UYONO 58
Fuevun kẹ Jihova
Inenikristi rẹ uyota choma rẹ ayen vwọ kẹnoma kẹ ohwo yẹrẹ orọnvwọn rọ guọnọ gbowọphiyọ ẹga rẹ ayen vwọ kẹ Jihova. O muẹro nẹ ọyen orhiẹn-ebro wẹn. Evun-ẹfuọn ghanre kẹ Jihova. (Se 1 Ikun Rivie 28:9.) Ẹdia vọ yen sa davwen evun-ẹfuọn wẹn ni, kẹ die yen sa chọn wẹ uko?
1. Mavọ yen ihwo efa sa vwọ davwen evun-ẹfuọn avwanre ni?
Ihwo evo guọnọ da avwanre obọ ji rere e vwo jẹ Jihova ẹga. Ono yen se ru emu tiọyen? Ihwo evo ri vrẹn nẹ uyota na gun ẹfian kpahen ukoko na rere ayen se vwo miovwo esegbuyota avwanre. Enana ihwo ri she nẹ ukoko na re vwọ suọ. Vwọba, ilori rẹ ẹga evo hrahra evuẹ rẹ efian kpahen avwanre rere ihwo rẹ esegbuyota rayen ganre-e se vwo vrẹn nẹ ukoko na. Imuoshọ herọ siẹrẹ e de nene ihwo nana phraphro, sẹ ẹbe rayen, evuẹ rẹ ayen phi phiyọ intanẹti yẹrẹ e vwo ni ividio rayen. Vwọ kpahen ihwo re guọnọ nẹ ofu dje ihwo re fuevun ga Jihova, Jesu da ta: “We jẹ ayen vwo. Irhuẹro ayen ruẹ. Orhuẹro de sun orhuẹro ayen ivẹ ki she phihọ ọgọdọ.”—Matiu 15:14.
Kẹ, ọ da dianẹ ohwo rẹ avwanre vugheri brorhiẹn nẹ ọyen rha cha dia Oseri ri Jihova ọfa-a vwo? Ọ sa da avwanre mamọ ọke rẹ ohwo rọ kẹrẹ avwanre de ru ọtiọyen. Ohwo na sa tanẹ avwanre jẹ vwẹ uvwre rẹ ọyen vẹ Jihova. Ofori nẹ evun-ẹfuọn avwanre kẹ Jihova dia obo re ma ka enu. (Matiu 10:37) Ọtiọyena, avwanre kerhọ rẹ iji ri Jihova ra vwọ kẹnoma kẹ ihwo ọtiọyen.—Se 1 Kọrẹnt 5:11.
2. Orhiẹn romobọ vọ yen sa davwen evun-ẹfuọn rẹ avwanre kẹ Jihova ni?
Ẹguọnọ ri Jihova che mu avwanre vwọ kẹnoma kẹ kemu kemu ro churobọ si ẹga rẹ efian. Ofori nẹ iruo, ukoko rẹ avwanre hepha yẹrẹ irueru rẹ avwanre vwobọ vwọ churobọ si ẹga rẹ efia-an. Jihova si avwanre orhọ nẹ, “Vrẹn no rhe [Babilọn Rode na], ihwo mẹ.”—Ẹvwọphia 18:2, 4.
HIẸ KODO
Yono kpahen obo wọ sa vwọ kẹnoma kẹ ihwo re guọnọ nẹ wọ fuevun kẹ Jihova-a. Vwọba, mrẹ obo wọ sa vwọ fuevun kẹ Jihova womarẹ wo vwo vrẹn nẹ Babilọn Rode.
3. Kẹnoma kẹ iyono rẹ efian
Die yen e che ru ọke re de nyo erharhe rẹ eta kpahen ukoko ri Jihova? Se Isẹ 14:15, ovwan ta ota kpahen onọ nana:
-
Diesorọ a vwọ jomaotọ e vwo je vwo imuẹro kpahen kota kota re nyori?
Se 2 Jọn 10, ovwan ta ota kpahen enọ nana:
-
Ẹro vọ yen avwanre vwo ni ihwo ri she nẹ ukoko na re vwọ suọ?
-
Dede nẹ avwanre vẹ ihwo ri she nẹ ukoko na re vwọ suọ yẹrẹn kuẹgbe-e, mavọ yen e se vwo nyo iyono rayen?
-
Mavọ yen wo rorori nẹ oma che ru Jihova a da kerhọ kẹ erharhe rẹ eta rẹ ihwo ta kpahọn vẹ ukoko rọyen?
4. Fuevun kẹ Jihova ọke rẹ oniọvo ọvo de ru umwemwu
E de nyo nẹ ohwo ọvo vwẹ ukoko na ru umwemwu ọgangan, oghwa vọ yen te avwanre? Roro kpahen odjekẹ rẹ urhi rẹ Ọghẹnẹ vwọ kẹ ihwo rẹ Izrẹl awanre. Se Livitikọs 5:1.
Vwo nene ẹkpo ri Baibol yena, avwanre da riẹn nẹ ohwo ọvo ru umwemwu ọgangan, ofori nẹ a vuẹ ekpako na obo ra riẹnre. E ki ru ọtiọyen, ọyen uruemu esiri ra vwọ vuẹ ohwo ro ru umwemwu na nẹ ọ ra fan imwemwu rọyen kẹ ekpako na. O rhe ru ọtiọye-en, evun-ẹfuọn vwọ kẹ Jihova che mu avwanre vwọ vuẹ ekpako na oborẹ avwanre riẹnre. Mavọ yen owọẹjẹ yena vwo djephia nẹ e vwo ẹguọnọ rẹ . . .
-
Jihova?
-
ohwo ro ru umwemwu na?
-
ihwo efa rehẹ ukoko na?
Oniọvo ọvo dahẹ ẹdia rẹ imuoshọ, chọn uko!
5. Kẹnoma kẹ Babilọn Rode na
Se Luk 4:8 kugbe Ẹvwọphia 18:4, 5, ovwan ta ota kpahen enọ nana:
-
Odẹ mẹ jehẹ ọbe re si edẹ rẹ ihwo rehẹ ishoshi rẹ ẹga rẹ efian phiyọ?
-
Me hẹ ukoko ro churobọ si ẹga ọfa?
-
O vwo ẹdia rẹ iruo mẹ vwo biẹcha ẹga rẹ efian?
-
O vwo ẹdia efa vwẹ akpeyeren mẹ ro de fo nẹ mi si oma nẹ ẹga rẹ efian?
-
Ẹkpahọnphiyọ mẹ vwọ kẹ enọ yena da dia e, ewene vọ yen ofori nẹ mi ru?
Obo rọ wanre eje, brorhiẹn rọ cha nẹrhẹ ẹwẹn obrorhiẹn wẹn fon ro ji che djephia nẹ wọ fuevun kẹ Jihova.
Die yen wo che ru a da vuẹ wẹ nẹ wo rhi toro igho vwo bicha ẹga rẹ efian?
IHWO EVO TA: “Me guọnọ riẹn oborẹ ihwo ri she nẹ ẹga rẹ uyota na ta kpahen Iseri ri Jihova rere me sa vwọ chochọn rẹ uyota na.”
-
Ọyena emu rẹ aghwanre? Kẹ, diesorọ yẹrẹ diesorọ o vwo jẹ dia ọtiọyen?
ỌDJẸKOKO
A sa vwọ fuevun kẹ Jihova, ofori nẹ a kẹnoma kẹ ihwo re fuevun vwọ kẹ-ẹ. O ji fo nẹ e sioma nẹ ẹga rẹ efian riẹriẹriẹ.
Ẹrhomafuẹrẹn
-
Diesorọ e vwo je ni, se, yẹrẹ kerhọ rẹ eta rẹ ihwo ri she nẹ ukoko na re vwọ suọ?
-
Mavọ yen oma ru avwanre kpahen ihwo re guọnọ dia Iseri ri Jihova-a?
-
Mavọ yen a sa vwọ kerhọ rẹ orhọ-esio re vwo vrẹn nẹ ẹga rẹ efian?
HIẸ GUỌNỌ
Yono kpahen oborẹ wọ cha ta siẹrẹ ihwo efa de gun efian kpahen Iseri ri Jihova.
Mavọ yen wo se vwo vughe ukoko yẹrẹ irueru ri biẹcha Babilọn Rode?
Die yen ihwo re vwọ sua evo ruru rere ayen se vwo miovwo esegbuyota rẹ avwanre?
Vwẹ ikuegbe rẹ “Rhanvwẹ Ọkiemọ Rhe Yen Me Vwọ Guọnọ Ọghẹnẹ,” se kpahen oborẹ orherẹn rẹ Shinto ọvo vwo sioma nẹ ẹga rẹ efian.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
