59 YATICHÄWI
Jan waltʼayañatak arknaqat uñjaskäta ukhajj aguantasmawa
Taqpach cristianonakaw Jehová Diosar serviñat jarkʼata, jan ukajj arknaqata uñjasipjje. ¿Uk yatisajj sustjasiñasäspati?
1. ¿Kunatsa cristianonakajj arknaqat uñjastanjja?
Bibliajj akham siwa: “Taqe khitinakatejj Cristo Jesusan arkiripjam jakañ munapki, Dios chuym jakañ munapkaraki ukanakajja, jan waltʼayañatak arknaqataw uñjasipjjarakini” sasa (2 Timoteo 3:12). Jesusajj janiw Supayan apnaqata aka mundonkirïkänti, ukatwa juparojj arknaqapjjäna. Jiwasajj janirakiw aka mundonkirïktanti, ukatwa aka mundonkiri gobiernonakasa religionanakasa jan waltʼayañatak arknaqapjjestu (Juan 15:18, 19).
2. Jan waltʼayañatak arknaqapkistani ukhatakejj ¿kunjamsa wakichtʼassna?
Jehová Diosar jukʼamp confiyañatakejj jichhaw wakichtʼasiñasa. ¿Kunjamsa uk lursna? Diosar orasiñatakisa, Biblia liyiñatakisa sapüruw tiempo apstʼasiñasa. Ukatjja jan faltasisaw congregacionan tantachäwinakaparojj sarañasaraki. Taqe ukanak luräta ukhajja, arknaqat uñjaskäta ukhajj jan ajjsartʼasaw ukanakar saykatäta, familiamajj juma conträkani ukhas janiw aynachtʼkätati. Apóstol Pablojja sapa kutiw arknaqat uñjasïna, ukampis jupajj akham sasaw qellqäna: “Jehová Diosaw yanapirijajja, janiw ajjsarkäti” sasa (Hebreos 13:6).
Jan ajjsarirïñatakejj sapa kuti predicañaw yanaptʼistani. Diosan arunakap yatiyañajj Jehová Diosar confiyañataki, jaqenakar jan ajjsarañatakiw yanaptʼistani (Proverbios 29:25). Jichjatpach jan ajjsarirïñäni ukhajja, gobiernonakajj predicañ jarkʼapkistani ukhajj predicaskakiñatakejj wakichtʼatäñäniwa (1 Tesalonicenses 2:2).
3. ¿Arknaqat uñjaskasin aguantatasajj kunatakis yanaptʼistu?
Cheqas janiw khitirus jan waltʼayañatak arknaqatäñajj gustkistuti, ukampis arknaqatäsin aguantktan ukhajj jukʼampiw Jehová Diosar confiytanjja. Jan aguantirjamäjjtan ukhajja, kunjamsa Diosajj yanaptʼistu uk jiwas pachpaw uñjtanjja, ukaw Jehová Diosar jukʼamp jakʼachasiñasatakejj yanaptʼistu (Santiago 1:2-4 liytʼäta). Tʼaqesir uñjistu ukhajja Diosajj wal chuym ustʼayasi, ukampis aguantir uñjistu ukhajja jupajj wal kusisi. Bibliajj akham siwa: “Jumanakatejj kunatï walïki uk lurapjjatam layku tʼaqesisipkstajja, Diosatakejj wali kusiskañawa” sasa (1 Pedro 2:20). Diosat jan jitheqtapkani aguantapkarakini ukanakarojja, Jehová Diosajj wiñay jakañwa aka oraqen churani. Ukanjja Dios saparukiw taqenis servipjjani, janiw jupanak contrajj khitis saytʼkaniti (Mateo 24:13).
JUKʼAMP YATJJATAÑÄNI
Arknaqat uñjaskasas kunanakas Jehová Diosat jan jitheqtañatak yanaptʼistaspa uka toqetwa jichhajj mä qhawqha yatjjatañäni. Aguantaskakiñäni ukhajj kunjamsa Diosajj bendisistani uksa yatjjatarakiñäniwa.
4. Familiamajj Diosar serviñat jarkʼkätam ukhajj aguantasmawa
Familiaranakasat yaqhepajj janiw Jehová Diosar adorañas munapkaniti, ukjja Jesusajj yatïnwa. Mateo 10:34-36 liytʼasajja aka toqetwa parltʼapjjäta:
-
Maynejj Jehová Diosar serviñ amtki ukhajja, ¿kunsa familiaranakapajj lurapjjaspa?
Familiapan Diosar serviñat jarkʼata uñjasirinakar uñtʼañatakejja, VIDEO uñtapjjäta. Ukatjja aka toqetwa parltʼapjjäta:
-
Mä familiaramasa jan ukajj mä amigomasa, ¿Jehová Diosar serviñat jarkʼapkätam ukhajj kunsa lurasma?
Salmo 27:10; Marcos 10:29, 30 liytʼasajja aka toqetwa parltʼapjjäta:
-
Familiaranakamasa jan ukajj amigonakamas juma contra saytʼasipjjani ukhajja, ¿kunjamsa uka textonakajj yanaptʼiristam?
5. Arknaqat uñjaskasas Jehová Diosat jan jitheqtamti
Mayninakajj Jehová Diosar serviñat jarkʼapjjestani ukhajja, jupar serviskakiñatakejj jan ajjsarirïñaw wakisi. VIDEO uñtasajja aka toqetwa parltʼapjjäta:
-
Videon uñtktan ukarjamajja, ¿kunanakas jan ajjsarirïñatak chʼamañchtʼiristam?
Hechos 5:27-29; Hebreos 10:24, 25 liytʼapjjäta. Sapa texto liytʼasajja aka toqetwa parltʼapjjäta:
-
Autoridadanakajj predicañsa tantachasiñsa jarkʼistani ukhajja, ¿kunatsa Jehová Diosar serviskakiñasa?
6. Jehová Diosaw aguantañatak yanaptʼätam
Kunayman maranakani, kunayman markanakankir Testigonakajja, arknaqat uñjaskasas janiw Jehová Diosat jitheqtawayapkiti. Kunas jupanakar yanaptʼawayi uk yatiñatakejja, VIDEO uñtapjjäta. Ukatjja aka toqetwa parltʼapjjäta:
-
Uka jilat kullakanakarojja, ¿kunas aguantañatak yanaptʼäna?
Romanos 8:35, 37-39; Filipenses 4:13 liytʼapjjäta. Sapa texto liytʼasajja aka toqetwa parltʼapjjäta:
-
Yantʼanakan uñjasisajj aguantasmawa, ¿kunjamsa uka textonakajj uk uñachtʼayi?
Mateo 5:10-12 liytʼasajja aka toqetwa parltʼapjjäta:
-
¿Arknaqat uñjaskasas kunatsa jumajj kusisitakïskasma?
Jan waltʼayañatak arknaqat uñjaskasasa walja millón Jehová Diosan servirinakapaw aguantawayapjje. ¡Jumas aguantarakismawa!
YAQHEPANAKAJJ AKHAM SAPJJEWA: “Jan waltʼayañatak arknaqat uñjasisajj janiw nayajj aguantkiristi” sasa.
-
Ukham amuyirinakarojja, ¿kawkïr textonakas jan ajjsarañapatak yanaptʼaspa?
¿KUNSA YATEQAWAYTAN?
Jan waltʼayañatak arknaqatpachas jupar serviñatak wal chʼamachasitasjja, Jehová Diosajj wali valoranitwa uñji. ¡Jehová Diosan yanaptʼapampejj aguantsnawa!
Amtañataki
-
¿Kunatsa cristianonakajj arknaqat uñjastanjja?
-
Arknaqat uñjaskäta ukhatakejja, ¿kunjamsa jichhjatpach wakichtʼasisma?
-
Jan waltʼäwin uñjaskasas Jehová Diosar serviskakismawa, ¿kunatsa ukham amuyta?
JUKʼAMP YATJJATAÑAMATAKI
Cuartelar jan saratapat carcelar llawintapkäna uka jilatarojja, kunjamsa Jehová Diosajj yanaptʼäna uk videon uñtam.
Jan waltʼayañatak arknaqatpachas Jehová Diosat jan jitheqtas walja maranak serviñatakejja, kunas mä chacha warmirojj yanaptʼäna uk videon uñtam.
Arknaqat uñjaskasas kunjamsa ukar jan ajjsaras saykatasma uk yatjjatam.
“Arknaqat uñjaskañäni ukatakejj jichhaw wakichtʼasiñasa” (Yatiyañataki julio 2019)
¿Familiasajj Diosar serviñat jarkʼañ munapjjestani ukhajj kunsa lurañasa? ¿Kunjamsa familiasampejj sum apasiskaksna, Jehová Diosatsa jan jitheqtkaraksna?
“Cheqa yatichäwejj ‘janiw sumankañ apankiti, jan ukasti espada apani’” (Yatiyañataki octubre 2017)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
