Lóono ni nacno cristianos ni rony xinésni ma goloʼno guicno que diti noʼ xi guicaa lóno par gony adorarno Jehová. Nandxichdo que scá rasaclo, né par Jehová nigolú rasac ni ma goloʼlo guiclo dipa guisianlo láabu (bíil 1 Crónicas 28:9). ¿Xí láani labúu nagoʼ prueby looy par ñalsitlo de Dios? ¿Né xí labúu ñonylo?

1. ¿Xí cós labúu ñony stipnés par ñalsitno de Jehová?

Tipnés buñ sayopy mod par galsitno de Jehová. ¿Chú labúu gony guirá ndeʼ? Por ejemplo, tipnés buñ ma bisianyibu xcudx Jehová né nigoreʼ ma caniʼyibu galrrascú de xcudx Dios par diti gapno fe. Guirá buñreʼ rareʼ laayibu buñ apóstatas. Láaca noʼ buñ ni rasanir lad religión ni rachetz galrrascú de lóono, modreʼ stipnés buñ ni diti nadip xfe labúu galsityibu de xcudx Jehová. Toib riesga láani tíilno né buñ ni rianladx xcudx Dios, golno xilibrayibu ló páginas de internet xtunyibu né guibiʼno videos xtunyibu. Noʼ buñ ni rayopy mod guisianno Jehová, Jesús goniʼ ndeʼ de layibu: «Diti coʼto cuent layibu. Nacyibu xomod toib buñdxep ni rasanés toib buñdxep. Né pal toib buñdxep rasanés a toib buñdxep guiropcayibu siabyibu lainy toib garió» (Mateo 15:14).

¿Né xí rac órni toib buñ ni rimbuno ragoʼ guic ma diti gac testigo xtuny Jehová? Órni toib buñ ni rimbuno rony modreʼ, labúu guisioʼobni xcalnabanyno. Sigory diti sadzel xcalrrienno xi gonyno: gony apoyarno Jehová la o láabu. Per gonyno rutirigaʼlni lóono par diti guisianno Dios (Mateo 10:37). Por ngú rasobno ni rony mandary Jehová lóono diti guidzakno buñ de clas reʼ (bíil 1 Corintios 5:11).

2. ¿Xí láani labúu nagoʼ prueby lóono par guisianno Jehová?

Nadxiʼno Jehová, por ngú diti radzakno religión falz. Nili xchiinno, nili stipnés organización, nili cós ni ronyno diti non guidzakni religión falz. Jehová raibybu xcudxbu ndeʼ: «Colguireʼ ladni», ndeʼ radudy diitz Babilonia la Grande (Apocalipsis 18:2, 4).

 NANOY GUISUIDYNO LÁANI

3. Gop cuidad né ni raniʼ mextra falz

¿Xí láani gonyno pal racadiagno buñ ni raniʼ mal de xcudx Jehová? Colgoʼol Proverbios 14:15 né colgooy xtiitzni:

• ¿Xigony raquiin gapno cuidad né diti gonyno crer guirá ni raniʼ buñ?

Colgoʼol 2 Juan 10 né colgooy xtiitzni:

• ¿Non guidzakno buñ apóstatas la?

• Sigory diti radzakno buñ apóstatas; per ná scú, ni ronyibu pensary, ¿ximod labúu ñonyni mal lóono?

• Pal nagoʼno cuent guirá cós mal ni raniʼyibu de Jehová né xcudxbu, xpensarylo ¿ximod nasac Jehová?

4. Diti guisianlo Dios órni toib herman rony toib galkié

Pal ranno que toib herman ni noʼ lainy congregación ma buny toib galkié rodann, ¿xí láani non gonyno? Bisuidy toib principio ni radzelno ló Ley ni bidudy Dios gudx Israel ni goyoʼ ló dzú ni see. Colgoʼol Levítico 5:1.

Mod ritlaa ló versículo reʼ, pal ranno que toib buñ ma buny toib galkié rodann, non gaibyno ancianos ni ma nanno. Antes de gonyno ngú más galán gaibyno buñ ni buny galkiécu guininébu ancianos né guisetbu ni ma bunybu. Per pal diti ronybu láani, órcu ma lóono non gaibyno ancianos ni ma góc, modreʼ caslooyno que noʼno né Dios. Pal ronyno guirá ndeʼ, ¿ximod caslooyno galnadxiʼ...

• ... Jehová?

• ... buñ ni ma buny galkiécu?

• ... herman ni noʼ lainy congregación?

 5. Golsit de Babilonia la Grande

 ¿XÍ BISUIDYLO?

Pal nainy lóono dipa guisianno Jehová, diti guidzakno buñ ni ralsit de láabu. Láaca non guireʼno lad religión falz.

Repas

• ¿Xigony diti non guibiʼno, golno o guicadiagno ni raniʼ buñ apóstatas?

• ¿Labúu guidzakno buñ ni ma diti ná gac testigos xtuny Jehová la?

• ¿Xí non gonyno par guisobno ni raiby Jehová lóono par galsitno de guirá religión falz?