Li melel yajtsʼaklomtak Kristoe muʼyuk kʼusi chmakatik˗o yoʼ jaʼuk noʼox xichʼik˗o ta mukʼ li Jeovae. Jnaʼojkutik ti chakʼan tukʼ chavakʼ aba eke xchiʼuk ep sbalil chil li Jeovae (kʼelo 1 Kronikas 28:9). Pe ¿kʼusitik xuʼ xanuptan ti jaʼ xa muʼyuk tukʼ˗o chavakʼ aba ta stojolal li Jeovae? ¿Kʼusi xuʼ xapas sventa stsal avuʼun?

1. ¿Kʼusitik tspasik yantik ti xuʼ muʼyuk xa tukʼ˗o chkakʼ jbatike?

Junantike oy kʼusitik tspasik venta mu xa xijtun ta stojolal li Jeovae. Junantik li buchʼutik yiktaojik xa mantale oy kʼusitik chopol chalik ta stojolal li j˗organisasiontik sventa xkʼunib li xchʼunel koʼontontike. Taje jvalopatinej mantal sbiik. Jech xtok, junantik jnitvanejetik ta relijione oy kʼusitik jecheʼ chalik ta jtojolaltik sventa xchibajik li buchʼutik kʼunik noʼox ta mantale. Xibal me tajek sba mi chkakʼtik persa sventa x˗och ta rason kuʼuntik li jvalopatinej mantaletike xchiʼuk li jnitvanejetik ta relijion taje. Xibal sba xtok mi ta jchanbetik li slivroike, mi chij˗och ta spajinaik ta Internet o mi ta jkʼelbetik li svideoike. Xi xa onoʼox yaloj li Jesuse: «Mu xatukʼulanik, maʼsat jbeiltasvanejetik maʼ leʼe. Yuʼun mi maʼsat li buchʼu tsbeiltas jun maʼsat vinike, xchaʼvoʼalik chbalchʼujik ochel ta chʼen» (Mateo 15:14).

¿Kʼu van yelan chkaʼi jbatik mi mu xa skʼan jaʼuk stestigo Jeova junuk kutsʼ kalaltik o junuk kamigotike? Toj kʼux tajek chkaʼitik. Mu xa van jnaʼtik buchʼu tukʼ chkakʼ jbatik ta stojolal. Mi jaʼ ta stojolal li kutsʼ kalaltik o kamigotike o jaʼ ta stojolal Jeova. Pe skʼan jpʼeluk ta koʼontontik ti jaʼuk tukʼ xkakʼ jbatik ta stojolal li Jeovae (Mateo 10:37). Jaʼ yuʼun, ta jchʼunbetik smantal Jeova mi muʼyuk ta jchiʼintik li buchʼutik lokʼemik ta mantale (kʼelo 1 Korintios 5:11).

2. ¿Kʼuxi xuʼ xkakʼtik ta ilel ti tukʼ chkakʼ jbatik ta stojolal Jeova kʼalal oy kʼusi ta jnop ta jpastike?

Ta skoj ti jkʼanojtik Jeovae, muʼyuk ta jtikʼ jbatik spasel li kʼusitik tspasik li jecheʼ relijionetike. ¿Kʼuxi taje? Jaʼ ti mu teuk tsakal skʼoplal xchiʼuk jecheʼ relijion li kabteltike, li organisasion bu tikʼilutike o kʼusiuk noʼox ti ta jpastike. Xi tspʼijubtas steklumal li Jeovae: «Lokʼanik tal te», jaʼ xkaltik, li ta Mukʼta Babiloniae (Apokalipsis 18:2, 4).

 JCHANTIK TO BATEL MAS

3. Kʼelo me aba ta stojolal li jecheʼ jchanubtasvanejetike

¿Kʼusi van ta jpastik mi oy kʼusitik chopol chalik ta stojolal li s˗organisasion Jeovae? Kʼelik Proverbios 14:15 xchiʼuk albeik skʼoplal li sjakʼobil liʼe:

• ¿Kʼu yuʼun skʼan xkichʼ jpʼijiltik xchiʼuk ti mu jchʼuntik skotol li kʼusitik chkaʼitike?

Kʼelik 2 Juan 10 xchiʼuk albeik skʼoplal li sjakʼobiltak liʼe:

• ¿Mi stakʼ jkʼopontik li jvalopatinej mantaletike?

• Akʼo mi muʼyuk ta jchiʼintik li jvalopatinej mantaletike, ¿kʼuxi van xuʼ sokes jnopbentik mi ta jchikintabetik o mi la jkʼeltik li kʼusitik chakʼik ta chanele?

• ¿Kʼu van yelan chaʼi sba Jeova xanaʼ mi la jchʼuntik li kʼusitik chopol chalik ta stojolale o ta stojolal li s˗organisasione?

4. Tukʼ xavakʼ aba ta stojolal Dios kʼalal tsots tspas smul junuk ermanoe

¿Kʼusi skʼan jpastik mi laj kaʼitik ti tsots la spas smul junuk ermanoe? Kʼelavil kʼusi chakʼ jchantik li mantal laj yalbe j˗israeletik li Jeovae. Kʼelik Levitiko 5:1.

Jech kʼuchaʼal chal li versikulo liʼe, skʼan xbat kalbetik moletik mi laj kaʼitik tsots la spas smul junuk ermanoe. Pe li kʼusi mas leke, jaʼ ti baʼyeluk xkalbetik li buchʼu la spas smul ti akʼo jamal xalbe li moletike. Pe mi mu skʼan xalbee, voʼotik chkalbeik li moletike, yuʼun ta jkʼan tukʼ chkakʼ jbatik ta stojolal li Jeovae. Mi jech la jpastike, ¿kʼu yuʼun jaʼ svinajeb ti jkʼanojtik xchiʼuk tukʼ chkakʼ jbatik ta stojolal...

• ... li Jeovae?

• ... li buchʼu la spas smule?

• ... li tsobobbaile?

 5. Mu me teuk akʼoplal li ta Mukʼ ta Babiloniae

 ¿KʼUSI LA ACHAN?

Mi ta jkʼan tukʼ chkakʼ jbatik ta stojolal Jeovae, skʼan mu jchiʼintik li buchʼutik lokʼemik ta mantale. Jech xtok, mi jsetʼuk ta jtikʼ jbatik li ta jecheʼ relijione.

Svulesobil ta joltik

• ¿Kʼu yuʼun skʼan mu jkʼeltik o jchikintatik li kʼusitik chalik li jvalopatinej mantaletike?

• ¿Kʼu yuʼun skʼan mu jkʼopontik li buchʼutik mu xa skʼanik ti jaʼikuk stestigotak Jeovae?

• ¿Kʼusi skʼan jpastik yoʼ mu jtikʼ jbatik jsetʼuk li ta jecheʼ relijione?