Toʼon k-meyajtik Jéeobaeʼ k-chʼaʼtukultmaj maʼ k-náachtal tiʼ letiʼ. K-ojel teech xaneʼ láayliʼ bey a tuukuloʼ, Jéeobaeʼ jach ku apreciartik u chúukpajal a wóol (xok 1 Crónicas 28:9). ¿Bey baʼax jeʼel u beetik a náachtal tiʼ Jéeobaeʼ? ¿Baʼax jeʼel a beetik utiaʼal maʼ a chaʼik a náachkuntaʼal tiʼ letiʼeʼ?

1. ¿Baʼax jeʼel u beetik u maasil utiaʼal u náachkuntkoʼon tiʼ Jéeobaeʼ?

¿Bey máaxoʼob jeʼel u yilik u náachkuntkechoʼob tiʼ Jéeobaeʼ? Jujuntúuloʼobeʼ letiʼe apóstataʼoboʼ, letiʼobeʼ tu xúumpʼattoʼob u kaajal Jéeoba. Uláakʼoʼobeʼ letiʼe u nuuktakil le religiónoʼoboʼ tumen ku yaʼalikoʼob baʼaloʼob maʼ jaajtak tu contra u kaajal Jéeobaiʼ. Jach kʼaʼabéet k-kanáantik maʼ k-tsikbal yéetel le máakoʼob beyoʼ, maʼ k-xokik le libroʼob ku jóoʼskoʼoboʼ, le baʼaloʼob yaantiʼob ich Internetoʼ mix le videoʼob ku jóoʼskoʼoboʼ. Jesúseʼ tu yaʼalaj yoʼolal le máaxoʼob ku yilik u náachkuntkoʼob máak tiʼ Jéeobaoʼ: «Maʼ a beetkeʼex u cuentailoʼob. Letiʼobeʼ beyoʼob jeʼex le máakoʼob chʼóopoʼob ku nuʼuktikoʼob uláakʼ máakoʼoboʼ. Le oʼolaleʼ wa juntúul chʼóop ku nuʼuktik u yéet chʼóopileʼ tu kaʼatúulal kun lúubloʼob tiʼ junpʼéel jool» (Mateo 15:14).

2. ¿Bix jeʼel k-eʼesik jach tu jaajil chúukaʼan k-óol tiʼ Jéeobaeʼ?

Toʼoneʼ k-yaabiltmaj Jéeoba, le oʼolal maʼatech k-oksikba tiʼ baʼaxoʼob yaan yil yéetel le religiónoʼob maʼatech u kaʼanskoʼob u jaajiloʼ. Tak le meyaj k-beetkoʼ unaj k-ilik maʼ u yantal mix baʼal u yil yéetel le religiónoʼobaʼ. Tsʼoʼoleʼ wa táakaʼanoʼon ichil junpʼéel organizacióneʼ unaj k-ilik xan maʼ u yantal mix baʼal u yil yéetel le maʼ jaajil religiónoʼoboʼ. Jéeobaeʼ ku yaʼaliktoʼon lelaʼ: «In kaajal, jóokʼeneʼex tiʼ le kaajaʼ» wa tiʼ le Nojoch Babiloniaoʼ (Apocalipsis 18:2, 4).

 UTIAʼAL A MAAS NAʼATIK

3. Kanáantaba tiʼ le máaxoʼob maʼ tu kaʼanskoʼob u jaajiloʼ

¿Baʼax unaj k-beetik wa k-uʼuyik u yaʼalaʼal baʼaloʼob maʼ jaajtak tu contra u kaajal Jéeobaiʼ? Xokeʼex Proverbios 14:15, kéen tsʼoʼokkeʼ ka tsikbaltikeʼex lelaʼ:

• ¿Baʼaxten maʼ unaj k-creertik tuláakal le baʼax ku yaʼalaʼaloʼ?

Xokeʼex 2 Juan 9-11, kéen tsʼoʼokkeʼ ka tsikbaltikeʼex lelaʼ:

• ¿Maʼalob wa ka k-bisba yéetel le apóstataʼoboʼ?

• Kex maʼatech k-bisikba yéetel le apóstataʼoboʼ, ¿bix jeʼel u kʼaskúuntik k-tuukul le baʼaxoʼob ku kaʼanskoʼoboʼ?

• ¿Bix jeʼel u yuʼubikuba Jéeoba wa ku káajal k-uʼuyik le baʼaloʼob ku yaʼalaʼal tu contraoʼ bey xan tu contra u kaajaloʼ?

4. Chúukpajak a wóol tiʼ Jéeoba kéen kʼebanchajak juntúul sukuʼun

¿Baʼax kʼaʼabéet k-beetik wa k-ojéeltik juntúul sukuʼuneʼ tsʼoʼok u lúubul tiʼ junpʼéel nojoch kʼeban? Ilawil baʼax ku yaʼalik le Ley tu tsʼáaj Jéeoba tiʼ le israelitaʼoboʼ. Xokeʼex Levítico 5:1.

Jeʼex u yaʼalik le tekstooʼ wa k-ojéeltik yaan máax tsʼoʼok u kʼebantal teʼ múuchʼuliloʼ unaj k-aʼalik tiʼ le ancianoʼoboʼ. Chéen baʼaleʼ antes tiʼ leloʼ unaj k-tʼaan yéetel le máax kʼebanchajoʼ utiaʼal k-aʼaliktiʼ kʼaʼabéet u yaʼalik tiʼ le ancianoʼob le baʼax tsʼoʼok u beetkoʼ. Pero wa maʼ tu yaʼalik tiʼ le ancianoʼoboʼ toʼon unaj k-aʼaliktiʼob, beyoʼ k-eʼesik chúukaʼan k-óol tiʼ Jéeoba. ¿Baʼaxten kéen k-beet beyoʼ k-eʼesik k-yaabiltmaj...

• ... Jéeoba?

• ... le máax kʼebanchajoʼ?

• ... le múuchʼuliloʼ?

5. Jóokʼkech tiʼ le Nojoch Babiloniaoʼ

 BAʼAX TSOʼOLI

Wa k-kʼáat ka chúukpajak k-óol tiʼ Jéeobaeʼ maʼ unaj k-bisikba yéetel máaxoʼob chéen taak u tuskoʼonoʼobiʼ.

Baʼax ta kanaj

• ¿Baʼaxten maʼ unaj k-uʼuyik baʼax ku yaʼalik le apóstataʼoboʼ?

• ¿Baʼax unaj k-beetik wa k-ojéeltik tsʼoʼok u kʼebantal juntúul sukuʼun?

• ¿Baʼax unaj k-beetik utiaʼal k-jóokʼol tiʼ le religión maʼatech u kaʼansik u jaajiloʼ?