhumbika kuchita wuli asani tavwa vinthu vaboza vakukwaskana ndi gulu laku Yehova? Ŵerengani Nthanthi 14:15, pavuli paki kambiskanani fumbu ili:
-
Ntchifukwa wuli tikhumbika cha kugomezga chechosi cho tavwa?
Ŵerengani 2 Yohane 10, pavuli paki kambiskanani mafumbu yanga:
-
Kumbi tikhumbika kuchita nawu wuli ampatuku?
-
Chinanga kuti nyengu zinyaki tingakambiskana nawu masu ndi masu cha ŵanthu ampatuku, kumbi ndi nthowa zinyaki nizi zo tingayamba kuvwisiya vo yiwu asambiza?
-
Kumbi muwona kuti Yehova wangavwa wuli asani tingayamba kuvwisiya nkhani zaboza zakukwaskana ndi iyu kweniso gulu laki?
4. Lutirizgani kuja akugomezgeka kwaku Chiuta asani Mkhristu munyinu wachita ubudi
Kumbi tikhumbika kuchitanji asani taziŵa kuti munthu munyaki mumpingu wachita ubudi ukulu? Wonani fundu yo yisanirika mu Dangu lo Chiuta wangupaska Ayisirayeli. Ŵerengani Levitiko 5:1.
Nge mo lemba ili lakambiya, asani taziŵa kuti Mkhristu munyaki wachita ubudi ukulu, tikhumbika kukambiya ŵara. Kweni techendachiti venivi, tingalongo chanju asani tingamuchiska munthu yo wachita ubudi kuti waluti ku ŵara kuti wakasumuwi yija. Asani iyu watondeka kuŵakambiya ŵara, isi tikhumbika kuŵakambiya chifukwa tikhumba kuja wakugomezgeka kwaku Yehova. Kumbi kuchita venivi kulongo wuli kuti titanja . . .
-
Yehova Chiuta?
-
munthu yo wabuda?
-
ŵanthu wosi mumpingu?
Asani Mkhristu munyinu wabuda, mukhumbika kumuwovya!
5. Tuwani mu Babiloni Mukulu
Ŵerengani Luka 4:8 ndipuso Chivumbuzi 18:4, 5, pavuli paki kambiskanani mafumbu yanga:
-
Kumbi mwechendasisitisi zina linu ku chisopa chaboza?
-
Kumbi mukusere wupu wewosi wachisopa chaboza?
-
Kumbi mugwira ntchitu ku chisopa chechosi chaboza pamwenga ku wupu wo ngwachisopa chaboza?
-
Kumbi pe chinthu chinyaki chechosi pa umoyu winu cho muwona kuti chikoliyana ndi chisopa chaboza?
-
Asani lilipu fumbu lo mwamuka kuti hinya pachanya yapa, kumbi ndi vinthu wuli vo mukhumbika kusintha?
Asani musankha vakuchita, muwonesesengi kuti vo musankha vikuwovyeningi kuti muje ndi njuŵi yamampha kweniso kuti muje akugomezgeka kwaku Yehova.
Kumbi mungachita wuli asani mungapempheka ndalama zakuti ziwovyi chisopa?
ŴANTHU ANYAKI AKAMBA KUTI: “Ndikhumbika kuziŵa vo ampatuku akamba vakukwaskana ndi Akaboni aku Yehova kuti ndifiski kuvikiliya uneneska.”
-
Kumbi muwona kuti nkhwamampha kuchita venivi? Ntchifukwa wuli muwona viyo?
KUMBI MWASAMBIRANJI?
Kuti tilutirizgi kuja akugomezgeka kwaku Yehova, tikhumbika cha kuchita vinthu ndi ŵanthu wo mbambula kugomezgeka kwaku iyu. Tikhumbika so kutuliyamu limu mu chisopa chaboza.
Kuweriyamu
-
Ntchifukwa wuli tikhumbika cha kuwonere, kuŵerenga pamwenga kuvwisiya fundu za ŵanthu ampatuku?
-
Kumbi tikhumbika kuchita nawu wuli vinthu ŵanthu wo asankha ŵija kuleka kuja Akaboni aku Yehova?
-
Kumbi tingachita wuli kuti tilongo kuti tivwiya dangu lakuti tituwi mu chisopa chaboza?
FUFUZANI
Wonani vo mungachita asani ŵanthu anyaki akamba maboza ngakukwaskana ndi Akaboni aku Yehova.
“Kumbi Mwe ndi Ukaboni?” (Chigongwi cha Alinda, August 2018)
Kumbi mungangaziŵa wuli mawupu pamwenga vakuchitika vo vikoliyana ndi Babiloni Mukulu?
Kumbi ndi vinthu wuli vinyaki vo ŵanthu akususka achita kuti atimbanyizgi chivwanu chidu?
Mu nkhani ya mutu wakuti “Ndingwamba Kupenja Chiuta Kutuliya Ndeche Mwana,” ŵerengani vakukwaskana ndi wasembi munyaki wa Chishinto yo wanguleka chisopa chaboza.
“Bayibolu Lisintha Ŵanthu” (Chigongwi cha Alinda, July 1, 2011)
Mungayanja Kuŵerenga so Nkhani Izi
MAFUMBU NGO ŴANTHU AFUMBA KAŴIKAŴI
Kumbi Sambiru la Bayibolu lo Akaboni aku Yehova Achitiska Ntchinthu Wuli?
Kuziya mu pulogilamu yawezi ya kusambira Bayibolu ndi Akaboni aku Yehova, mungagwiriskiya ntchitu Bayibolu lelosi. Mungadaniyaku banja linu losi pamwenga mabwezi nginu pa sambiru.
