DJONDZO 58
Tshama Na U Tshembekile Ka Yehovha
Vakreste va ntiyiso va tinyimiselile ku kala va nga pfumeleli nchumu kumbe munhu swi va tshikisa ku tirhela Yehovha. A hi kanakani swaku na wena u titwisa xileswo. Ka Yehovha i swa lisima kuva u tshama na u tshembekile. (Lerha 1 Tikronika 28:9.) I mpsini leswi swi nga yentxaka swi ku karhatela ku tshama na u tshembekile? Naswona i mpsini swi nga ku pfunaka?
1. Vanhu van’wana va nga ku ringisa ku yini ku tshembeka ka hina ka Yehovha?
Vanhu van’wana va ta zama ku hi yentxa hi tshika ku tirhela Yehovha. Kasi i vamani lava nga yentxaka swoleswo? Vanhu van’wana lava va nga tshika ntiyiso, va vulavula mavunhwa hi nhlengeletanu ya Xikwembu swaku va hi yentxa hi heleliwa hi lipfumelo. Vanhu lava mahaka leswo va vitaniwa swaku i vaduki. Vafundhisi va hangalasa mavunhwa hi hina swaku va hi yentxa hi tshika ntiyiso. Swi ni nghozi ku zama ku bula ni lava va vulavulaka ku biha hi hina, ku lerha mabuku ya vona, ku nghena ka ma site ya vona kumbe ku sixtira mavhidiyo ya vona. Nkama Yesu a nga khuluma hi lava va zamaka ku hi yentxa hi tshika ku tirhela Yehovha a te: “Va tshikeni. I vakongomisi lava nga fa matihlo. Phela loko munhu lweyi a nga fa matihlo a kongomisa munhu lweyi a nga fa matihlo, hinkwavu va vambirhi va ta wela xikheleni.” — Matewu 15:14.
Hi nga ku yini loko munhu lweyi hi mu tivaka a tshika ku va Mboni ya Yehovha? Phela swi nga hi vava loko munhu lweyi hi mu rhandzaka a yentxa leswo. Munhu yelweyo a nga hi sindzisa swaku hi langa xikarhi ka yena na Yehovha. Hi fanele hi tama hi tshembeka ka Yehovha ka swilo hinkwaswu. (Matewu 10:37) Hi mhaka leyo, hi yingisa nawu wa Yehovha wa kuva hi nga vulavuli ni vanhu lava mahaka leswo. — Lerha 1 Vakorinto 5:11.
2. Hi swini swiboho leswi nga ha ringaka ku tshembeka ka hina ka Yehovha?
Ku rhandza Yehovha swi ta hi pfuna swaku hi nga tipatsi ni wukhongeli la mavunhwa. Leswo swi vula swaku a hi tinghenisi ka tinhlengeletanu leti yelanaka ni wukhongeli la mavunhwa. Hambi hi ntirho lowu hi wu mahaka kumbe swin’wana a swi fanelanga swi fambisana ni wukhongeli la mavunhwa. Yehovha a li: “Humani ka [Babilona wa Mukulu], n’wina vanhu va mina”. — Nhlawutelo 18:2, 4.
DJONDZA SWIN’WANA
Vona swaku u nga maha yini swaku u nga pfumeleli munhu a ku tshikisa ku tshembeka ka Yehovha. Tlhela u vona swaku u nga swi kombisa ndjani swaku wa tshembeka hi ku huma ka Babilona wa Mukulu.
3. Tivoneli ka vadjondzisi va mavunhwa
Hi fanele hi maha yini loko hi twa swa ku biha hi nhlengeletanu ya Yehovha? Lerhani Swivuriso 14:15, mi gama mi bula hi xivutiso lexi landzelaka:
-
Hi mhaka muni hi fanele hi tivonela ka ku kholwa xin’wana ni xin’wana lexi hi xi twaka?
Lerhani 2 Yohani 10, mi gama mi bula hi swivutiso leswi landzelaka:
-
Hi fanele hi va khoma ndjani vaduki?
-
Ha swi tiva swaku a hi swinene kuva hi khuluma ni vanhu lava va nga duka. Kambe i mpsini va nga swi tirhisaka swaku hi kholwa leswi va swi vulaka?
-
U pimisa swaku Yehovha a titwisa ku yini loko hi tshamela ku yingisela minchumu ya ku biha leyi va yi vulaka hi yena ni nhlengeletanu ya yena?
4. Tama u tshembeka ka Xikwembu loko makwerhu abandleni a djoha
I mpsini leswi hi faneleke hi swi yentxa loko hi tsumbula swaku ku ni munhu lweyi a nga yentxa xidjoho xa xikulu abandleni? Vona leswi Xikwembu xi nga swi byela Vayisrayele khale. Lerhani Levhitika 5:1.
Hi ku ya hi ndzimana leyi, loko hi tsumbula swaku ku ni lweyi a nga yentxa xidjoho xa xikulu, hi fanele hi byela madoda ya bandla. Kambe i swinene swaku hi sungula hi ku byela munhu wa kona leswaku a ya vulavula ni madoda hi xidjoho xa yena. Se loko a nga pfumeli ku ya vulavula ni madoda, hina hi ta tshembeka ka Yehovha hi ku famba hi ya ma byela leswi hi swi tivaka. Loko hi maha leswo, hi swi kombisa ndjani swaku ha mu rhandza . . .
-
Yehovha Xikwembu?
-
munhu lweyi a nga djoha?
-
ni vamakwerhu van’wana abandleni?
Loko makwerhu a li nghozini, mu pfuni!
5. Huma Hi Ku Helela Ka Babilona Wa Mukulu
Lerhani Luka 4:8 na Nhlawutelo 18:4, 5, mi gama mi bula hi swivutiso leswi landzelaka:
-
I nga va swaku na ha lumba wukhongeli la mavunhwa leli a ni li ka lona? Ni timisile vito la mina?
-
Ku nga va swaku ni le ka nhlengeletanu leyi yelanaka ni wukhongeli lin’wana?
-
Indje ntirho wa mina wu seketela wukhongeli la mavunhwa hi ndlela yo karhi?
-
Ku ni minchumu yin’wana leyi ni yi yentxaka ka wutomi la mina leyi fambisanaka ni wukhongeli la mavunhwa ya ku ni fanele ni yi tshika?
-
Loko swi ku nhlamulu ya mina i ina, i mpsini leswi ni faneleke ni swi yentxa swaku ni txintxa?
Ka swilo hinkwaswu, yentxa swiboho leswi swi nga ta yentxa swaku u va ni lipfalu leli baseke, u tlhela u kombisa swaku wa tshembeka ka Yehovha.
A wu ta yentxa yini loko a vo ku kombela kuva u nyikela male swaku yi pfunisa ka mintirho yin’wana ya wukhongeli la mavunhwa?
VAN’WANA VA LI: “Ni lava ku tiva leswi vanhu lava nga duka va swi vulaka hi Timboni ta Yehovha swaku ni kota ku nyimelela ntiyiso.”
-
Indje i swinene ku maha leswo? Hi mhaka muni?
LESWI HI NGA SWI DJONDZA
Hi lava ku tama hi tshembeka ka Yehovha. Hi mhaka leyo, a hi fanelanga hi tipatsa ni lava va kalaka va nga tshembeki ka yena. Funtshi hi fanele hi tihambanisa hi ku helela ni wukhongeli la mavunhwa.
Ku kambela leswi hi nga swi djondza
-
Hi mhaka muni hi nga fanelanga hi sixtira, hi lerha, kumbe ku yingisela leswi vuliwaka hi vaduki?
-
Hi fanele hi va vonisa ku yini vanhu lava va kalaka va nga ha swi lavi ku va Timboni ta Yehovha?
-
Hi nga wu yingisa ndjani nawu wa leswaku hi fanele hi huma ka wukhongeli la mavunhwa?
LOKO U LAVA KU TIVA SWIN’WANA
Vona leswi u nga swi mahaka loko vanhu van’wana va vulavula mavunhwa hi Timboni ta Yehovha.
“Xana U Na Vuxokoxoko Hinkwabyo?” (Murindzi wa Agosto wa 2018 hi Xitsonga)
U nga swi tivisa ku yini swaku nhlengeletanu kumbe ntirho swi seketela Babilona wa Mukulu?
I mpsini leswi vanhu van’wana va swi yentxaka swaku va zama ku helisa lipfumelo la hina?
Lerha xiperiyensiya lexi nge: “Ndzi Lave Xikwembu Ku Sukela Loko Ndza Ha Ri Ntsongo,” leswaku u vona leswi mufundhisi mun’wana wa Mushinto a nga swi yentxa swaku a tshika wukhongeli la mavunhwa.
“Bibele Yi Hundzula Vutomi Bya Vanhu” (Murindzi wa 1 ka Julho wa 2011 hi Xitsonga)
