Ndikidi aKristano nadiaberã ka zanga mbu ai he watadu ai boro ni rugusi yo ti iriso Yekova. Zanga kapa, wodu mo abihe. Yekova nabi gamo padu ni ruruse na nyanyakipaha. (Mo gedi 1 Pekapai 28:9) Gini apai rengbe ka asada gamo pa du ni ruruse na waigu rengbe mo ka mangapai kuti ni?

1. Waigu rengbe kura aboro ka asada gaani pa du ni ruruse fu Yekova?

Kura aboro ima rengba ka asada ka rugusa rani ti iriso Yekova. Ada du rengbe ka manga gu riko gbegberẽpai re? Gu bete aboro mbu rengo nagumba aziree tipa ga Mbori riigbu tipa ka gbarasa gaani idapase. I nayamba yo nga abasamungu. Berewe a, bete abangbembatayo rogo apambori nagumba aziree tipa rani tipa ka sa agu aboro adunga na rubangirise ya i mbu rengo. Si ni kerepai furani kaa sakapai na agu aboro nasoga rengo, kaa geda gayo abuku, kaa ndu kurogo gayo abangiriba nga ga Internet watadu kaa bi gayo avidio. Nibipa agu aboro naasada ka ba gberãrago ti kura aboro nga aguyo naida ka iriso Yekova ni ruru yo, Yesu aya: ‘Oni he yo ahe; i nga angbembatayo fu aboro ni airavurari. Ka iravurari ngbe mbata yo fu kura iravurari, i tiwi atiwa ku due yo ue.’—Matayo 15:14.

Na ka si du nga gu boro ani naima ino ni diberã nga ni aidanga ka du berewe ni Dezire Yekova te? Si ima rengba ka du ni parungo gbe, ho gu boro du mbembedi na ani namangi gupai re ni. Gu boro re ima rengba ka sarani ani mangi siapai singia ni ani aida ni watadu Yekova. Ani du wa ka ani diberã ka nye ni rururani fu Mbori sa angianga fu ai boro ya. (Matayo 10:37) Sidu, ani namangapai kuti gu ga Yekova arugute naya, si aidanga ani koditirani na gi ngbatunga aboro re te.—Mo gedi 1 AKorindo 5:11.

2. Waigu rengbe agu adiaberã ani amangaha nitirani ka yugoho singia ani ni ruru rani fu Yekova?

Gaani nyemuse tipa Yekova nika sarani ani zanga rimiso tirani ku rogo ziree pambori. Si aidanga singia gaani sunge watadu gu riigbu du ani rogoho, watadu ai gu pai ani amangaha, du na ngbanya dagbaha na ziree pambori te. Yekova naza rani nga: ‘Oni kúru [Babera yo Duna Bakere Ome Ti Ni], gimi aboro.’—Yugoti 18:2, 4.

 MO WIRIKI KURA DUNGU APAI

3. Mo du na rubangirise na ziree abayugupai

Waigu rengbe ani ka mangapai ka ani gi agu apai arunga ya tipa ga Yekova riigbu? Mo gedi Asanza 14:15, na tifuoho, mo ki sakipai tipa gi sanahe re:

• Tipagine si aida ani du ti ni na rubangirise tipa ka zanga ida kuti agu apai dunduko ani agiaha?

Mo gedi 2 Yoane 10, na tifuo-ho, mo ki sakipai tipa agi asanahe re:

• Wai du si aida ani mangipai na abasamungu?

• Ka si vura du vurũ nga ani afuranga na abasamungu te, wai gu rengbe ani kaa dega turani kuti gayo ayugopai?

• Mo naberãha nga Yekova rengbe ka du wai ka si dunga ani nadegaturani kuti gu gbegberẽ apai i apehe tipa ko watadu ga ko riigbu?

4. Mo nye ni ruru ro fu Mbori ho wirina amanga ingapai ni

Ka ani bi gupai nga boro rogo dungurati mangi kere ingapai, gini tindiro du berani? Mo bingo gu bangua arengo du rogo ga Mbori andiko nadu fu agu aYisaraere nadu mbata. Mo gedi Pa Amotumo 5:1.

A wa i nayuguhe rogo gi veresi re, ka ani bi gupai nga boro ima manga kere ingapai, si naida ani pe gupai fu abaakumba ani nainihe. Ono tie, mbata fu manga anihe wo, si adu ni wenepai ka zungadi gu boro mangi ingapai re ni ndu ni ti ni fuo abaakumba ka kusa gani ingapai. Ka ni amanganga ha wo ya, si naida gaani pa du ni ruruse fu Yekova fõ rani ani pe gupai fu abaakumba ani nainihe. Waigu gi ngbatunga mangapai re ayugo gaani nyemuse tipa . . .

• Yekova Mbori?

• gu boro mangi ingapai?

• kura aboro rogo dungurati?

 5. Mo kpara tiro kusayo ti Babera Duna Bakere Ome Ti Ni

 GINIPAI MO NAWIRIKIHE?

Tipa ka nye ni ruru rani fu Yekova, si naida ani ne koda tirani na agu aboro adunga ni ruru yo fu ko ya. Si naida a ani kpara tirani kusa yo ti ziree pambori.

Fugöpai

• Tipagine si aidanga ani naabiko agu avidio nga ga abasamungu kuti ndikidi pambori ti ni, kini gedi watadu kaa degeturani kuti gayo aberãpai ya?

• Waigu si aida ani naamangapai na agu aboro aidanga ka du berewe ni aDezire Yekova ya?

• Waigu rengbe ani ka mangapai kuti gu zahe nga ga kura kusayo rogo ziree pambori?