Tumu Kiristtaaneti Yihoowawu goynnennaadan eta aybinne woy ooninne diggenna mala murttidosona. Neenikka hegaadan murttidoogee qoncce. Yihooway neeni ayyo ammanettiyoogaa nashshees. (1 Hanidabaa Odiya 28:9 nabbaba.) Neeni ayyo ammanettada deˈanawu metootanaadan oottana danddayiyaabay aybee, qassi hegawu nena aybi maaddanee?

1. Nuuni Yihoowawu ammanettennaadan harati waati paaccana danddayiyoonaa?

Issi issi asay nuuni Yihoowawu haggaaziyoogaa agganaadan oottanawu malana danddayees. Hegaa mala iitabaa oottiyaageeti oonee? Tumaa aggida issoti issoti nu ammanuwaa xayssanawu Xoossaa dirijjitiyaabaa wordduwaa yootana danddayoosona. Eti kaddidaageeta geetettoosona. Qassi, naagettenna asati tumaa agganaadan oottanawu, haymaanootiyaa kaalettiya amaridaageeti nubaa wordduwaa yootoosona. Nuna eqettiya oonaaranne haasayiyoogee woy eta maxaafaa woykko eti bantta websaytiyan xaafiyoobaa nabbabiyoogee keehi qohiyaaba. Harati Yihoowayyo ammanettidi haggaazennaadan digganawu maliyaageeta xeelliyaagan Yesuusi hagaadan giis: “Etabau hirggoppite; eti qooqe kaalettiya qooqeta; qooqee qooqe kaalettikko, naa77aikka ollan kunddana.”—Maatiyoosa 15:14.

Nuuni eriyo uri Yihoowa Markka gidiyoogaa agganawu kuuyikko, waatin kehee? Nuuni siiqiyo uri hegaadan oottikko, keehi azzanana danddayoos. Izaawu nuuni A woy Yihoowa dooranaadan giddana danddayees. Nuuni awudekka, aybippenne aaruwan Yihoowan ammanettanawu murttana bessees. (Maatiyoosa 10:37) Yaatiyo gishshawu, nuuni hegaa mala asatuura gayttennaadan Yihooway azazidobaa kaalloos.—1 Qoronttoosa 5:11 nabbaba.

2. Nuuni kuuyiyoobay Yihoowawu ammanettiyaakkonne waati bessana danddayii?

Nuuni Yihoowa siiqiyoogee worddo haymaanootiyaara aybiininne walahettennaadan denttettees. Nu oosoy, nuuni A yara gidido dirijjitee woy nuuni oottiyo aybinne worddo haymaanootiyaara gayttidaba gidana koshshenna. Yihooway nuna, “Ta asau, [Gita Baabiloonippe] kiyite!” yaagees.—Ajjuutaa 18:2, 4.

 LOYTTA AKEEKA

3. Worddo asttamaaretuppe naagetta

Nuuni Yihoowa dirijjitiyaa xeelliyaagan harati yootiyo worddobaa siyikko, waatana koshshii? Leemiso 14:15 nabbabite; yaatidi ha oyshaa tobbite:

• Nuuni siyido ubbabaa ammanennaadan naagettiyoy aybissee?

Naaˈˈantto Yohaannisa 10 nabbabite; yaatidi ha oyshata tobbite:

• Nuuni kaddidaageetuura gayttidaagan waatana koshshii?

• Nuuni kaddidaageetuura haasayana xayikkonne, eti tamaarissiyoobaa siyana danddayiyo harabay aybee?

• Nuuni Yihoowabaanne A dirijjittiyaabaa asay odiyo iitabaa siyikko, ayyo aybi siyettanee?

4. Issi ishay nagaraa oottiyo wode, neeni awudekka Yihoowawu ammanetta

Nuuni galchchan deˈiya uri gita nagaraa oottidoogaa erikko, ay oottana bessii? Xoossay beni Israaˈeelatussi immido Higgiyan deˈiya issi maaraa qoppa. Wogaabaa 5:1 nabbabite.

Ha xiqisee zoriyoogaadan, nuuni issi uri gita nagaraa oottidoogaa erikko, hegaa cimatuyyo yootana koshshees. SHin, etawu yootanaappe kase, izaawu ba nagaraa cimatussi paaxanaadan zoriyoogee kehatettaa bessiyaaba. I yootana xayikko, nuuni Yihoowawu ammanettoos, qassi nu eriyoobaa cimatussi yootoos. Yaatiyoogee hagaappe kaallidi deˈiyaageeta aggenna siiquwaa siiqiyoogaa waati bessii?

• Xoossaa Yihoowa.

• Nagaraa oottida ura.

• Galchchan deˈiya harata.

 5. Gita Baabiloonikko shiiqoppa

 AY AKEEKADII?

Nuuni Yihoowawu ammanettidi deˈanawu, ayyo ammanettennaageetuura zuppetana koshshenna. Hegaa bollikka, nuuni worddo haymaanootiyaappe muleera shaahettana koshshees.

Zaaretuwaa

• Nuuni kaddidaageetu timirttiyaa beˈana, nabbabana woy siyana koshshennay aybissee?

• Yihoowa Markka gidiyoogaa aggidaageetuura gayttidaagan nuuni waatana koshshii?

• Nuuni worddo haymaanootiyaappe kiyaanaadan odettidabaa azazettanawu waatana danddayiyo?