NÍ KASEMI 59
O Ma Nyɛ Maa Da Yi Mi Wami Nya
Bɔ fɛɛ bɔ nɛ ji ɔ, Kristofohi tsuo kɛ si temi kɛ womi maa kpe, nɛ a maa wa mɛ yi mi po. Anɛ e sa nɛ enɛ ɔ nɛ wo wa he gbeye lo?
1. Mɛni he je nɛ wa hyɛɛ blɔ kaa a maa wa wɔ yi mi ɔ?
Baiblo ɔ de ke: “Nihi tsuo nɛ a suɔ wawɛɛ kaa a maa hi si ngɛ Mawu gbeye yemi nya ngɛ Kristo Yesu mi ɔ, mɛ hu a maa wa mɛ yi mi.” (2 Timoteo 3:12) A wa Yesu yi mi akɛnɛ e piɛɛ we je ɔ he ɔ he je. Wɔ hu wa piɛɛ we je ɔ he, enɛ ɔ he ɔ, ke je nɛ ɔ mi nɔ yeli ɔmɛ kɛ jami ɔmɛ ngɛ wɔ yi mi wae ɔ, e pee we wɔ nyakpɛ.—Yohane 15:18, 19.
2. Mɛni wa maa pee kɛ dla wa he konɛ wa nyɛ nɛ waa da yi mi wami nya?
E sa nɛ wa ha nɛ hemi kɛ yemi nɛ wa ngɛ ngɛ Yehowa mi ɔ mi nɛ wa wawɛɛ amlɔ nɛ ɔ. Daa ligbi ɔ, mo hla be nɛ o kɛ sɔle ha Yehowa, nɛ́ o kane e Munyu ɔ. Moo ya asafo mi kpehi be fɛɛ be. Ní nɛ ɔmɛ nɛ o maa pee ɔ maa wo mo he wami konɛ o nyɛ nɛ o kɛ kã nɛ da yi mi wami nya, ke ji kaa o weku li lɛ a ngɛ mo yi mi wae po. Bɔfo Paulo nɛ a wa lɛ yi mi si abɔ ɔ ngma ke: “Yehowa ji ye yemi kɛ bualɔ; i be gbeye yee.”—Hebri Bi 13:6.
Fiɛɛmi nɛ wa maa fiɛɛ be fɛɛ be ɔ hu ma ha nɛ wa ná kã. Fiɛɛmi ní tsumi ɔ yeɔ bua wɔ nɛ wa ngɔɔ wa hɛ kɛ fɔɔ Yehowa nɔ, nɛ wa yi nimli a hɛ mi gbeye. (Abɛ 29:25) Ke o kase bɔ nɛ a kɛ kã fiɛɛɔ ha amlɔ nɛ ɔ, e maa ye bua mo nɛ o kɛ kã maa fiɛɛ ke ma nɔ yeli ɔmɛ tsi wa ní tsumi ɔ nya po.—1 Tɛsalonika Bi 2:2.
3. Ke a ngɛ wɔ yi mi wae nɛ wa fĩ si ɔ, kɛ wa ma ná he se ha kɛɛ?
Ngɛ anɔkuale mi ɔ, wa bua jɔɛ yi mi wami he, se ke a ngɛ wɔ yi mi wae nɛ wa fĩ si kɛ ya si nyagbe ɔ, e haa nɛ wa hemi kɛ yemi ɔ mi waa wawɛɛ. E haa nɛ wa hɛɛ kɛ suɔ Yehowa he, ejakaa Yehowa yeɔ bua wɔ ke wa nuɔ he kaa wa be nyɛe maa da nya. (Kane Yakobo 1:2-4.) Ke wa ngɛ nɔ́ nae ngɛ yi mi wali a dɛ mi ɔ, e dɔɔ Yehowa, se ke wa nyɛ nɛ wa fĩ si ɔ, e bua jɔɔ. Baiblo ɔ de ke: “Ke nyɛ fĩɔ si ngɛ amanehlu mi ngɛ nɔ́ kpakpa nɛ nyɛ ngɛ pee ɔ he ɔ, lɔ ɔ saa Mawu hɛ mi.” (1 Petro 2:20) Ke wa ya nɔ nɛ wa ye Yehowa anɔkuale ɔ, e ma ha wɔ neneene wami ngɛ je ehe ɔ mi. Nihi nɛ a maa hi je ehe ɔ mi ɔ ma sɔmɔ Yehowa, nɛ nɔ ko be si tee kɛ wo mɛ.—Mateo 24:13.
MOO KASE BABAUU
Moo kase nɔ́ he je nɛ wa ma nyɛ maa ye Yehowa anɔkuale ke a ngɛ wɔ yi mi wae, kɛ jɔɔmihi nɛ wa ma ná a he ní.
4. Ke o weku li te si kɛ wo mo ɔ, o ma nyɛ maa da nya
Yesu le wawɛɛ kaa ke wa mwɔ wa yi mi kpɔ kaa wa ma sɔmɔ Yehowa a, wa weku li komɛ a bua be he jɔe. Nyɛɛ kane Mateo 10:34-36, nɛ́ nyɛ susu sane bimi nɛ ɔ he:
-
Ke nɔ ko mwɔ e yi mi kpɔ kaa e ma sɔmɔ Yehowa a, mɛni nɛ eko ɔ, e weku li ɔmɛ maa pee?
Bɔ nɛ pee nɛ o na enɛ ɔ he nɔ hyɛmi nɔ́ ɔ, mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
-
Ke o huɛ ko loo o weku no ko ngɛ mɔde bɔe kaa e ma ha nɛ o kpa Yehowa sɔmɔmi ɔ, mɛni o maa pee?
Nyɛɛ kane La 27:10 kɛ Maako 10:29, 30. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:
-
Ke o huɛmɛ loo o weku li ngɛ mɔde bɔe kaa a ma ha nɛ o kpa Yehowa sɔmɔmi ɔ, kɛ si womi nɛ ngɛ ngmami nɛ ɔ mi ɔ maa ye bua mo ha kɛɛ?
5. Moo ya nɔ nɛ o ja Yehowa ke nihi ngɛ mo yi mi wae po
Ke nihi ngɛ mɔde bɔe kaa a ma ha nɛ wa kpa Yehowa sɔmɔmi ɔ, e biɔ kã loko wa ma nyɛ ma sɔmɔ Yehowa. Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
-
Mɛni nɔ hyɛmi níhi lɛ ngɛ video nɛ ɔ mi nɛ woɔ mo he wami?
Nyɛɛ kane Ní Tsumi 5:27-29 kɛ Hebri Bi 10:24, 25. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:
-
Mɛni he je nɛ e he hia wawɛɛ kaa wa maa ya nɔ ma ja Yehowa ke ji kaa a tsi wa fiɛɛmi ní tsumi ɔ nya aloo a ngmɛ́ wɔ blɔ nɛ wa bua wa he nya?
6. Yehowa maa ye bua mo konɛ o fĩ si
Nihewi kɛ yihewi, kɛ nihi nɛ a wa ngɛ jeha mi nɛ a ji Yehowa Odasefohi nɛ a ngɛ je kɛ wɛ ɔ nyɛ nɛ a kɛ anɔkuale yemi sɔmɔ Yehowa benɛ a ngɛ mɛ yi mi wae ɔ. Bɔ nɛ pee nɛ o na nɔ́ nɛ ye bua mɛ ɔ, mo je VIDEO ɔ. Lɔ ɔ se ɔ, nyɛ susu sane bimi nɛ nyɛɛ se ɔ he.
-
Mɛni lɛ ye bua Odasefo ɔmɛ nɛ́ wa na ngɛ video ɔ mi ɔ nɛ a nyɛ nɛ a fĩ si?
Nyɛɛ kane Roma Bi 8:35, 37-39 kɛ Filipi Bi 4:13. Ke nyɛ kane ngmami ɔ eko fɛɛ eko ta a, nyɛ susu sane bimi nɛ ɔ he:
-
Ngɛ mɛni blɔ nɔ nɛ ngmami nɛ ɔ haa nɛ o náa nɔ mi mami kaa o ma nyɛ maa da kahi a nya?
Nyɛɛ kane Mateo 5:10-12, nɛ́ nyɛ susu sane bimi nɛ ɔ he:
-
Mɛni he je nɛ o bua ma nyɛ maa jɔ ke a ngɛ mo yi mi wae po?
Yehowa Odasefohi babauu nyɛ nɛ a da si temi kɛ womi nya. Mo hu o ma nyɛ maa da nya!
NI KOMƐ DEƆ KE: “I be nyɛe ma da yi mi wami nya.”
-
Mɛni ngmamihi o kɛ maa ye bua mɛ konɛ a nyɛ nɛ a pee kã?
NYA MWƆMI
Yehowa bua jɔɔ mɔde nɛ wa ngɛ bɔe kaa wa ma sɔmɔ lɛ ngɛ yi mi wami tsuo se ɔ he. E maa ye bua wɔ konɛ wa fĩ si kɛ ya si nyagbe!
Mi Nylɔmi
-
Mɛni he je nɛ e sa kaa Kristofohi nɛ a hyɛ blɔ kaa a maa wa mɛ yi mi ɔ?
-
Mɛni o ma nyɛ maa pee piɔ kɛ dla o he konɛ ke a ngɛ mo yi mi wae ɔ, o nyɛ nɛ o da nya?
-
Mɛni ma ha nɛ o ná nɔ mi mami kaa o ma nyɛ ma sɔmɔ Yehowa ngɛ kahi nɛ o kɛ maa kpe ɔ tsuo se?
NÍ KPAHI NƐ MAA YE BUA MO
Niheyo wayoo ko kua ta buli a ní tsumi. Moo hyɛ bɔ nɛ e tsɔɔ kaa Yehowa ye bua lɛ nɛ e nyɛ fĩ si ha.
Moo hyɛ nɔ́ nɛ ye bua nyumu ko kɛ e yo nɛ a nyɛ nɛ a kɛ anɔkuale yemi sɔmɔ Yehowa jehahi babauu ngɛ si temi kɛ womi tsuo se.
A Ya Nɔ Nɛ A Sɔmɔ Yehowa Benɛ A Kɛ Si Fɔfɔɛhi Nɛ A Mi Wa Kpe ɔ (7:11)
Moo kase bɔ nɛ o maa pee kã kɛ da yi mi wami nya ha.
“Dla O He Amlɔ Nɛ ɔ Kɛ Ha Yi Mi Wami” (Hwɔɔmi Mɔ, July 2019)
Kɛ e sa kaa waa na si temi kɛ womi nɛ jeɔ weku li a ngɔ ɔ ha kɛɛ, nɛ mɛni wa maa pee kɛ di tue mi jɔmi se nɛ́ loloolo ɔ, waa ya nɔ nɛ wa sɔmɔ Yehowa?
“Anɔkuale ɔ, ‘Pi Tue Mi Jɔmi Nɛ E Kɛ Baa, Mohu ɔ, Klaate’” (Hwɔɔmi Mɔ, October 2017)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
