PONJI MI 59
Mediri niciro ragedo
Tin kunoke urwo, Jukristu ceke binwang’iri ku ragedo moko kokoro; ecopo bedo ma yot kunoke ma pek. Nyo wacikara niweko lworo negwa?
1. Pirang’o wabekuro ragedo i wiwa?
Biblia ular uyero thwolo thwolo kumae: “Dhanu ceke ma gibemito giwor Mungu man gibed ku winjiri ku Kristu Yesu gibinwang’iri bende ku ragedo.” (2 Timoteo 3:12) Jugam junyayu ragedo i kum Yesu pilembe ebino ngo i thenge mi ng’om maeni pa Sitani. Wan bende calu ma wa m’i ng’om ungo, wacopo zungo ngo ka bimobim man dini mi ng’om maeni ubenyayu masendi i kumwa.—Yohana 15:18, 19.
2. Wacopo yikara nenedi pi ragedo m’ubebino?
Umaku watim kero nibedo dhanu m’ugeno Yehova lee mandha niai tin. Pieno kubang’ ceng’, bed inwang’ saa mi rwo i bang’e man mi somo Lembe pare. Bende, bed icidh nja i coko. Lembe maeno ceke bimiyo iri tego m’ubekwayere pi ninyego ku ragedo ku tegocwiny, kadok nyo ragedone uai i bang’ wedi peri de. Jakwenda Paulo ubed ukadh’i ragedo wang’ ma pol, re ekiewo kumae: “Yehova en e jakonyna; lworo binega ngo.”—Juebrania 13:6.
Lembe mange ma bitego cwinywa tie niberweyo lembanyong’a areri. Tic mi lembanyong’a ponjowa nigeno Yehova man nikabu cen lworo mi dhanu kud i iwa. (Lembrieko 29:25) Kan ibeii nirweyo ku tegocwiny tin eni, ibibedo ayika man ibimediri asu nirweyo kinde ma gavmenti bicero dhu tije.—1 Juthesaloniki 2:2.
3. Ka wabeciro ragedo, bero ang’o ma wabinwang’u?
Ng’atu moko mbe m’i kindwa m’umaru ragedo; ento ka wabecire ma ber, yiyoyic mwa doko tek nisagu. Bende, kindwa bedo ceng’ini ku Yehova pilembe nwang’u wabeneno ayi m’ebekonyo kowa kinde ma dong’ wabemito nivoc. (Som Yakobo 1:2-4.) Yehova winjere rac kan eneno wabesendara, ento mutoro nege lee kan eneno wabeciro. Biblia uyero kumae: “Tek wubeciro masendi pilembe wutimo lembe ma ber, eno nyayu mutoro i Mungu.” (1 Pethro 2:20) Yehova bimiyo mugisa mi kwo ma rondo ku rondo i ng’om keni ni dhanu ceke m’ubemediri niciro. Saa maeca, ng’atu moko acel de mbe ma bibedo jadhu thier mandha.—Matayo 24:13.
MED NYANG’ PERI
Wakenen kawoni nia pirang’o etie lembe ma copere nigwoko bedoleng’ mwa ni Yehova kadok i wang’ amulaic, man wanen mugisa ma cirocir mwa bikelo iwa.
4. Iromo ciro ragedo m’uai i bang’ jupewu
Yesu ular ung’eyo cuu nia wedi mwa moko gicopo maru ngo nia watim ni Yehova. Som Matayo 10:34-36, man i ng’eye wuwec iwi penji m’ulubo e:
-
Lembang’o ma romo timere ka ng’atu moko ung’iyo nitimo ni Yehova?
Pi nineno laporne moko, nen VIDEO, man i ng’eye wuwec iwi penji m’ulubo e:
-
Iromo timo ang’o ka wedi peri kunoke jarimbi moko ubemito nia iwek nitimo ni Yehova?
Som Zaburi 27:10 man Marko 10:29, 30. I ng’ei somo verseman, wuwec iwi penji m’ulubo e:
-
Lembang’ola mi verse maeni copo konyi nenedi ka jupewu kunoke jurimbi moko gibemito nia iwek nitimo ni Yehova?
5. Mediri nitimo ni Yehova kadok ragedo nuti
Etie lembe ma kwayu tegocwiny kara watuc nitimo ni Yehova kinde ma jumange gibeii nicerowa. Nen VIDEO, man i ng’eye wuwec iwi penji m’ulubo e:
-
Lapor mi ju mi video maeni ubemiyo iri tegocwiny nenedi?
Som Tic mi Jukwenda 5:27-29 man Juebrania 10:24, 25. I ng’ei somo verseman, wuwec iwi penji m’ulubo e:
-
Pirang’o pire tie tek nia wamedara asu nirweyo lembanyong’a man nicokara kadok kinde ma gavmenti ukwero tic mwa?
6. Yehova bikonyi kara icir
Jumulembe pa Yehova, ma thindho ku ma dongo man mi ng’om zoo, gibeweko ngo nyanok de nitimo ni Yehova kadok i ragedo ma lake tek. Ang’o m’ubekonyogi niciro? Pi ning’eyo, nen VIDEO. I ng’eye, wuwec iwi penji m’ulubo e:
-
Ang’o m’ukonyo umego ku nyimego mi video maeni niciro?
Som Jurumi 8:35, 37-39 man Jufilipi 4:13. I ng’ei somo verseman, wuwec iwi penji m’ulubo e:
-
I giragora maeni, lembang’o m’ubetego cwinyi nia iromo ciro amulaic moko ci?
Som Matayo 5:10-12, man i ng’eye wuwec iwi penji m’ulubo e:
-
Pirang’o icopo bedo jamutoro kadok ibenweng’iri ku ragedo?
Jurutic pa Yehova ma wendgi lee dit gigwoko bedoleng’ migi ni Yehova kadok ragedo bedo nuti. In de icopo ciro calu gin!
DHANU MOKO BEYERO KUMAE: “Acopo romo ngo niciro ragedo.”
-
Verse ma kani ma copo miyo ni dhanu maeno tegocwiny ma gitie ku yenyne?
I ADUNDO
Mutoro nego Yehova lee kan eneno wabeii nitimo ire kadok kinde ma jubenyayu ragedo i kumwa. Ku kony pare, wacopo ciro ma ber dit!
Penji mi poyowic
-
Pirang’o Jukristu gicikiri nikuro ragedo i wigi?
-
Icopo timo ang’o niai tin eni kara ibed ayika kinde ma ragedo bitundo?
-
Pirang’o icopo bedo ma cwinyi tek nia iromo timo ni Yehova i wang’ amulaic moko ci?
TIM SAYUSAC
Yehova ukonye ko niciro kinde ma jugam jutwiye pilembe ekwero nimondo i lembgamba. Kelube.
Kenen gin m’ukonyo umego moko ku dhaku pare nimediri ku tic pa Yehova pi oro dupa kadok ragedo bedo nuti de.
Nen kite m’icopo nyego ko i dhu ragedo ku tegocwiny.
“Yikiri kawoni pi niciro ragedo” (Otkur ma Wiw, dwi mir 7, 2019)
Wacopo neno nenedi jai m’uai i bang’ wedi mwa, man wacopo timo ang’o pi nikwo kugi ku kwiyocwiny man bende nigwoko bedoleng’ mwa ni Yehova?
“Lemandha kelo ngo kwiyocwiny, ento palamularu” (Otkur ma Wiw, dwi mir 10, 2017, mi français)
