OCIPAMA 58
Amamako Oku Kolela Yehova
Akristão vocili va nõlapo okuti, ka va ecelela lacimue oku va tateka oku fendela Yehova. Citava okuti, o liyevitevo ndoco. Yehova wa kapako calua ekolelo liove. (Tanga 1 Asapulo 28:9.) Ovina vipi vi pondola oku seteka ekolelo liove kokuaye kuenda nye ci ku kuatisa oku liyaka lavio?
1. Vakuetu va pondola oku seteka ndati ekolelo tu kuetele Yehova?
Omanu vamue va ka seteka oku tu tateka oku vumba Yehova. Helie o pondola oku linga ocina caco? Omanu vamue va liwekapo oku vumba Yehova, va siata oku popia ovohembi atiamẽla kocisoko ca Suku oco va nyõle ekolelo lietu. Ovo va tukuiwa okuti, olonanguluke. Handi vali, asongui vamue vatavo va siata oku sandeka ovolandu wuhembi atiamẽla kokuetu, oco va vetiye omanu vamue oku siapo ocili. Omo liaco, tu sukila oku kuata utate oco ka tu ka sapele lolonanguluke, oku tanga alivulu avo, ale ceci va soneha volonumbi viavo vio internet, ndaño oku tala olovideo viavo. Catiamẽla ku vana va seteka oku tindula omanu vakuavo koku vumba Yehova lekolelo, Yesu hati: “Va kale. Ovo asongui olomeke. Nda omeke yi songuila omeke yikuavo, kavali kavo va kupukila vocitunu.”—Mateo 15:14.
Nye tu linga nda umue tua kũlĩha o nõlapo okuti, ka yongola vali oku kala Ombangi ya Yehova? Ocili okuti, nda umue tua kũlĩha o ci linga, tu sumua calua. Omunu waco pamue o tu kisika oku nõla pokati kaye la Yehova. Tu sukila oku nõlapo oku amamako oku kolela Suku okuti, ocina cikuavo ci sule. (Mateo 10:37) Omo liaco, tu pokoli konumbi ya Yehova yoku yuvula oku linga ukamba lomanu vaco.—Tanga 1 Va Korindo 5:11.
2. Olonjila tu nõla vi situlula ndati nda tua kolela Yehova ale sio?
Ocisola tu kuetele Yehova, ci tu vetiya oku yuvula ovina viosi vietavo liesanda. Eci ci lekisa okuti, ka tu pangi onepa kocisoko lacimue ci kuete elitokeko letavo liesanda. Vovina viaco mua kongela upange wetu la vikuavo. Yehova o tu lungula hati: “Amanu vange, tundimo [vo Bavulono Yinene].”—Esituluilo 18:2, 4.
LILONGISA ONDONGOSI
Lilongisa ndomo o yuvula omunu wosi o yongola oku honguisa ekolelo o kuetele Yehova. Limbukavo ndomo o pondola oku lekisa ekolelo poku tunda vo Bavulono Yinene.
3. Kuata utate lalongiso vesanda
Nye tu linga nda tua yeva ovina vĩvi viatiamẽla kocisoko ca Yehova? Tanga Olosapo 14:15, noke konomuisa epulilo li kuãimo:
-
Momo lie tu sukilila oku kuata utate wokuti, ka tu tava kovina viosi tu yeva?
Tanga 2 Yoano 10, noke konomuisa apulilo a kuãimo:
-
Tu sukila oku tata ndati olonanguluke?
-
Ndaño okuti ka tu sapela lolonanguluke polo la polo, pamue tu yapuisiwa ndati lalongiso avo?
-
O sima okuti Yehova o liyeva ndati nda tu tiamisila utima kovina vĩvi vi popiwa viatiamẽla kokuaye, ale kocisoko caye?
4. Amamako oku kolela Suku eci manji umue a linga ekandu
Nda tua kũlĩha okuti manji umue vekongelo wa linga ekandu limue linene, tu kisikiwa oku linga nye? Kũlĩhĩsa onumbi yimue Yocihandeleko Suku a ecele ko Isareli yosimbu. Tanga Ovisila 5:1.
Ndomo ca lekisiwa vocinimbu eci, nda tua kũlĩha okuti omunu umue wa linga ekandu limue linene, tu sukila oku sapuilako akulu vekongelo. Pole, osimbu ka tua ci lingile, ca sunguluka nda tu vetiya omunu wa lueya, oco a ende kakulu vekongelo oku ka litavela ekandu liaye. Nda eye ka ci lingile, ekolelo tu kuetele Yehova, li tu vetiya oku ka lomboluila kakulu vekongelo eci tua kũlĩha. Elinga liaco li lekisa ndati ocisola cocili tu kuetele . . .
-
Yehova Suku?
-
omunu wa linga ekandu?
-
vakuetu vekongelo?
Manji umue nda o kasi oku liyaka lovitangi, u kuatisa!
5. Kala ocipãla lo Bavulono Yinene
Tanga Luka 4:8 kuenda Esituluilo 18:4, 5, noke tambulula apulilo a kuãimo:
-
Anga hẽ onduko yange handi yi kasi kulala wolonduko viomanu va panga onepa ketavo liesanda?
-
Nda tiamẽla hẽ kocisoko cimue ci kuete elitokeko letavo likuavo?
-
Anga hẽ upange wange u kuatisa etavo liesanda lonjila yimue?
-
Kuli hẽ olonepa vimue komuenyo wange ndi sukila oku litepa letavo liesanda?
-
Nda nda tambulula okuti oco kapulilo a lingiwa ndeti, apongoloko api ndi sukila oku linga?
Kovina viosi, nõla onjila yimue yi ku kuatisa oku kuata owanji wutima wa yela kuenda oku sokolola kekolelo o kuetele Yehova.
Nye nda wa linga nda va ku lalekele oku kuatisa kocimunga cimue cetavo ceca ekuatiso komanu va suka?
OMANU VAMUE VA POPIA VATI: “Ndi sukila oku kũlĩha eci olonanguluke vi kasi oku popia catiamẽla Kolombangi Via Yehova oco ndi teyuile ocili.”
-
Anga hẽ nda ca sunguluka? Momo lie?
NYE WA LILONGISA?
Oco tu amameko oku kolela ku Yehova, tu sukila oku yuvula oku linga ukamba la vana ka vo kolelele. Tu sukilavo oku litepa letavo liesanda kovina viosi.
Oku Pitulula
-
Momo lie tu yuvuila oku tala, oku tanga, ale oku yevelela alongiso olonanguluke?
-
Tu sukila oku tata ndati vana ka va yongola vali oku kala Olombangi Via Yehova?
-
Tu pokola ndati kelungulo lioku tunda vetavo liesanda?
OCO O KŨLĨHE OVINA VIKUAVO
Lilongisa eci o linga vepuluvi omanu vakuavo va sandeka ovolandu wuhembi atiamẽla Kolombangi Via Yehova.
“Ove hẽ wa Kũlĩha Ovina Via Kongela Vombangulo Yimue?” (Utala Wondavululi Wenyenye 2018)
O limbuka ndati nda ocisoko ale ovopange amue a kasi oku kuatisa o Bavulono Yinene?
Ovanyãli vamue nye va seteka oku linga oco va honguise ekolelo lietu?
Vulandu “Nda sandiliya Suku tunde vutila wange,” tanga eci catiamẽla ku una wa kala ocitunda cetavo lio Xintoísmo okuti wa siapo etavo liesanda.
“Embimbiliya li Pongolola Omuenyo Womanu” (Utala Wondavululi 1 Wevambi Linene 2011)
Ove o ka ci Sola
APULILO A SIATA
Elilongiso Liembimbiliya li Lingiwa Lolombangi Via Yehova li Lomboloka Nye?
Lekuatiso lielilongiso li lingiwa ocali Lolombangi Via Yehova, o pondola oku kuama Lembimbiliya liosi o yongola. Lianja poku laleka epata liove liosi ale akamba vove, oco vu lilongisili kumosi.
