LECCIÓN 58
Spisiluk-ora jun awoʼtan ta stojol te Jehová
Te j-abatotik yuʼun Jehová maʼyuk bin ya kakʼ smakotik ta yichʼel ta mukʼ te Jehová. Ya jnaʼtik te jich ya apas-euke, sok kʼax mukʼ skʼoplal ta yoʼtan te Jehová te jun awoʼtan ta stojole (kʼopona 1 Crónicas 28:9). ¿Binwan-ora ay wokol ya awaʼiy te jun awoʼtan ya awakʼ aba ta stojol te Diose? ¿Bin ya xjuʼ ya skoltayat?
1. ¿Machʼatik ya skʼan ya schebajtes koʼtantik yuʼun ya kijkitaytik te Jehová?
Ay ants winiketik te ya skʼan ya schebajtes koʼtantik yuʼun ya kijkitaytik te Jehová. Jich bitʼil te machʼatik la yijkitayikix te Jehová sok ya yalik lotiletik ta stojol te organización yuʼun te Diose swenta ya schebajtes koʼtantik. Te ants winiketik ini naʼbil sbaik bitʼil apóstata. Jaʼnix jich ay jwolwanejetik yuʼun religión te ya spukik ta alel lotil ta stojol te Testigoetik swenta ya yijkitayik te Jehová te machʼatik oranax ya schʼuunik te bin ya yaʼiyike. Mero xiʼbantik sba teme ya x-och jten jbatik ta kʼop sok te machʼatik ya skontrainik te lum yuʼun te Dios, teme ya jkʼoponbeytik te slibroik, ya x-ochotik ta página yuʼunik ta Internet o te ya kiltik te videoetik ya smoesik. Kʼalal te Jesús la yalbey skʼoplal te ants winiketik-abi, jich la yal: «Acʼa yil sbahic; haʼic tsʼoʼsitetic te yac stojobtesbelic tsʼoʼsitetic; teme tsʼoʼsit nix te ya stojobtes tsʼoʼsit, pajal me ya xchʼayic cohel ta chʼen soc» (Mateo 15:14).
¿Jaxan teme ay machʼa ya skʼan ya xlokʼ ta testigo yuʼun Jehová? Kʼaxtoniwan ya amel awoʼtan teme jich ya spas te machʼa kʼux ta awoʼtane. Wokolniwan ya kaʼiytik stsael teme jaʼ ya kakʼ jbatik ta stojol o ta stojol te Jehová. Pero jaʼ ya skʼan ya jtsatik te Jehová (Mateo 10:37). Jaʼ yuʼun ma jokin jbatik sok te ants winiketik-abi jich bitʼil yaloj te Jehová (kʼopona 1 Corintios 5:11).
2. ¿Bintik ya skʼan ya jpastik yuʼun jun koʼtantik ta stojol te Jehová?
Te bitʼil kʼux ta koʼtantik te Jehová, ma jkʼantik spasel te bin ya spas te lotil religión. Jaʼ yuʼun maba ya jpastik jun aʼtelil sok maba ya x-ochotik ta jun organización te snitojbey sba skʼoplal sok te lotil religión. Te Jehová jich ya yalbey te lum yuʼune: «Locʼanic tal ta stojol [te Mukʼul Babilonia]» (Apocalipsis 18:2, 4).
JNOPTIKXAN TA LEK
Ilawil bin ya xjuʼ ya apas yuʼun maʼyuk machʼa ya schebajtesbat awoʼtan ta stojol te Jehová. Sok bin-utʼil ya kakʼtik ta ilel te jun koʼtantik ta stojol teme ya xlokʼotik tal ta Mukʼul Babilonia.
3. Ma xa awakʼ sloʼlayat te lotil jpʼijubteswanejetik
¿Bin ya skʼan ya jpastik teme ya kaʼiytik te ay bin ma lek ya yalik ta stojol te organización yuʼun Jehová? Kʼoponaik Proverbios 14:15 sok albeyaik skʼoplal ini:
-
¿Bin yuʼun ya skʼan te ayuk jpʼijiltik yuʼun ma jchʼuuntik spisil te bin ya yalike?
Kʼoponaik 2 Juan 10 sok albeyaik skʼoplal ini:
-
¿Bin-utʼil ya skʼan ya kiltik te apostataetik?
-
Maniwan ayuk bin-ora ya xkʼopojotik sok te apostataetik; manchukme jich-abi, ¿binwan-utʼil ya xjuʼ ya yutsʼinotik te bin ya yakʼik ta nopele?
-
¿Binwan yaʼiyel ya yaʼiy sba te Jehová teme ya jchʼam kaʼiytik spisil te bintik ma lek ya yalik ta stojol soknix ta stojol te organización yuʼune?
4. Junuk koʼtantik ta stojol te Dios kʼalal jtul hermano ya sta smul
Teme ay ya jnaʼtik stojol te jtul hermano ta congregación la spas tulan mulil, ¿bin ya skʼan ya jpastik? Ilawil bin ya xjuʼ ya jnoptik ta swenta jun Ley yuʼun Dios te la yakʼbey te lum Israel. Kʼoponaik Levítico 5:1.
Jich bitʼil ya yal te versiculoe, teme ya jnaʼtik te ay machʼa la spas tulan mulil, ya skʼan ya kalbeytik te ancianoetik. Pero jaʼ lek te nailuk ya kalbeytik te machʼa la spas te mulil te jaʼuk akʼa yalbey te ancianoetik te bin la spase. Teme maba la yale, ya kakʼtik ta ilel te jun koʼtantik ta stojol te Jehová teme joʼotik ya kalbeytik te ancianoetike. ¿Bin yuʼun jich ya kakʼtik ta ilel te kʼux ta koʼtantik sok te jun koʼtantik ta stojol...
-
... te Jehová?
-
... te machʼa la spas te tulan mulil?
-
... te congregación?
Teme ay bin ma lek la spas jtul hermano, ¡koltaya!
5. Mame jkap jbatik sok te Mukʼul Babilonia
Kʼoponaik Lucas 4:8 sok Apocalipsis 18:4, 5, sok ilbeyaik skʼoplal te jojkʼoyeletik ini:
-
¿Aytobal jilem jbiil ta lotil religión?
-
¿Ochemonbal ta jun organización te jaʼ snitojbey sba skʼoplal sok jun religión?
-
¿Aybal bitʼil ya skoltay te religión te kaʼtele?
-
¿Aytobal bin ya skʼan ya jpas yuʼun ya xlokʼon ta jkʼaxel ta lotil religione?
-
Teme ya awal te aye, ¿bin ya skʼan ya apas?
Pasa te bin ya skʼan pasel swenta lek ya awaʼiy aba sok jun awoʼtan ta stojol te Jehová.
¿Bin ya apas teme ay machʼa ya yalbat te yakuk akoltay jun organización te ya skoltaybey skʼoplal jun religión?
AY MACHʼATIK JICH YA YALIK: «Ya skʼan ya jnaʼ te bin ya yalik te apostataetik ta stojol te testigoetik yuʼun Jehová yuʼun jich ya jkoltaybey skʼoplal-a te bin smelelile».
-
¿Lekbal te jich ya jpastike? ¿Bin yuʼun te jich ya awale?
¿BINTIK LA JNOPTIK?
Teme ya jkʼantik te jun koʼtantik ta stojol te Jehová, ma skʼan ya jokintik te machʼatik yijkitayojikix te Jehová. Jaʼnix jich ya skʼan ya xlokʼotik ta jkʼaxel ta lotil religionetik.
¿Jilbal ta awoʼtan into?
-
¿Bin yuʼun ma skʼan ya kiltik, ya jkʼopontik o ya jchʼam kaʼiytik te bin ya yalik te apostataetike?
-
¿Bin-utʼil ya skʼan ya kiltik te machʼatik spasemal yoʼtan ya xlokʼik ta testigo yuʼun Jehová?
-
¿Bin ya skʼan ya jpastik swenta ya jchʼuuntik te mantalil te ya yal te ya xlokʼotik ta jkʼaxel ta lotil religionetik?
YA XJUʼ YA ANOPXAN INI
Ilawil bin ya xjuʼ ya apas kʼalal ay machʼa ya spuk ta alel lotiletik ta stojol te testigoetik yuʼun Jehová.
«¿Jnaʼojtikbal ta tsʼakal te bin kʼoem ta pasele?» (Te J-ilkʼinal ta toyol, agosto 2018)
¿Bin-utʼil ya xjuʼ ya anaʼ teme jun organización o yanxan te bin ya yichʼ pasel ya skoltaybey skʼoplal te Mukʼul Babilonia?
¿Bintik spasojik te machʼatik ya skontrainik te bin smelelil swenta ya schebajtes koʼtantik?
Ilawil bin-utʼil la yijkitay te lotil religión jtul sacerdote, kʼopona te bin kʼax ta skuxlejal: «La jle te Dios te kʼalal chʼinonto-ae».
«Jelontesbot skuxlejalik yuʼun te Biblia» (Te J-ilkʼinal ta toyol, 1 yuʼun julio 2011)
Yaniwan amulan-euk sk'oponel ini
TE BINTIK YA SJOJKʼOYLANIK
¿Bin-utʼil ya yakʼik te nojptesel yuʼun Biblia te testigoetik yuʼun Jehová?
Ya xjuʼ ya atuuntes biluk Bibliail te kʼalal ya awichʼ te nojptesel te ya yakʼik te testigoetik yuʼun Jehová. Jaʼnix jich ya xjuʼ ya apas invitar te afamilia sok te awamigotak.
