Ca ni dxandíʼ naca xpinni Cristu maʼ gudixhe íquedu cadi gucueeza guirutiʼ nin gastiʼ laadu de guni adorardu Jehová. Ne nánnadu nga peʼ nga ni runi sentirluʼ, ne guizáʼ rusisaca Jehová lii purtiʼ naguixhe íqueluʼ cadi gusaanaluʼ laa (biindaʼ 1 Crónicas 28:9). ¿Xii nga ca cosa ni zándaca gucaa lii guixéleluʼ de Dios yaʼ? ¿Xi zanda gúniluʼ para gudxiiluluʼ ca ni yaʼ?

1. ¿Ximodo zanda gucaa xcaadxi binni laanu guixélenu de Jehová?

Ziuu tu zacalaʼdxiʼ gusaana de gúninu ni ná Jehová. ¿Tu zándaca gucaa laanu gúninu ni yaʼ? Nuu caadxi binni ni guca xpinni Jehová dxiqué peru yanna rizacaʼ riniʼcaʼ cosa ni cadi dxandíʼ de xquidxi Dios para cueecaʼ gana laanu. Runibiaʼnu ca binni riʼ casi apóstata. Laaca nuu stale líder stiʼ ca religión ca riniʼcaʼ cosa ni cadi dxandíʼ de ca Testigu para guxhélecaʼ guiráʼ ni cadi zuhuaa dxiichiʼ de xquidxi Jehová. Ne nabé malu nga guinínenu ca binni ni rucaalú xquidxi Dios, guidúʼndanu ca libru sticaʼ, chuʼnu lu ca página de internet ni nápacaʼ o guidúʼyanu ca videu sticaʼ. Sicaríʼ guníʼ Jesús ora bizeeteʼ de ca binni ni racalaʼdxiʼ gucaacaʼ laanu gusaananu Jehová: «Zaa nuucabe. Nácacabe guía ciegu. Nga runi, pa guni guiar ti ciegu sti ciegu la? ziaba guirópacaʼ ndaaniʼ ti barranca» (Mateo 15:14).

¿Xi rizaaca ora maʼ qué racalaʼdxiʼ tuuxa ni runibiaʼnu gaca testigu stiʼ Jehová? ¿Cadi dxandíʼ nabé riuubaʼ ladxidoʼno ne jmaruʼ si pa nácabe familia stinu la? Zándaca gucaa binni riʼ laanu cuinu o Jehová la? o laa. Peru neca guixélecabe de Jehová, laanu maʼ gudixhe íquenu qué zusaananu laabe (Mateo 10:37). Nga runi, rinándanu ley ni maʼ gudixhe Jehová ni cuzeeteʼ cadi guidxaaganu ca binni riʼ (biindaʼ 1 Corintios 5:11).

2. ¿Ximodo rusihuínninu qué racaláʼdxinu guixélenu de Jehová pur ca decisión ni guicaanu?

Cumu nadxiinu Jehová la? qué racaláʼdxinu gácanu parte de ca religión ni qué rusiidiʼ ni dxandíʼ. Nga runi, cadi naquiiñeʼ gusihuinni dxiiñaʼ ni rúninu o xiixa organización ni nuunu lade cayuni apoyarnu ca religión ni qué rusiidiʼ ni dxandíʼ. Ndiʼ nga ca diidxaʼ ni cayabi Jehová xquidxi: «Laguiree de ndaaniʼ guidxi ca» o laguiree de Babilonia guidxi roʼ (Apocalipsis 18:2, 4).

 GUIZÍʼDIRUNU JMA

3. Gupa cuidadu né ca binni ni qué rusiidiʼ ni dxandíʼ

¿Xi gúninu pa gunadiáganu caníʼcabe mal de organización stiʼ Jehová yaʼ? Laguundaʼ Proverbios 14:15 ne laiquiiñeʼ pregunta riʼ para güitu diidxaʼ:

• ¿Xiñee naquiiñeʼ gácanu binni nuu xpiaaniʼ ne cadi guni crenu guiráʼ ni runadiáganu?

Laguundaʼ 2 Juan 10 ne laiquiiñeʼ ca pregunta riʼ para güitu diidxaʼ:

• ¿Ximodo naquiiñeʼ guni tratarnu ca apóstata?

• Neca qué rinínenu ca apóstata, ¿ximodo zanda gucaacabe laanu guchaʼnu modo riníʼ íquenu?

• ¿Ximodo rábiluʼ zuni sentir Jehová pa gucaʼdiáganu guiráʼ cosa ni cadi dxandíʼ riníʼcabe de laabe ne de organización stibe?

4. Gusihuínninu nuunu pur Jehová ora guni ti hermanu ti pecadu

Pa málasi gánnanu biʼniʼ tuuxa de ndaaniʼ congregación ti pecadu grave, ¿xi caquiiñeʼ gúninu? Guidúʼyanu xi zanda guizíʼdinu de Ley ni bidii Jehová guidxi Israel. Laguundaʼ Levítico 5:1.

Nayaʼniʼ modo cusiene versículo riʼ laanu caquiiñeʼ gábinu ca ancianu ni bizaacaʼ pa málasi gueeda gánnanu biʼniʼ tuuxa binni ti pecadu grave. Peru ante gúninu ndiʼ la? ni jma jneza gúninu nga gábinu binni ca naquiiñeʼ guiniʼné ca ancianu ne gabi laacabe xi guiráʼ bizaaca. Pa qué gúnibe ni la? ti modo zanda gusihuínninu nuunu pur Jehová nga gábinu ca ancianu ni bizaaca. Ne pa gúninu ndiʼ, ¿xiñee cusihuínninu nadxiinu ne qué racaláʼdxinu gusaananu...

• ... Jehová?

• ... binni ni maʼ bichee ca?

• ... congregación?

 5. Guixélenu de Babilonia guidxi roʼ

 XI BIZÍʼDINU

Para cadi gusaananu Jehová la? cadi naquiiñeʼ guidxaaganu ca binni ni rusaana laabe. Laaca caquiiñeʼ guixélenu de religión ni qué rusiidiʼ ni dxandíʼ.

Xi biziidiluʼ

• ¿Xiñee cadi naquiiñeʼ guidúʼyanu, guidúʼndanu o gucaadiáganu ni riníʼ ca apóstata?

• ¿Ximodo naquiiñeʼ guni tratarnu tuuxa ni maʼ qué racalaʼdxiʼ gaca testigu stiʼ Jehová?

• ¿Xi caquiiñeʼ gúninu para guireʼnu de ndaaniʼ religión ni qué rusiidiʼ ni dxandíʼ?