NGUDO 58
Dzulani Ni Tshi Fhulufhedzea Kha Yehova
Vhakriste vha ngoho vho ḓiimisela u sa tendela muthu kana tshithu naho tshi tshifhio tshi tshi vha thivhela u gwadamela Yehova. Zwi tou pfala uri na inwi ni ḓipfa nga nḓila i fanaho. Yehova u dzhiela nṱha u fhulufhedzea haṋu. (Vhalani 1 Koronika 28:9.) Ndi mini zwine zwa nga ita uri zwi ni konḓele u dzula ni tshi fhulufhedzea kha Yehova nahone ndi mini zwine zwa nga ni thusa?
1. Vhaṅwe vha nga linga hani u fhulufhedzea hashu kha Yehova?
Vhaṅwe vhathu vha ḓo lingedza u ita uri ri litshe u shumela Yehova. Ndi vhonnyi vhenevho vhathu vhane vha nga ita zwithu zwo khakheaho nga u rali? Vhaṅwe vhathu vhe vha litsha u shumela Yehova, vha amba mazwifhi nga ha ndangulo yawe ngauri vha ṱoḓa u tshinyadza lutendo lwashu. Vhenevha vhathu vha vhidzwa vhagunei. Zwiṅwe hafhu, vhaṅwe vharangaphanḓa vha vhurereli vha amba mazwifhi nga ha riṋe u itela uri vhathu vhane vha si ṱhogomele yeneyo khombo vha litshe u shumela Yehova. Zwi na khombo u amba na vhapikisi, u vhala bugu dzavho, zwine vha zwi ṅwala kha website dzavho kana u ṱalela vidio dzavho. Yesu o amba zwi tevhelaho nga ha vhathu vhane vha lingedza u ita uri vhaṅwe vha litshe u shumela Yehova nga u fhulufhedzea, o ri: “Vha litsheni. Vha sumbedza vhaṅwe nḓila ngeno na vhone vha sa vhoni. Arali muthu a sa vhoni a tshi sumbedza muṅwe muthu a sa vhoni nḓila, vha ḓo wela mulindini vhoṱhe.”—Mateo 15:14.
Hu pfi mini arali muthu ane ra mu ḓivha a litsha u vha muṅwe wa Ṱhanzi ya Yehova? Zwi nga ri khathula mbilu arali muthu ane ra mu ḓivha a ita zwenezwo. Onoyo muthu a nga ri kombetshedza uri ri khethe kha ene na Yehova. Ri tea u ḓiimisela u dzula ri tshi fhulufhedzea kha Mudzimu u fhira zwithu zwoṱhe. (Mateo 10:37) Nga zwenezwo, ri ḓo thetshelesa mulayo wa Yehova wa uri ri songo konana na vhathu vho raloho.—Vhalani 1 Vhakorinta 5:11.
2. Phetho dzine ra dzi ita dzi nga kwama hani u fhulufhedzea hashu kha Yehova?
Nga nṱhani ha uri ri funa Yehova, ri iledza tshiṅwe na tshiṅwe tshine tsha tshimbidzana na vhurereli ha mazwifhi. Mushumo washu, madzangano ane ra vha khao kana tshithu naho tshi tshifhio tshine ra tshi ita, a zwo ngo tea u tshimbidzana na vhurereli ha mazwifhi. Yehova u ri: “Ibvani [kha Babele Ḽihulu] vhathu vhanga.”—Nzumbululo 18:2, 4.
GUDANI ZWO ENGEDZEAHO
Gudani uri ni nga iledza hani u tendela vhathu vha tshi ita uri ni si tsha fhulufhedzea kha Yehova. Ni vhone na uri ni nga sumbedza hani uri ni a fhulufhedzea nga u bva kha Babele Ḽihulu.
3. Thanyelani vhafunzi vha mazwifhi
Ri tea u ita mini arali ra pfa zwithu zwi si zwavhuḓi nga ha ndangulo ya Yehova? Vhalani Mirero 14:15, ni kone u fhindula mbudziso i tevhelaho:
-
Ndi ngani ri songo fanela u sokou tenda tshiṅwe na tshiṅwe tshine ra tshi pfa?
Vhalani 2 Yohane 10, ni kone u fhindula mbudziso dzi tevhelaho:
-
Ri tea u fara hani vhagunei?
-
Ri nga ḓiwana hani ri tshi khou thetshelesa pfunzo dza vhagunei naho ri sa ambi navho nga ho livhaho?
-
Ni vhona u nga Yehova a nga ḓipfa hani arali na thetshelesa zwithu zwi si zwavhuḓi zwine vhathu vha zwi amba nga hae na ndangulo yawe?
4. Ri nga dzula hani ri tshi fhulufhedzea kha Mudzimu musi muṅwe tshivhidzoni o ita tshivhi?
Ri fanela u ita mini arali ra ḓivha uri muṅwe muthu tshivhidzoni o ita tshivhi tshihulwane? Vhonani vhulivhisi he Mudzimu a vhu ṋea Vhaisiraele tshifhingani tsha kale. Vhalani Levitiko 5:1.
Samusi zwo sumbedzwa kha yeneyo vese, arali ra ḓivha uri muṅwe muthu o ita tshivhi tshihulwane, ri tea u vhudza vhahulwane vha tshivhidzo zwine ra zwi ḓivha. Musi ri sa athu ita zwenezwo, zwi nga vha zwavhuḓi u vhudza muthu o itaho tshivhi uri a ye a vhudze vhahulwane vha tshivhidzo tshivhi tshawe. Arali a sa ya a vhudza vhahulwane vha tshivhidzo, ri tea u fhulufhedzea kha Yehova, ri ye ri vha vhudze zwine ra zwi ḓivha. Musi ri tshi ita zwenezwo, zwi vha zwi tshi khou sumbedza hani uri ri funa . . .
-
Yehova Mudzimu?
-
muthu o itaho tshivhi?
-
vhaṅwe tshivhidzoni?
Arali mutendi nga inwi e na thaidzo, mu thuseni!
5. Ibvani kha Babele Ḽihulu
Vhalani Luka 4:8 na Nzumbululo 18:4, 5, ni kone u fhindula mbudziso dzi tevhelaho:
-
Naa ndi tshee ndo ḓiṅwalisa sa muraḓo wa vhurereli ha mazwifhi?
-
Naa ndi muraḓo wa dzangano ḽine ḽa shumisana na vhuṅwe vhurereli?
-
Naa mushumo wanga u tikedza vhurereli ha mazwifhi nga nḓila naho i ifhio?
-
Naa hu na zwiṅwe zwithu zwine nda fanela uri ndi zwi litshe zwine zwa tshimbidzana na vhurereli ha mazwifhi?
-
Arali ndo ri ee kha iṅwe ya dzenedzi mbudziso, ndi tshanduko dzifhio dzine nda tea u dzi ita?
Kha vhuimo hoṱhe, itani phetho ine ya ḓo ita uri ni sale ni na luvalo lwo kunaho na ine ya ḓo sumbedza uri ni a fhulufhedzea kha Yehova.
Ni ḓo ita mini arali na humbelwa uri ni ṋeele u itela u tikedza vhurereli ha mazwifhi?
VHAṄWE VHATHU VHA AMBA URI: “Ndi ṱoḓa u ḓivha zwine vhagunei vha zwi amba nga ha Ṱhanzi dza Yehova uri ndi kone u imelela ngoho.”
-
Naa u ita zwenezwo ndi vhuṱali? Ndi ngani ni tshi ralo?
NO GUDA MINI?
U itela uri ri dzule ri tshi fhulufhedzea kha Yehova, ri tea u iledza u konana na vhathu vhane vha sa fhulufhedzee khae. Ri tea u dovha ra ṱutshela tshiṅwe na tshiṅwe tshine tsha tshimbidzana na vhurereli ha mazwifhi.
Ni Kha Ḓi Zwi Humbula?
-
Ndi ngani ri songo tea u ṱalela, u vhala kana u thetshelesa zwine vhagunei vha zwi amba?
-
Ri tea u fara hani vhathu vha si tsha ṱoḓaho u vha Ṱhanzi dza Yehova?
-
Ri nga thetshelesa hani tsivhudzo ya uri ri bve kha vhurereli ha mazwifhi?
WANANI ZWO ENGEDZEAHO
Gudani nga ha zwine na nga zwi ita musi vhaṅwe vha tshi phaḓaladza mazwifhi nga ha Ṱhanzi dza Yehova.
Ni nga ḓivha hani arali madzangano kana zwiṅwe zwine na zwi ita zwi tshi tikedza Babele Ḽihulu?
Vhaṅwe vhapikisi vho ita mini u itela u tshinyadza lutendo lwashu?
Kha nganeavhutshilo ine ya ri “Ndo Ṱoḓa Mudzimu U Bva Ndi Tshee Muṱuku,” vhalani nga ha mufunzi wa vhurereli ha Vhushinto we a ṱutshela vhurereli ha mazwifhi.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
