Kuisi ko kima voti mutu kilenda kakidila nguizani yi mukristu ayi Yehova. Mu kondo finda phaka, ngeyo phe buawu weta muena. Yehova weta yangalala buwombo mu kuikama ko widi kuidi niandi. (Tanga 1 Lusansu 28:9.) Mambu mbi malenda tula kuikama kueto kuidi Yehova mu nzomono? Ayi bue bunungina nzomono beni?

1. Bue bankaka belanda tomba kututatudila ayi Yehova?

Batu bankaka balenda tomba kutukandika tubika sadila Yehova. Batu beni, yilenda ba batu bo babika kiedika ayi balembo tembikisa mambu maluvunu mu diambu di khubukulu yi Nzambi mu lukanu luvonda minu kieto. Bawu badi batu bo babika kiedika. Kuidi diaka ayi bamfumu zi mabundu bo beta tembikisa mambu ma luvunu mu diambu dieto muingi bavukumuna bakristu bawombo babotuka mu kiedika. Didi diambu dimbimbi mu tula ziphaka ayi batu ba phila yoyi voti landakana mambu mawu. Kuidi batu bo beta zola vonda kuikama kueto kuidi Yehova, Yesu tubidi ti: ‘Lubabika. Badi baphovo bo balembo nati baphovo bankaka. Enati phovo wulembo monisa phovo yandi nzila, baba buadi bafueti tibuka mu dibulu.’—Matayi 15:14.

Buabu enati tuwilu nkundi’eto mosi voti khomb’eto mu khati dikanda beki kuandi nzengolo mu kondo bue ba Mbangi Yehova? Yikala diambu dimosi dieta tutula ziphasi ziwombo mu ntima. Mutu beni kalenda tula mu tezo ki kukamba ti: “Yehova voti minu.” Diawu tufueti baka nzengolo yi ba bakuikama kuidi Yehova viokila bima bioso binkaka. (Matayi 10:37) Ayi tueta tumukina nsiku Yehova wo wukembi ti tubika bue ba yandi kithuadi.—Tanga 1 Kolinto 5:11.

2. Bue kuikama kueto kueta monikina mu mambu mo tueta sobula?

Mu luzolo lo tukala kuidi Yehova, tulendi bue ba ko nguizani ayi mabundu maluvunu. Yawu yinsundula ti tuedi kota ko mu mambu ma mabundu maluvunu banga kisalu, kimvuka ayi mangumba mawu. Mu diambu ditedi ‘‘Babiloni dinneni’’, Yehova wutukembi mboti mboti ti: “A batu bama, bika lubotuka va khati tsik’andi.”—Tsongolo 18:2, 4.

 TUVISA MBOT MBOTI

3. Kebila minlongi mi luvunu

Mbi fueti tula enati wilu mutu mosi wumvuezila khubukulu yi Yehova? Tanga Zingana 14:15 ayi vana mvutu mu kiuvu kiaki:

• Bila mbi tulendi ko kikinina mambu moso mo tueta wa?

Tanga 2 Yowani 10 ayi vana mimvutu mu biuvu biabi:

• Bue tufueti tadila batu bo babika kiedika?

• Bu ba ti tusolulanga ko ayi batu bo babika kiedika, bue mabanza mawu malenda tudila kuidi beto?

• Mu ngeyo, bue Yehova maka muena mu thangu tulembo wa batu bo balembo tubi mambu mambimbi mu niandi ayi khubukulu’andi?

4. Mu thangu khomba mosi kavengi disumu

Enati tumueni khomba mosi mu khatika kimvuka vengi disumu dinneni, mbi tufueti tula? Muingi tuzaba mbi tufueti tula, tutala verse yo yintubila nsiku wo Yehova kavana bana ba Iseli. Tanga 3 Mose 5:1.

Mu tadila tsikudukusu yo tumueni mu verse yoyi, enati tumueni khomba mosi vengi disumu dinneni, tufueti kamba bakulutu. Vayi tuamina wenda kuidi bakulutu, bufueni wubata mutu nio vengi disumu ayi wunkindisa kenda bati bakulutu. Enati kakadi butudila, kuikama kueto kuidi Yehova makututuma tue bati bakulutu ayi ku bakamba diambu dio kavengi. Bue tudila phila beni yoyi, yilembo monisina luzolo lueto lukuikama kuidi . . .

• Yehova?

• mutu nio vengi disumu?

• bakhomba bankaka ba kimvuka?

 5. Tatukila Babiloni dinneni

 MU BUKHUFI

Mu kuikama ko tuidi kuidi Yehova, tulendi ko bundana ayi batu bo babika Yehova ayi tufueti tatamana tatukila mabundu maluvunu.

Phutukulu

• Bila mbi kawedi tadila ko, tanga voti wa mambu mo mantuba batu bo babika kiedika?

• Bue tufueti tadila batu bobo bamengi kuawu bo ba Bambangi zi Yehova?

• Bue mukristu kalenda monisina ti bikidi dibundu diluvunu?