Jee maaga da Jeofa oo go ngiŋ maaga fẽn po, noga jobo mo caa holaŋ se go de Jeofa wa. Sen go tinoo tu ga ndo de ɗiggi na ne lay. De deele ɓon de cõõre jag Jeofa debaŋ (Jaŋ 1 Kronig 28:9). Re maaga joŋ wo gayri maaga ndo mo hay de deele peel Jeofa wa diŋ maa hõn wo là? Day ndo oo jag ɓaara na ooge là?

1. Jar joŋ ge diŋ mayse maa caa holaŋ naa go de Jeofa là?

Jar maa po hẽg ge yaŋ wo ga saara maŋ jag naa go ti goŋge Jeofa. Day joŋ ge sen na wose là? Maapo ga diŋ jar maaga hay wo diŋ sedeewa Jeofa ti wurpo, day men wo goŋge ɓe go. Á car wo gete’ ne tayge maa ni Jeofan see maa hãy hãge ɓil naa. À ɗe ra ga aposta wo. Jar kluuri maa peel jag-Baa maa po car wo gete’ ne naa see, dus wo ne go ti ngeel ɓuy, nen maaga jar maaga bay wo go de ruggi wa mo men wo cwãyn go. Á bay de el koh mẽ’ maaga naa mo ndal de aposta wo wa, maaga naa mo jaŋ kefder ɓaara wo wa, maaga naa mo kal ɓil sid interned ɓaara noga ko kideyo ɓaara wo wa hase. Yeso wãã ti jar maaga hẽg wo ga saara woo do naa go ti goŋge Baa ga: “Men ra we, á wo rẽwre de ɗaw kããra jar rẽwre wo. Day je rẽw ɗaw je rẽw we no, á wo ge wo go laa ge ɓi tuu ɓog ɓuy”—Matiye 15:14.

Hayga bar naa, noga jee maa ɓi feele naa men goŋ Jeofa we go no, naa joŋ joŋge là? Sen bay diŋ re maa gus wa. Maapo ga jee ɓen wãã mo ga: “Ndo maŋ go yoo wùr de Jeofa boŋ.” Naa mo hay go de baa wer see naa maa lagge peel Jeofa de deele (Matiye 10:37). Jeofa wãã ga mopo mo tay naa de jar maa de maŋ sen wo wa. Naa hoo sug ti jag liŋgi se no.—Jaŋ 1 Korente wo 5:11.

2. Ɗiggi maaga naa far ra ngaɓ wo go na ngaɓge ga naa de deele peel Jeofa là?

Dage maaga naa da Jeofa kay naa yaŋ maa ɗeege go see fẽẽre maaga wo de maŋge see jag-Baa maaga bay wo ti ngeel ɓe wa mo ɓuy. Koh joŋre maaga naa joŋ, koh tayge jag maaga naa ni, noga joŋre maysela ɓuy maaga naa da joŋge ɓe mo hay de maŋge see jag-Baa po maaga bay ti ngeel ɓe wa wa. Jeofa go de ɓo’ sug naa ga: “Nday jar ɓi no, laa wee go [men wee Babilon maa kluun go]”—Naage nene 18:2, 4 [NWT].

 FRUGGI NEN HADGE NO

3. Ɗee go see jar maaga bay wo had cwãy wa mono

Hayga jobo wãã we ti tayge maa ni Jeofan ti jeŋ ɓo de baywoore no, ndo joŋ joŋge là? Jaŋ Jag jõõ wo 14:15, ni ndal wee ti wiigi jag maa blam la no:

• Wer mayse ga á bay de el maaga ndo mo hã ɓil ti wããre maaga ndo laa ra ɓuy wa là?

Jaŋ 2 Jaŋ 10 ni ndal wee ti wiigi jag maa blam la wo no:

• Naa mo hay joŋ see naa see aposta wo na joŋge là?

• Naa bay de dage ga ndalge mo tab naa de aposta wo wa. Amaa day maapo naa ma’ go ne wããre ɓaaran wo ti na ma’ge là?

• Day hayga naa co’ sug we laa gete’ maaga á caa wo ne Jeofa see, noga ne tayge maa ɓen see no, ndo ɗig na ga á co mbe yaŋ jag Jeofa?

4. Hayga jee maa ti tayge naa joŋ ɓlagge we lay?

Hayga naa laa we ga jobo yoo naa ti tayge joŋ ɓlagge maa kwũy no, naa joŋ mayse doole là? Ko jag liŋgi po maaga Baa hay hã ne weere Israyel wom ɗa. Jaŋ Joŋre jar Lefid wo 5:1.

Doo maaga versen wãã la ne mono, hayga naa laa we ga jobo joŋ ɓlagge maa kwũy no, naa wãã fẽn maaga naa de koge ɓe ne jar maa peel tayge wo. Amaa taŋgu sen mono; á de el maaga naa mo wii jee sen ga á mo wo sii ɓlagge ɓen ne jar maa peel tayge wo diŋ se de see ɓe tu. Hayga á day we ga no, de deele naa peel Jeofan srog glog naa maa sii fẽn maaga naa de koge ɓe go. Sen ɓo’ nen go na ɓo’ge ga naa de da . . .

• Jeofa Baa là?

• jee maaga joŋ ɓlaggen là?

• jar maa ti taygen wo là?

 5. Oo go see Babilon maa kluun hãã

 KLUURI HADGE NO

Maaga naa mo hay de deele peel Jeofa mono, daga naa mo hay tay de jar maaga ɓod wo cwããge naa ti lagge de deele peel Jeofa wa. Mopo mo tab naa de jag-Baa maaga bay wo ti ngeel ɓe wa wa has lay.

Ferge ko nen hadge no

• Wer mayse ga naa mo ko, mo jaŋ, noga mo co’ sug wããre aposta wo wa là?

• Naa de joŋ see jar maaga men wo goŋ Jeofan go na joŋge là?

• Naa joŋ joŋge maa hoo sug ti jag liŋgi maaga wãã ga naa mo ɗee go see jag-Baa maaga bay wo ti ngeel ɓe wa là?