PWONY ME 59
Itwero Ciro Aunauna
Lukricitayo ducu gibiwok ki i adegadega ki aunauna i kare-ni nyo i anyim. Tika man myero okeliwa lworo?
1. Pingo wangeyo ni kibiunowa?
Baibul waco ka maleng ni: ‘jo ducu ma mito woro Lubanga kun gilubo lanen pa i Kricito Yecu, kibiunogi.’ (2 Temceo 3:12) Kiketo aunauna i kom Yecu pien en onongo pe dano me lobo pa Catan-ni. Wan bene pe watye jo me lobo, pi meno pe wabedo ki ur ka gamente kacel ki dini me lobo-ni giunowa.—Jon 15:18, 19.
2. Watwero yubbe pi aunauna nining?
Omyero wajing genwa i kom Jehovah i kare-ni. Kwany cawa nino ducu me lega bot Jehovah ki me kwano Lokke. Bed tye i cokke cabit ducu. Timo jami magi bimini teko me kemme ki aunauna ki tekcwiny kadi bed aunauna man tye ka a ki bot jo me gangwu. Lakwena Paulo, ma bene owok ki i aunauna mapol ocoyo ni: “Rwot [Jehovah] en lakony mera, pe abibedo ki lworo.”—Jo Ibru 13:6.
Watwero dongo tekcwiny ka watito kwena kare ki kare. Tito kwena pwonyowa me geno Jehovah ki dok pe me lworo dano. (Carolok 29:25) Ka idongo tekcwiny ma mitte me tito kwena i kare-ni, ibibedo atera me medde ki tito kwena kadi bed gamente oketo kigeng i kom ticwa.—1 Jo Tecalonika 2:2.
3. Adwogi maber ango ma wanongo ka waciro aunauna?
Ki lok ada, pe wamaro aunauna, ento ka waciro aunauna ci niyewa bijing doko matek. Wanyikke cok bot Jehovah pien nongo waneno kit ma en okonyowa kwede me ciro aunauna. (Kwan Yakobo 1:2-4.) Cwero cwiny Jehovah ka watye ka deno can, ento cwinye bene bedo yom ka waciro peko. Baibul waco ni: “Ka ce wudiyo cwinywu ma nongo wutye ka neno can pi timo gin maber, meno aye Lubanga pwoyo.” (1 Petero 2:20) Ka wagwoko gennewa, Jehovah biminiwa kwo ma pe tum i lobo manyen ka ma jo ducu bitic pire labongo aunauna.—Matayo 24:13.
NONG NGEC MATUT
Nen pingo watwero gwoko gennewa kadi bed kitye ka unowa, ki dong adwogi mabeco ma wabinongo.
4. Itwero ciro adegadega ma a ki bot jo gangwu
Yecu onongo ngeyo maber ni jo mogo ma gangwa pe bicwako tamwa me tic pi Jehovah. Kwan Matayo 10:34-36, ci wunyam lapeny man:
-
Gin ango ma jo ma gang gitwero waco nyo timone ka ngat mo omoko tamme me tic pi Jehovah?
Me neno labolle, Tuk VIDIO, ci wunyam lapeny ma lubo.
-
Gin ango ma ibitimo ka watti nyo laremi mo otemo juki ki tic pi Jehovah?
Kwan Jabuli 27:10 ki Marako 10:29, 30. I nge kwano wang Baibul magi ki acel acel, wunyam lapeny man:
-
Cikke man twero konyi nining ka itye ka kemme ki adegadega ma a ki bot wadini nyo luremi?
5. Medde ki woro Jehovah kadi bed itye ka wok ki i aunauna
Tekcwiny mitte wek wamedde ki tic pi Jehovah ka dano gitye ka temme me jukowa. Tuk VIDIO, ci wunyam lapeny ma lubo.
-
Lanen pa jo ma i vidio-ni omini tekcwiny nining?
Kwan Tic pa Lukwena 5:27-29 ki Jo Ibru 10:24, 25. I nge kwano wang Baibul magi ki acel acel, wunyam lapeny man:
-
Pingo pire tek me medde ki woro Jehovah kadi bed kiketo kigeng i kom ticwa me tito kwena nyo i kom cokkewa?
6. Jehovah bikonyi me ciro adegadega
Lucaden pa Jehovah ma mwakagi patpat ma i but lobo-ni ducu gitye ka medde ki tic pi Jehovah kadi bed kitye ka unogi. Me neno gin ma okonyogi, Tuk VIDIO. Ci wunyam lapeny ma lubo.
-
Gin ango ma okonyo Lucaden ma i vidio-ni me cung matek?
Kwan Jo Roma 8:35, 37-39 ki 2 Jo Korint 4:7. I nge kwano wang Baibul magi ki acel acel, wunyam lapeny man:
-
Ginacoya man cuko cwinyi nining ni itwero kanyo atematema mo keken?
Kwan Matayo 5:10-12, ci wunyam lapeny man:
-
Pingo itwero bedo ki yomcwiny kadi bed itye ka wok ki i aunauna?
Lucaden pa Jehovah milion mapol gugwoko gennegi i kare me aunauna. In bene itwero timone!
JO MOGO GIWACO NI: “An pe atwero kanyo aunauna.”
-
Ginacoya mene ma twero minigi tekcwiny ma mitte?
WOT WIYE WIYE
Jehovah pwoyo tutewa me tic pire kadi bed watye ka wok ki i aunauna. Ki konye, watwero ciro aunauna!
Ngo ma ipwonyo?
-
Pingo Lukricitayo myero gunge ni kibiunogi?
-
Gin ango ma myero itim i kare-ni ma bikonyi i kare me aunauna?
-
Gin ango ma twero konyi me bedo ki tekcwiny ni itwero tic pi Jehovah kadi bed itye ka wok ki i atematema?
TIM KWED
Nen kit ma omego mo matidi otito kit ma Jehovah okonye kwede me ciro aunauna i kare ma kitweye i buc pien ni pe ecwako tung ka mo.
Nen gin ma okonyo luot mo me tic pi Jehovah ki gen pi mwaki mapol kadi bed onongo gitye ka wok ki i adegadega.
Nen kit ma itwero ciro kwede aunauna ki tekcwiny.
Myero wanen adegadega ma a ki bot jo gangwa nining, dok gin ango ma watwero timone wek wagwok kuc kun wamedde ki bedo lugen bot Jehovah?
“Ada Pe ‘Kelo Kuc, Ento Pala Lucwan’” (Wi Lubele, Oktoba 2017)
