Tin riyul’ e Kristiano e kar dugliyed u wan’rad ndab ra paged ban’en ara be’ ni nge magawonnag e liyor rorad ngak Jehovah. Dariy e maruwar riy ni aray rogon e lem rom. Ba ga’ fan e yul’yul’ rom u wan’ Jehovah. (Mu beeg e 1 Kronicles 28:9.) Ere mang boch ban’en nrayog ni nge skengnag rogon e yul’yul’ rom ngak, ma mang e rayog ni nge ayuwegem?

1. Uw rogon nrayog ni nge skengnag yugu boch e girdi’ e yul’yul’ rodad ngak Jehovah?

Bay boch e girdi’ ni yad ra guy rogon ni ngar taleged gadad ndab kud pigpiggad ngak Jehovah. Mini’ e pi cha’ney? Bay boch e girdi’ ni kar digeyed e tin riyul’ ni yad ma weliy boch ban’en nde riyul’ u murung’agen e ulung rok Got ya ngar warnaged e michan’ rodad. Pi girdi’ ney e yima yog ni yad e piin kar digeyed e tin riyul’ kar chelgad yad be togopuluw ngay. Ku bay boch e tayugang’ ko teliw ni yad ma wereg boch ban’en nde riyul’ u murung’agdad ya ngar k’aringed e piin ndarur kol ayuwgad ni ngar digeyed e tin riyul’. De fel’ ni ngaud luaged e pi tatogopuluw e thin, ara da beeged e pi babyor rorad ara pi n’en yad ma tay ko Internet, ara darod ko pi website rorad, ara ud yaliyed e pi video rorad. I weliy Jesus murung’agen e piin yad ma guy rogon ni ngar taleged yugu boch e girdi’ ndab kur pigpiggad ngak Jehovah ni gaar: “Mpaged yad! Ya yad be pow’iy e girdi’ ma yad mmalmit; ma faanra kol reb e malmit pa’ reb e malmit ngi i pow’iy i yan, ma yow l’agruw ni yow ra mul nga wuru’ e kanawo’ nga lan wol’ e ran.”​—Matthew 15:14.

Uw rogon ni faanra bay be’ ni gad manang ni ke dugliy ndab ki mang reb e Pi Mich Rok Jehovah? Rayog ni ngari kireban’dad ni faanra be’ nib chugur ngodad e ke rin’ e re n’ey. Rayog ni nge towasariydad e cha’nem ni ngad dugliyed ko ngad manged ngak ara ngad pared u ba’ rok Jehovah. Thingar da dugliyed u wan’dad ni yigoo Got e ngad pared ni gad ba yul’yul’ ngak. (Matthew 10:37) Ere gad ma fol ko n’en ke tay Jehovah chilen ni aram e dab ud chaggad ko girdi’ ni aray rogon.​—Mu beeg e 1 Korinth 5:11.

2. Mang boch ban’en ni gad ma dugliy nrayog ni nge skengnag e yul’yul’ rodad ngak Jehovah?

T’ufeg rodad ngak Jehovah e ra k’aringdad ndab da uned nga ban’en ni ma rin’ e pi yurba’ i teliw ni googsur. Maruwel ni gad ma un ngay, ara pi ulung ni gad bang riy, ara pi n’en gad ma rin’ e susun e dariy ban’en riy ni nge l’ag rogon ko teliw ni googsur. Ke ginangdad Jehovah ni ke gaar: “Mired pi girdieg ngam chuwgad rok [fare Babylon nib Gilbuguwan]!”​—Revelation 18:2, 4.

 KUM FIL BOCH BAN’EN U MURUNG’AGEN

3. Mu kol ayuw ko pi tamachib ni googsur

Mang e susun ni ngad rin’ed ni faanra kad rung’aged boch ban’en nib kireb ni kan weliy u murung’agen e ulung rok Jehovah? Mu beegew e Proverbs 14:15, mi gimew weliy e fulweg ko re deer ni baaray:

• Mang fan ni gad ma kol ayuw ndabi mich u wan’dad urngin ban’en ni gad be rung’ag?

Mu beegew e 2 John 10, mi gimew weliy e fulweg ko pi deer ni baaray:

• Susun nge uw rogon e ngongol rodad ngak e piin kar digeyed e tin riyul’ ma kar chelgad yad be togopuluw ngay?

• Uw rogon nrayog ni nge m’ug riy ni gad be motoyil ko pi girdi’ ney ni yugu aram rogon ndarud nonad ngorad?

• Ga be lemnag ma uw rogon u wan’ Jehovah ni faanra ud motoyilgad nga boch ban’en nib kireb ni yibe weliy u murung’agen ara ulung rok?

4. Mu par ni gab yul’yul’ ngak Got u nap’an nra denen reb e walag

Mang e ba milfan ngodad u nap’an ni gad ra nang ni ke rin’ be’ u lan e ulung reb e denen nib ubchiya’? Am lemnag fare kenggin e motochiyel ni bay ko fare Motochiyel ni pi’ Got ngak piyu Israel. Mu beegew e Levitikus 5:1.

Be tamilangnag e re verse ney ni faanra kad nanged ni ke rin’ be’ reb e denen nib ubchiya’, ma susun e nga dogned ngak e piin piilal. Machane u m’on riy mab fel’ ni nga dogned ngak ni nge yan i guy e piin piilal nge weliy ngorad e kireb ni ke rin’. Faanra dabi rin’, ma yul’yul’ rodad ngak Jehovah e ra k’aringdad ni nga darod dogned e re n’ey ngak e piin piilal. Faan gad ra rin’ e re n’ey, ma uw rogon nra m’ug riy ni gad be dag e t’ufeg u fithik’ e yul’yul’ ngak . . .

• Jehovah Got?

• faen ke denen?

• e tin ka bay e girdi’ u lan e ulung?

 5. Mu par u orel ko fare Babylon nib Gilbuguwan

 N’EN KAN FIL

Ra ngad pared ni gad ba yul’yul’ ngak Jehovah, mab t’uf ndab ud chaggad ngak e piin ndar yul’yul’gad ngak. Kub t’uf ni ngad chuwgad ko pi yurba’ i teliw ni googsur.

Ngan Sul u Daken

• Mang fan nsusun e dab ud yaliyed, ara ud beeged, ara ud motoyilgad ko pi machib rok e piin kar digeyed e tin riyul’ ma kar chelgad yad be togopuluw ngay?

• Susun nge uw rogon e ngongol rodad ngak e piin kar dugliyed ndab kur manged boch e Pi Mich Rok Jehovah?

• Uw rogon nrayog ni ngad folgad ko fare thin ni be yog ni ngad chuwgad ko teliw ni googsur?