LEKSYON 58
Magpabilin nga Maunungon kan Jehova
An tinuod nga mga Kristiano determinado nga diri gud tugotan an bisan ano o an bisan hin-o nga makaulang ha ira pagsingba kan Jehova. Sigurado nga ito an imo inaabat. Ginpapabilhan ni Jehova an imo pagin maunungon. (Basaha an 1 Cronicas 28:9.) Ha ano nga mga sitwasyon bangin makurian ka nga magpabilin nga maunungon ha iya, ngan paonan-o mo ito aatubangon?
1. Ha ano nga mga paagi bangin makurian kita nga makapabilin nga maunungon kan Jehova tungod han iba?
May pipira nga tawo nga maniningkamot nga paundangon kita ha pag-alagad kan Jehova. Hin-o an posible magbuhat hin sugad hito? An iba nga binaya ha kamatuoran nagsusumat hin mga buwa mahitungod ha organisasyon han Dios basi mawad-an kita hin pagtoo. Gintatawag hira nga mga apostata. Dugang pa, may mga lider han relihiyon nga nagpapasarang hin buwa nga impormasyon mahitungod ha aton basi bumaya ha kamatuoran an mga diri mabinantayon. Peligroso gud ha aton an pangatadongan ha bisan hin-o nga nakontra ha aton, an pagbasa ha ira mga libro o blog, an pagbisita ha ira mga website, o an pagkita han ira mga video. May kalabotan ha mga tawo nga naniningkamot nga paundangon an iba ha ira maunungon nga pag-alagad kan Jehova, hi Jesus nagsiring: “Pabay-i hira. Mga buta hira nga paratugway. Salit kon an usa nga buta nagtutugway ha igkasi-buta, hira nga duha mahuhulog ha buho.”—Mateo 15:14.
2. Ha ano nga mga paagi bangin makurian kita nga makapabilin nga maunungon kan Jehova tungod han aton personal nga mga desisyon?
An gugma kan Jehova magpapagios ha aton nga likayan nga mahidabi ha buwa nga relihiyon ha bisan ano nga paagi. Kinahanglan diri konektado ha buwa nga relihiyon an aton trabaho, an mga organisasyon nga aton gin-aapihan, ngan an bisan ano nga aton ginbubuhat. Hi Jehova nagpapahamangno ha aton: “Gawas ha [Babilonya nga Gamhanan], katawohan ko.”—Pahayag 18:2, 4.
DUGANG NGA USISAHA
Hibaroi kon paonan-o mo malilikyan nga paluyahon han iba an imo determinasyon nga magpabilin nga maunungon kan Jehova. Hibaroi liwat kon paonan-o mo maipapakita an imo pagin maunungon pinaagi ha paggawas ha Babilonya nga Gamhanan.
3. Pagbantay ha buwa nga mga magturutdo
Ano an angay nga magin reaksyon naton kon makabati kita hin negatibo nga mga butang mahitungod ha organisasyon ni Jehova? Basaha an Proberbios 14:15, katapos, hisguti niyo ini nga pakiana:
-
Kay ano nga nagbabantay kita nga diri tumoo ha ngatanan nga aton nababatian?
Basaha an 2 Juan 9-11, katapos, hisguti niyo ini nga mga pakiana:
-
Ano an angay nga magin pagtratar naton ha mga apostata?
-
Bisan kon diri kita direkta nga nakikiistorya ha mga apostata, paonan-o kita mahimo maimpluwensyahan han ira mga katutdoan?
-
Para ha imo, ano daw la an aabaton ni Jehova kon mamamati kita ha negatibo nga mga istorya mahitungod ha iya o ha iya organisasyon?
4. Magpabilin nga maunungon ha Dios kon an usa nga bugto nakasala
Kon mahibaro kita nga may bugto ha kongregasyon nga nakabuhat hin seryoso nga sala, ano an aton obligasyon? Usisaha an usa nga prinsipyo tikang ha Balaud han Dios ha kadaan nga Israel. Basaha an Levitico 5:1.
Sugad han iginsugo hito nga bersikulo, kon may mahibaroan kita nga usa nga tawo nga nakabuhat hin seryoso nga sala, kinahanglan isumat naton ha mga tigurang kon ano an aton nahibabaroan. Pero antes ito buhaton, magpapakita kita hin pagkabuotan kon aaghaton naton an nakasala nga hiya mismo an dumaop ha mga tigurang ngan magsumat han iya sala. Kon diri niya ito buhaton, an aton pagkamaunungon kan Jehova an magpapagios ha aton nga isumat ha mga tigurang an aton nahibabaroan. Paonan-o an sugad nga paagi nagpapakita hin maunungon nga gugma . . .
-
kan Jehova nga Dios?
-
ha tawo nga nakasala?
-
ha iba pa ha kongregasyon?
Kon an igkasi-tumuroo may problema, buligi hiya!
5. Gawas ha Babilonya nga Gamhanan
Basaha an Lucas 4:8 ngan Pahayag 18:4, 5, katapos, batona ini nga mga pakiana:
-
An akon ba ngaran nakalista la gihapon sugad nga membro han usa nga buwa nga relihiyon?
-
Membro ba ako han usa nga organisasyon nga konektado ha iba nga relihiyon?
-
An akon ba trabaho nasuporta ha buwa nga relihiyon ha bisan ano nga paagi?
-
May-ada ba iba pa nga bahin ha akon kinabuhi diin kinahanglan ko bumulag ha buwa nga relihiyon?
-
Kon oo an akon baton ha bisan hain hini nga mga pakiana, ano nga mga pagbag-o an kinahanglan ko himoon?
Ha ngatanan nga kahimtang, paghimo hin desisyon nga maghahatag ha imo hin limpyo nga konsensya ngan magpapakita han imo pagkamaunungon kan Jehova.
Ano an imo hihimoon kon hangyoon ka nga maghatag hin kontribusyon ha usa nga charity nga may kalabotan ha relihiyon?
AN IBA NASIRING: “Kinahanglan ko mahibaroan an ginsisiring han mga apostata mahitungod ha mga Saksi ni Jehova basi madepensahan ko an kamatuoran.”
-
Maaramon ba ito? Kay ano?
SUMARYO
Basi magpabilin nga maunungon kan Jehova, kinahanglan likyan naton an pakig-upod ha mga tawo nga nangangalimbasog nga limbongan kita.
Repaso
-
Kay ano nga diri kita angay mamati ha mga ideya han mga apostata?
-
Kon mahibaroan naton nga an usa nga bugto nakabuhat hin seryoso nga sala, ano an dapat naton buhaton?
-
Paonan-o naton masusunod an pahamangno nga pumalagiw tikang ha buwa nga relihiyon?
DUGANG NGA IMPORMASYON
Hibaroi kon ano an bubuhaton kon an iba nagsusumat hin sayop nga impormasyon mahitungod ha mga Saksi ni Jehova.
“May-ada Ka ba han Husto nga Impormasyon?” (An Barantayan, Agosto 2018)
Paonan-o mo mahibabaroan kon an mga organisasyon o mga buruhaton nasuporta ha Babilonya nga Gamhanan?
Ano an ginbubuhat han pipira nga mga nakontra ha aton basi paluyahon an aton pagtoo?
Ha artikulo nga “Nagpinamiling Ako ha Dios Tikang Pa ha Pagkabata,” basaha an mahitungod ha usa nga padi han Shinto nga binaya ha buwa nga relihiyon.
“An Biblia Nakakagbag-o han Kinabuhi” (An Barantayan, Hulyo 1, 2011)
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
