Cido ce ristu ngecekutama kusiya kuti ciro cipi haco ciapingaidze kunamata Djehovha. Zviri pamhene kuti ndicona cido cenyuwo. Djehovha anopfara kana mukarumbwa mecimutsigira. (Erengai 1 Makoronika 28:9.) Pano migariro ye zviro ingamukanda pa muedzo wekusiya Djehovha. Mungaita kudini kana mukasongana no migariro yakadaro?

1. Anhu amweni anokwanisa kumuedza kudini kuti musiye Djehovha?

Anhu amweni anokwanisa kutiedza kuti tisiye kuseenzera Djehovha. Angaita anhu api? Kune anhu amweni akasiya cokwadi anobhuya masoko e kunyepa nge zve sangano ra Mwari ecida kuti aparadze kutenda kedu. Anhu awona akapandukira sangano ra Djehovha. Kupinda izvona, atungamiriri amweni e magereja anobararisa masoko e kunyepa nge zvedu kuitira kuti amweni asiyewo cokwadi. Kana tikaitirana nawo hasha, toerenga mabhuku awo kana kuti kubhuya nawo mu saite yawo ye pa internet, kana kuona mavhidhiyo awo, zvinokwanisa kutipingaidza. Djesu akabhuya nge zve anhu aya anoedza kubvisa anhu pakuseenzera Djehovha eciti: “Arekerei. Awona mapofo anotungamirira amweni. Kana bofo rikatungamirira bofo rimweni, ese ari airi acawira murindi.”—Mateu 15:14.

Hino zvakadini kana munhu watinoziya akasanangura kuti aacadi kugara umwe we Apupuri a Djehovha? Kana ari shamwari ye padhuze zvinotirhwadza maningi. Tinonga taakutodikana kusanangura kuti totsigira ani, pakati pake na Djehovha. Tinodikana kuda Mwari kupinda munhu upi hake. (Mateu 10:37) Hino tinoteerera nhungamiriro ya Djehovha yekusiya kushamwaridzana no munhu wakadaro.—Erengai 1 Akorinti 5:11.

2. Zvatinosanangura zvingakwanisa kupangidza kudini kuti tinotsigira Djehovha?

Kuda katinoita Djehovha kucaita kuti tisiye zvacose kunamata kekunyepa. Atiiti basa kana kupinda mune sangano rimweni rinotsigira kunamata kekunyepa. Djehovha anobhuya kuti: “Budai [mu Bhabhironi Guru], anhu angu.”—Zvakapangidzwa 18:2, 4.

 FUNDAI ZVAKAWANDA

3. Ngwarirai afundisi e kunyepa

Tinodikana kuitei kana tikazwa munhu umweni ecishora sangano ra Djehovha? Erengai Zvierengo 14:15, pedzepo cedzai nge zve mubvunzo unoteera:

• Ngei tecidikana kungwarira kuti tisandotendere zviro zvese zvatinozwa?

Erengai 2 Juau 10, pedzepo cedzai nge zve mibvunzo dzinoteera:

• Tinodikana kuitei no anhu akapandukira sangano?

• Kunyazi kana tikatama kureketa nawo pacawo, tingasongana kudini no zvaanofundisa?

• Mumaonero enyu Djehovha anozwa kudini kana tikapurutana munhu uri kureketa zvakashata nge zvake uye nge zve sangano rake?

4. Rumbwai muri kudii ra Djehovha kana pano hama inonga yaita citema

Tinodikana kuitei kana tikaziya kuti pano munhu we mu ungano unonga aita citema? Onai zvairekethwa no Mutemo wa Mwari waakapasa Aisraeri. Erengai Revhitiko 5:1.

Maererano no vhersikuro ii, kana tikaziya kuti pano munhu waita citema, tinodikana kubvunza akuru zvatinonga teciziya. Asi tisati tazviita, zvakanaka maningi kuti tibvunze munhu wakhona wakaita cishaishi kuti aende ega kopupura kuno akuru citema cake. Kana akaramba koabvunza, isusu ticapangidza kuti tinotsigira Djehovha ngekuenda koabvunza. Kuita izvona zvinopangidza kudini kuti tinoda . . .

• Djehovha Mwari?

• mushaishiwo?

• uye amweni ari mu ungano?

 5. Tambirai kure ne Bhabhironi Guru

 MUCIGWAGWA

Kuti tirumbwe tecitsigira Djehovha, tinodikana kusiyana ne anhu anopangidza kuti aaripi kudii rake. Tinodikanawo kusiyana zvacose nekunamata kemanyepo.

Mibvunzo yekuhwirinzira

• Ngei tisikadikani kuona, kuerenga, kana kupurutana zvinorekethwa no anhu akasiya sangano?

• Tinodikana kubata kudini aya anonga asikacadi kugara Apupuri a Djehovha?

• Tingapangidza kudini kuti tiri kuteerera ciziiso cekuti titize mu magereja e kunyepa?