ISIFUNDO 58
Qhubeka Uqotho KuJehova
AmaKristu eqiniso azimisele ukungavumeli lutho noma ukungavumeli muntu awayekise ukukhonza uJehova. Siyaqiniseka ukuthi uzizwa kanjalo nawe. UJehova ubheka ubuqotho bakho njengento eyigugu. (Funda eyoku-1 IziKronike 28:9.) Yiziphi izimo ezingavivinya ubuqotho bakho kuye futhi ungabhekana kanjani nazo?
1. Abanye bangabuvivinya kanjani ubuqotho bethu kuJehova?
Abanye abantu bazozama ukusiyekisa ukukhonza uJehova. Obani abangenza into enjalo? Abanye abangasamkhonzi uNkulunkulu baqamba amanga ngenhlangano yakhe ukuze baqede ukholo lwethu. Babizwa ngokuthi izihlubuki. Ngaphezu kwalokho, abanye abaholi benkolo baqamba amanga ngathi ukuze bayekise abantu abangaqaphile ukukhonza uJehova. Kuyingozi ukuphikisana nanoma yiziphi izihlubuki, ukufunda izincwadi zazo noma lokho ezikubhala kuma-blog azo, ukungena kumawebusayithi azo noma ukubukela amavidiyo azo. Ngokuphathelene nalabo abazama ukuqeda abanye amandla okukhonza uJehova, uJesu wathi: “Bayekeni. Bangabaholi abayizimpumputhe. Uma impumputhe ihola impumputhe, zombili ziyowela emgodini.”—Mathewu 15:14.
Kuthiwani uma umuntu esimaziyo esenqume ukuthi akasafuni ukuba omunye woFakazi BakaJehova? Kungasizwisa ubuhlungu obukhulu lapho umuntu esisondelene naye enza lokho. Angase asiphoqe ukuba sikhethe phakathi kwakhe noJehova. Kumelwe sizimisele ukuba qotho kuNkulunkulu ngaphezu kwanoma yini enye. (Mathewu 10:37) Ngakho silalela umthetho kaJehova wokuba singazihlanganisi nabantu abanjalo.—Funda eyoku-1 Korinte 5:11.
2. Yiziphi izinqumo esizenzayo ezingase zivivinye ubuqotho bethu kuJehova?
Ukuthanda uJehova kuzosenza siyeke ukuzihlanganisa nenkolo yamanga. Imisebenzi yethu yokuziphilisa, izinhlangano esikuzo nanoma yini enye esiyenzayo akufanele kusihlanganise nenkolo yamanga. UJehova uyasixwayisa: “Phumani [eBhabhiloni Elikhulu], bantu bami.”—IsAmbulo 18:2, 4.
FUNDA OKWENGEZIWE
Funda ukuthi ungakugwema kanjani ukuvumela noma ubani aqede ubuqotho bakho kuJehova. Thola nokuthi ungabubonisa kanjani ubuqotho ngokuphuma eBhabhiloni Elikhulu.
3. Qapha abantu abafundisa amanga
Kufanele senzenjani lapho sizwa izinto ezimbi ngenhlangano kaJehova? Fundani izAga 14:15, bese nixoxa ngalo mbuzo:
-
Kungani kuwukuhlakanipha ukungakukholwa konke esikuzwayo?
Fundani eyesi-2 Johane 10, bese nixoxa ngale mibuzo:
-
Kufanele siziphathe kanjani izihlubuki?
-
Ngisho noma singazihlanganisi ngokuqondile nezihlubuki, singazithola kanjani izimfundiso zazo?
-
Ucabanga ukuthi uJehova angazizwa kanjani uma singalalela izinto ezimbi abazishoyo ngaye nangenhlangano yakhe?
4. Qhubeka uqotho kuNkulunkulu lapho umzalwane enza isono
Uma sithola ukuthi othile ebandleni wenze isono esibi kakhulu, yini okumelwe siyenze? Cabanga ngesimiso esiseMthethweni kaNkulunkulu asinikeza u-Israyeli wasendulo. Fundani uLevitikusi 5:1.
Njengoba leli vesi lisho, uma sithola ukuthi umuntu othile wenze isono esibi kakhulu, kufanele sitshele abadala lokho esikwaziyo. Kodwa ngaphambi kokuba ubatshele, uyobe ubonisa umusa uma ukhuthaza umenzi wokubi ukuba aye kubadala ayovuma isono sakhe. Uma engayi, ubuqotho bethu kuJehova kufanele busenze sibatshele abadala lokho esikwaziyo. Ukwenza kanjalo kubonisa kanjani ukuthi simthanda ngobuqotho . . .
-
uJehova uNkulunkulu?
-
umuntu owenze isono?
-
nabanye ebandleni?
Uma umuntu okholwa naye enze into embi, msize!
5. Phuma eBhabhiloni Elikhulu
Fundani uLuka 4:8 nesAmbulo 18:4, 5, bese uphendula le mibuzo:
-
Ingabe ngisabhalisiwe njengelungu lenkolo ethile yamanga?
-
Ingabe ngisenhlanganweni ethile esebenzelana nenkolo?
-
Ingabe umsebenzi wami uyisekela nganoma iyiphi indlela inkolo yamanga?
-
Zikhona yini ezinye izinto ekuphileni kwami ezingenza kudingeke ngizihlukanise nenkolo yamanga?
-
Uma ngiphendule ngoyebo kule mibuzo, yiluphi ushintsho okufanele ngilwenze?
Kuzo zonke lezi zimo, yenza isinqumo esizokushiya unonembeza ohlanzekile nesibonisa ukuthi uqotho kuJehova.
Ungenzenjani uma ungase ucelwe ukuba unikelele inhlangano ethile yenkolo?
ABANYE ABANTU BATHI: “Ngiyafuna ukwazi ukuthi izihlubuki zithini ngoFakazi BakaJehova ukuze ngivikele iqiniso.”
-
Kungaba ukuhlakanipha yini ukwenza kanjalo? Kungani usho kanjalo?
UKUBUYEKEZA
Ukuze siqhubeke siqotho kuJehova, kudingeka sigweme ukuzihlanganisa nabantu abangathembekile kuye. Kudingeka sizihlukanise ngokuphelele nanenkolo yamanga.
Ufundeni?
-
Kungani kungafanele sibukele, sifunde noma silalele izinto ezishiwo izihlubuki?
-
Kufanele sibaphathe kanjani labo abangasafuni ukuba oFakazi BakaJehova?
-
Singasilalela kanjani isixwayiso esithi masiphume enkolweni yamanga?
HLOLA OKWENGEZIWE
Funda ukuthi ungenzenjani lapho abanye besakaza izindaba ezingamanga ngoFakazi BakaJehova.
“Ingabe Unamaqiniso Aphelele Ngendaba?” (INqabayokulinda, Agasti 2018)
Ungathola kanjani ukuthi yiziphi izinhlangano noma izinto ezenziwayo ezisekela iBhabhiloni Elikhulu?
Yiziphi ezinye zezinto ezenziwe abaphikisi ukuze bazame ukusiqeda ukholo?
Endabeni ethi “Ngangilokhu Ngifuna UNkulunkulu Kusukela Ngiyingane,” funda ngompristi ongumShinto owagqashula enkolweni yamanga.
“IBhayibheli Lishintsha Ukuphila” (INqabayokulinda, Julayi 1, 2011)
Okunye Ongase Ukuthande
IMIBUZO EVAME UKUBUZWA
Siyini Isifundo SeBhayibheli Esilungiselelwe OFakazi BakaJehova?
Kulolu hlelo lwamahhala olulungiselelwe oFakazi BakaJehova, ungasebenzisa noma yiliphi iBhayibheli. Ungesabi ukumema bonke abakini nabangani ukuze bakujoyine.
