OZUMALƐDƖYƐ 59
Sa Ɔkʋla Kyina Odwodwudiyialɛ Munwa
Iluwakɛɛ yɛdɩ Kilisinyiamaa ti, mmenii kodwodwu kediyia yɛ. Asʋ̃ ɩsɛ kɛɛ eyi ma bɔlɔ kã yɛ a?
1. Mɩnla ti mɔɔ yekila odwodwudiyialɛ ɔhʋanɩ a?
Bayɩbʋlʋ kã yɩ petee kɛɛ: “Abiyela mɔɔ ɩpɛ kɛɛ ɩbɔ ɛbɩla baaba na ɩ nɩɩ Gyisɛsɩ Kɩlayɩsɩ boduwa nɩ, bɛkɛyɛ yɩ atɩɩtɩɩ.” (2 Timoti 3:12) Iluwakɛɛ nɩ Gyisɛsɩ ɩ́dɩ oyuwadɩ eyi yɩ ɔfʋã nɩ ti, bodwodwuli bediyialɩ yɩ. Ɔzɔ la yɛ amɩyɛ sʋ̃, oyuwadɩ aɣanɩ nɩɩ ɔzʋ̃mɩnlɛ azʋlɔtʋ botwodwu betiyia yɛ iluwakɛɛ yɛ́dɩ oyuwadɩ eyi yɩ ɔfʋã. Na eyi ɩáyɛ yɛ nnwʋánlɩ kʋlaa.—Dwɔɔnʋ 15:18, 19.
2. Kɛ yɛkɛyɛ na yɛaziyeziye yɛ nwʋ yɛama odwodwudiyialɛ a?
Nnɛ yɛ ɩdɩ mmɩlɩ mɔ ɩsɛ kɛɛ yɛhyɛ anwʋlazʋ mɔɔ yɛlɛ wɔ Gyehova nu nɩ ɛzɩzɩbɛ a. Bɔ mmɔdɩnɩ kɛɛ ekenyia mmɩlɩ kɔwɔ mpayɩ na wʋaɣɩnga Bayɩbʋlʋ yɩ ɔfʋã be eɣile bela. Akʋ̃ sʋ̃, kɔ́ dɩyɛzumanlɛ eɣile bela. Nninyeni eyimmɔ kɔwʋwa wʋ ma ekenyia anwʋzɩzɩbɛ, na sɛ wu mmusunwamaa po yɛ botwodwuu bekediyia wʋ a, wʋahʋla wʋava akɛnɣazɩzɩbɛ wʋagyina yi munwa. Sʋ̃mavʋlɔ Pɔɔlʋ mɔɔ iyiyialɩ odwodwudiyialɛ mbɔmɩ sʋ̃maa nɩ ɩhanlɩ kɛɛ: “Sɛ Niibenyia ɩwɔ mʋ ɔfʋã a, mu kunlu ilótu.”—Hibulumaa 13:6.
Sɛ yeminyia yɛ nwʋ yɛyɛ dasɩlɛlilɛ egyima yɩ sʋ̃ a, ɩma yenyia akɛnɣazɩzɩbɛ. Sianti yɛ lɛ kɛɛ dasɩlɛlilɛ egyima yɩ ɩma yɛfa yɛ nwʋ yetiã Gyehova zʋ na ɩbʋwa ma yɛyɩ enii nwʋ bɔlɔ bela wɔ ye nu. (Ɛɣɛlɛwulɛ 29:25) Sɛ enyia akɛnɣazɩzɩbɛ ɛyɛ dasɩlɛlilɛ egyima yɩ nnɛ a, ɩkɔwʋwa wʋ ma sɛ ɩba yɩ kɛɛ aɣanɩ fa salɛ tiã ye egyima yɩ zʋ po a, ɔkɔhɔ zʋ keli dasɩlɛ.—1 Tɛsalonikamaa 2:2.
3. Sɛ yekyina odwodwudiyialɛ munwa pindinyii a, mɩnla mfasʋ yɛ yenyia a?
Ɩwɔ numɔ kɛɛ sɛ mmenii twodwu tiyia yɛ a ɩáyɛ yɛ fɛ dɩyɛ, naasʋ̃ sɛ yeminyia yɛ nwʋ yekyina numɔ pindinyii a, ɩma ye dedi ɩyɛ sɩ. Akʋ̃ sʋ̃, ɩma yebike Gyehova, iluwakɛɛ ɩhyɛ yɛ ɛzɩzɩbɛ wɔ mmɩlɩ mɔ yɛkɛdɩ nɣanlɩ kɛɛ yɛ anwʋzɩzɩbɛ zʋ dɩ wɔ odwodwudiyialɛ nu nɩ. (Kɩnga Gyemisi 1:2-4.) Sɛ Gyehova ɩnwʋ kɛɛ yɛnwʋʋ amanɩyɛ a, idi nwʋmɔ ɛyɛkɛ, naasʋ̃ sɛ yɛkʋla yekyina odwodwudiyialɛ yi nu pindinyii a, ɩma yɩ anyɩ de. Bayɩbʋlʋ ɩkã kɛɛ: “Na sɛ bɛ baabayɛlɛ ti mʋnlʋmmɔ bɔnwʋ amanɩyɛ na besi nwʋmɔ abʋtalɩ a Nyamɩnlɩ ikeyila mʋnlʋmmɔ.” (1 Pita 2:20) Bɛzabɛ mɔɔ bɛfa nɔhʋanlɛlilɛ bekyina odwodwudiyialɛ munwa nɩ, Gyehova keyila bɛ. Ɩkɛma bekenyia nnwʋanlɩ mɔɔ íni awielɩyɛ wɔ oyuwadɩ mɔɔ abiyela ilótwodwu kediyia nɔhʋanlɛ ɔzʋ̃mɩnlɛ nu.—Matiyu 24:13.
SUMÁ SƲ̃MAA
Kilá sianti mɔɔ sɛ botwodwu betiyia yɛ po a, yɛkɔhʋla keli Gyehova nɔhʋanlɛ nɩɩ kezimɔ ikeyila yɛ.
4. Sa ɔkʋla kyina odwodwudiyialɛ mɔɔ ɩzʋ̃ wu mmusunwamaa bɛ ɛkɛnɩ yi munwa
Gyisɛsɩ hanlɩ kɛɛ, kɛ ye mmusunwamaa munwala yɛ ebiye a bɛ anyɩ keleli pɔkɔ mɔɔ yekezi kɛɛ yɛkɔzʋ̃mɩ Gyehova nɩ nwʋ a. Kɩnga Matiyu 10:34-36, na akʋ̃ bozunzú odwokɔɣizialɛ eyi nwʋ:
-
Sɛ abiye si pɔkɔ kɛɛ ɩkɔzʋ̃mɩ Gyehova a, mɩnla yɛ yi mmusunwamaa kɔhʋla kɛyɛ yɩ a?
Sɛ ɛpɛ kɛɛ ɔnwʋ mɔɔ yɛkãã yɩ nwʋ ndianwʋ a, yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Sɛ wʋ ɔhɔnwʋ anzɛnyɩɩ wu busunwanii be pɛ kɛɛ eyiaki Gyehova ɔzʋ̃mɩnlɛ a, mɩnla yɛ ɛkɛyɛ a?
Kɩnga Ndwomi 27:10 nɩɩ Maakɩ 10:29, 30. Sɛ bɛkɩnga ɛhɛlɛlɛ odwokɔ eyi nu ɔkʋ̃ bela bowie a, bozunzú odwokɔɣizialɛ eyi nwʋ:
-
Sɛ wʋ ɔhɔnwʋ anzɛnyɩɩ wu busuwanii be pɛ kɛɛ eyiaki Gyehova ɔzʋ̃mɩnlɛ a, mɩnla ɔhʋanɩ zʋ yɛ ɛhɛlɛlɛ odwokɔ eyi kɔhʋla kɔwʋwa wʋ a?
5. Kɔ ɔzʋlɔ sʋ̃mɩ Gyehova ɩávalɩ nwʋmɔ kɛɛ eyiyiaa odwodwudiyialɛ
Sɛ abiyemmɔ bɔbɔɔ mmɔdɩnɩ kɛɛ bɛkɛma yekeyiaki Gyehova ɔzʋ̃mɩnlɛ a, ide akɛnɣanzɩzɩbɛ na yɛahʋla yɛagyina yi munwa. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili kɛnɩ nɩ nwʋ.
-
Ndianwʋ mɔɔ mmeliyema mɔɔ bɔwɔ vidiyo yi nu yɛlɩ nɩ, kɛ ɩhyɛ wʋ ɛzɩzɩbɛ ise a?
Kɩnga Egyima 5:27-29 nɩɩ Hibulumaa 10:24, 25. Sɛ bɛkɩnga ɛhɛlɛlɛ odwokɔ eyi nu ɔkʋ̃ bela bowie a, bozunzú odwokɔɣizialɛ eyi nwʋ:
-
Sɛ aɣanɩ fa salɛ tiã ye egyima yɩ zʋ po a, mɩnla ti mɔɔ nwʋmɔ hyinyia paa kɛɛ yɛkɔ zʋ yɛsʋ̃mɩ Gyehova a?
6. Gyehova kɔwʋwa wʋ ma ekegyina pindinyii
Gyehova Dasɩvʋlɔmaa nnwuakula nɩɩ mbanimbani mɔɔ bɔwɔ oyuwadɩ dɩka bela bɔhɔ zʋ bɛva nɔhʋanlɛlilɛ bɔzʋ̃mɩ Gyehova ɩávalɩ nwʋmɔ kɛɛ beyiyia odwodwudiyialɛ nɩ. Kilá mɔɔ ɩwʋwalɩ bɛ. Yɩ́ VIDIYO nɩ. Na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
-
Wɔ vidiyo yi nu nɩ, mɩnla yɛ ɩwʋwalɩ mmeliyema nɩ ma begyinanlɩ pindinyii a?
Kɩnga Wulomimaa 8:35, 37-39 nɩɩ Fɩlɩpɩmaa 4:13. Sɛ bɛkɩnga ɛhɛlɛlɛ odwokɔ eyi nu ɔkʋ̃ bela bowie a, bozunzú odwokɔɣizialɛ eyi nwʋ:
-
Mɩnla ɔhʋanɩ zʋ yɛ ɛhɛlɛlɛ odwokɔ eyi ɩma enyia anwʋlazʋ kɛɛ ɔkɔhʋla ekegyina odwodwudiyialɛ bela munwa a?
Kɩnga Matiyu 5:10-12, na akʋ̃ bozunzú odwokɔɣizialɛ eyi nwʋ:
-
Mɩnla ti mɔɔ wʋ anyɩ kɔhʋla kele ɩávalɩ nwʋmɔ kɛɛ eyiyiaa odwodwudiyialɛ nɩ a?
Gyehova yɩ azʋ̃mɩvʋlɔ sʋ̃maa bɛva nɔhʋanlɛlilɛ begyina odwodwudiyialɛ munwa pindinyii. Wʋzawʋ sʋ̃, sa ɔkʋla ɛyɛ ɔzɔ!
ABIYEMMƆ BƐKÃ KƐƐ: “Mamɩ mɛyɩ, mʋlɔ́kʋla mikegyina odwodwudiyialɛ munwa.”
-
Mɩnla ɛhɛlɛlɛ odwokɔ yɛ ɛkɛva ɛkɛhyɛ bɛzabɛ mɔɔ bɛtɩ nɣanlɩ ɔzɔ nɩ ɛzɩzɩbɛ a?
YƖ DƆKƆWƆLƐ
Sɛ yeyiyiaa odwodwudiyialɛ na yɛkɔ ɔzʋlɔ yɛsʋ̃mɩ Gyehova a, ɩma yɩ anyɩ de. Gyehova yɩ mmʋwalɩyɛ ti, sa yɛkʋla yekyina odwodwudiyialɛ munwa pindinyii!
Kɛ Okowuwa Ekeze a?
-
Mɩnla ti mɔɔ ɩsɛ kɛɛ Kilisinyiamaa bekila odwodwudiyialɛ ɔhʋanɩ a?
-
Mɩnla yɛ ɔkɔhʋla kɛyɛ sikalɛyɩ na wʋava wʋaziyeziye wʋ nwʋ wʋama odwodwudiyialɛ a?
-
Mɩnla yɛ ɩkɔhʋla kɔwʋwa wʋ ma ekenyia anwʋlazʋ kɛɛ sa ɔkʋla sʋ̃mɩ Gyehova ɩávalɩ nwʋmɔ odwodwudiyialɛ bela mɔɔ ekeyiyia nɩ a?
PƖBƐ́ SƲ̃MAA
Kilá eliyema abɩlantɩyɛ be mɔɔ ikilehilee kezimɔ Gyehova wʋwalɩ ma igyinanlɩ pindinyii mmɩlɩ mɔ bedianlɩ yɩ fiyiadɩ iluwa ɔfʋã bela mɔɔ iákyina ti.
Kilá mɔɔ ɩwʋwalɩ agyiahʋnlɩmaa be ma belili Gyehova nɔhʋanlɛ ɩávalɩ nwʋmɔ kɛɛ beyiyialɩ odwodwudiyialɛ nɩ.
Sumá kezimɔ ɛkɛva akɛnɣazɩzɩbɛ kegyina odwodwudiyialɛ munwa.
“Siyeziye Wʋ Nwʋ Ma Odwodwudiyialɛ” (Ɔwɩɛnɩlɛ Aɣanɩ, July 2019)
Kɛ ɩsɛ kɛɛ yebu odwodwudiyialɛ mɔɔ ɩzʋ̃ ye mmusunwamaa bɛ ɛkɛnɩ nɩ yese a, na mɩnla ɔhʋanɩ zʋ yɛ yɛkɔhʋla yekegyina yi munwa na yɛahɔ ɔzʋlɔ yɛava nɔhʋanlɛlilɛ yɛazʋ̃mɩ Gyehova a?
“Nɔhʋanlɛ Yɩ, ‘Ɩáva Azʋ̃nudwolɩyɛ Bɩlɛ Oyuwadɩ, Mfomi Kʋnɛ’” (Ɔwɩɛnɩlɛ Aɣanɩ, October 2017)
