Jurhimbiti Kristianuechachi sési eratsekata jatsiskia no méni jurajkuni eska ambe ma o eska nema uaaka eskachi nóteru marhuakuakia Jeobani. Seguruchi jarhaska eskajtsï chá ísï pʼikuarherasïnga ka Jeoba kánikua jukaparharasïndi engajtsï eratsekata jatsikia no méni jurajkuni (arhinta je 1 Crónicas 28:9). ¿Ambe úpirini jarhani engajtsï jimbo úkua jukanchapiringa parajtsï no jurajkuni Tata Diosïni? ¿Ka nénajtsï uaa orhepani uérani?

1. ¿Ambeksï úpirini úni máteruecha enga úpiringa úni eskachi jurajkuaka Jeobani?

Máru kʼuiripuechaksï jánguarhintaati úni ambe ma parachi jucha jurajkuni Jeobani. ¿Néksï úpirini i jásï ambe? Máru kʼuiripuecha engaksï jurajkukia jurhimbikuani, chkuanderakua ambeksï uandasïndi Tata Diosïri kúnguarhikueri ambe paraksï úni eskachi jurajkuaka Tata Diosïni. I kʼuiripuechaksï jindeesti apostatecha. Ístuksï jarhasti relijionirhu anapu orhejtsïkuticha engaksï chkuanderakua ambe etsakujka paraksï úni eskaksï máru jurajkuaka jurhimbikuani. Kánikuajtsïni no sési úchipirindi engachi jucha arhiantapiringa libruechani o engachi inchapiringa Internetirhu o exeani bideuechani ima kʼuiripuecheri engaksï ikiakujka Tata Diosïri iretani. Uandaparini imeecheri ambe engaksï uékapiringa úni eskachi jurajkuaka Tata Diosï Jeobani, Jesúsi uandaspti: “Jurajkua je imeechani. Sieguestiksï engaksï orhekupaajka máteru sieguechani, ka enga ma siegu orhekupaaka máteru sieguni, tsimarhanksï uarhinhiati posurhu” (Mateu 15:14).

¿Ka ambe úkuarhisïni enga nema engachi jucha míteka jurajkujka Tata Diosï Jeobani? Enga i ambe úkuarhijka nema jingoni engachi jucha sési míteka, úpirindijtsïni kánikua no sési pʼikuastani. Jamberi ima kʼuiripu uékaati eskachi erakuaka: imani chúxapani, o seguirini Jeobani marhuakuni. Peruchi jucha sési eratsekata jatsiskia no méni jurajkuni Tata Diosïni ambe uéjki úkuarhini (Mateu 10:37). Ísï jimbochisï kurhajchajka Tata Diosï Jeobaeri juramukuani enga uandajka eskachi nóteru pájperaakia imani kʼuiripu jingoni (arhinta je 1 Korintu 5:11).

2. Máru ambe engachi erakujka úni, ¿néna úpirini úni eskachi jurajkuaka Jeobani?

Kánikuachi xénchasïnga Jeobani jimbochisï no jatsika para imani ambe úni engaksï relijioni no jurhimbiticha újka. Juchaari ánchikuarhita ka imani kúnguarhikuecha jimbo engachi jaka no jatsisti para imani ambe úni engaksï relijioni no jurhimbiticha újka. Jeoba ini ambe arhisïndi imeeri iretani: “Uéakunta je indeni iretarhu”, jo, eskachi uéakuntaaka K’éri Babiloniarhu uératini (Jaŋaskuecha 18:2, 4).

 JORHENGUARHI JE SÁNDERU AMBE

3. Xéparini je imeecha jingoni engaksï no jurhimbitku jorhentpijka

¿Ambechi jatsiski para úni engachi ma repentku kurhaaska eska nema no sési ambe uandaska Jeobaeri kúnguarhikueri ambe? Arhinta je Proverbios 14:15 ka uandontskuarhi je íri ambe:

• ¿Andichisï jatsi para jingontku jarhani ka no jakajkuni iámu ambe engachi kurhauaka?

Arhinta je 2 Juanu 10 ka uandontskuarhi je íri ambe:

• ¿Nénachi jatsiski para exeani apostatechani?

• Nájkirukachi no uandontskuarheaka apostata ma jingoni, ¿nénajtsïni úpirini no sési úchini ambe engaksï imeecha eratsejka?

• Engachi kurhajchauaka imeechani engaksï no sési ambe uandani jauaka Jeobaeri ambe o imeeri kúnguarhikueri ambe, ¿na pʼikuarheraa Jeoba?

4. Asï jurajku je Tata Diosïni enga erachi ma pekadu ma úska

Engachi míteska eska nema kúnguarhikuarhu k’éri pekadu ma úska, ¿ambe erokuarhisïni Tata Diosï eskachi uaaka? Jorhenguarhi je prinsipiuni ma enga imani Lei jimbo jaka enga Tata Diosï ióntki anapu Israelini íntskupka. Arhinta je Levítico 5:1.

Eska na uandajka i bersikulu, engachi jucha míteaka eska nema k’éri pekadu ma úska, jatsiskachi para nirani orhejtsïkutichani aianguani ambe engachi míteka. Ísïisti, ante dechi úni i ambe, pʼamojperatachi xarhatani japiringa engachi arhipiringa imani kʼuiripuni enga pekadu úka, eska niuaka orhejtsïkutichani jingoni uandontskuarheni ka eska aianguauaka ambe enga úka. Peru enga ima no ísï úska, jimajkani juchachi aianguauaka erachichani parachi xarhatani eskachi uékasïnga Jeobani. Engachi ini ambe úpiringa, ¿andichisï xarhatani japirini uékperakua ka eskachi no méni jurajkuaka...

• ... Jeobani?

• ... kʼuiripuni enga pekadu úka?

• ... kúnguarhikuani?

 5. Jarhari je Kʼéri Babiloniani

 AMBE ENGACHI JORHENGUARHIKA

Parachi no méni jurajkuni Tata Diosï Jeobani, nóchi jatsiska para kúrhiani imeechani engaksï nóteru uéjkia marhuakuni Tata Diosïni. Ístuchi jatsiska para jarharini iámu ambe jimbo relijioni no jurhimbitini.

Ambejtsï jorhenguarhiski

• ¿Andichisï no jatsi para exeni, arhintani o kurhaani ambe engaksï apostatecha uandajka?

• ¿Nénachi jatsiski para exeani imeechani engaksï nóteru uékajkia Jeobani marhuakuni?

• ¿Ambechi jatsiski para úni parachi kurhajchani juramukuani enga uandajka eskachi jatsiska para jarhariani relijioni no jurhimbitichani?