PES 59
U nla hônba ngolba
Bikristen gwobisôna bi ga boma ngolba tole ndééñga. Ndi baa hala a nlama kônha bés woñi?
1. Inyuki bikristen gwobisôna bi nlama bem le gw’a kôs ndééñga?
Bibel i nkal le: “Ni maliga, i bôt bobasôna ba ngwés niñ ikété adna ni Kristô Yésu, ba téñbege i gwélél Nyambe, yak bo b’a kôhna ndééñga.” (2 Timôtéô 3:12) Ba bi tééñga Yésu inyule a bé yoñ bé ngaba i mam ma nkoñ ’isi. Yak bés di nyoñ bé ngaba i mam ma nkoñ ’isi, jon hala a nhélés bé bés le bangomin ni bibase ba ntééñga bés.—Yôhanes 15:18, 19.
2. Lelaa di nla ba nkôôbaga i boma ndééñga?
Ibôdôl nano nyen di nlama bôdôl Yéhôva ñem. Hiki kel, yoñ ngéda i soohe ni i añ Bibel. Kee makoda hiki ngéda. I minson mi mbuu mi nwominsôna mi ga ti we ngui i hônba ndééñga to ibale i nlôl ni bôt boñ ba lihaa. Ñôma Paul nu yak nye a bi boma ndééñga a bi kal le: “Yéhôva a yé nhôla wem; m’a kon bé me woñi.”—Lôk Héber 13:6.
I ngéda di ntéé likalô hiki ngéda, hala a nkônde ti bés makénd. I añal ñañ nlam hiki ngéda, i mboñ le di kônde bôdôl Yéhôva ñem, i mboñ ki le di waa kon bôt ba binam woñi. (Bingéngén 29:25) Hala a ga hôla bés le kel yada, ibale bangomin ba nsôña nson wés, ni makénd d’a ke ni bisu i añal ñañ nlam.—1 Tésalônika 2:2.
3. Bimbe bisai di nla kôs i ngéda di nhônba ndééñga?
I yé maliga le mut nye ki nye a ngwés bé ndééñga, ndi i ngéda di nhônba yo, hala a nkônde lédés hémle yés. I ngéda di mboma mandutu, ndi di tehe lelaa Yéhôva a nhôgbaha bés, hala a mboñ le di kônde kôôge bebee ni nye. (Añ Yakôbô 1:2-4.) Hala a ntééñga Yéhôva i ngéda di nok ndutu, ndi i ngéda di nhônba, hala a kônha nye maséé. Bibel i nkal le: “Ibale ni nhônba mandutu inyule ni mboñ loñge, hala a yé jam li nlémél Nyambe.” (1 Pétrô 2:20) Yéhôva a ga bom ba bobasôna ba ga hônba, a ga ti bo niñ i boga i paradis i het mut nye ki nye a ga sôña ha bé bo i bégés Yéhôva.—Matéô 24:13.
KÔNDE TÉM
Béñge kii i nla hôla bés i téñbe to di mboma ngolba, ni lelaa Yéhôva a ga bom bés.
4. Di nla hônba ngolba i lihaa jés
Yésu a bé yi le ikété lihaa jés, ngim bôt i ga gwés bé le di sélél Yéhôva. Añ Matéô 10:34-36, i mbus ni kwélél mbadga ini:
-
I ngéda mut a nyoñ makidik i gwélél Yéhôva, hog ngéda kii lihaa jé li yé li boñ?
Inyu tehe ngim dihéga, tuk VIDÉÔ, i mbus ni kwélél mbadga ini:
-
Kii w’a boñ ibale lihaa joñ tole mawanda moñ ba nsôña we i gwélél Yéhôva?
Añ Tjémbi 27:10 ni Markô 10:29, 30. I mbus le ni ñañ hiki pes kaat, ni kwélél i mbadga ini:
-
Lelaa mimbônga di nléba munu minlôñ mi Bibel mini, mi nhôla we i hônba ngolba i lihaa joñ tole i mawanda moñ?
5. Kee ni bisu i gwélél Yéhôva to ibale u mboma ndééñga
I ngéda bôt ba noode sôña bés i gwélél Yéhôva, i mbéda ñem ngui inyu ke ni bisu i gwélél nye. Tuk VIDÉÔ, i mbus ni kwélél i mbadga ini:
-
Munu vidéô ini, dimbe dihéga di nkônde ti we makénd?
Añ Minson mi baôma 5:27-29 ni Lôk Héber 10:24, 25. I mbus le ni ñañ hiki pes kaat, ni kwélél i mbadga ini:
-
To ibale ba nsôña nson ñañ nlam ni makoda, inyuki yé nseñ i ke ni bisu i bégés Yéhôva?
6. Yéhôva a ga hôla bés i hônba
Mbôgi Yéhôva i i nlôl i ngandak biloñ, boñge ni mimañ mi bôt, ba bi ke ni bisu i gwélél Yéhôva tolakii ba bé boma ndééñga. Inyu yi i yom i bi hôla bo, tuk VIDÉÔ. I mbus ni kwélél i mbadga ini:
-
Mu vidéô, kii i bi hôla i Mbôgi Yéhôva ini i hônba?
Añ Rôma 8:35, 37-39 ni Filipi 4:13. I mbus le ni ñañ hiki pes kaat, ni kwélél i mbadga ini:
-
Lelaa bipes bikaat bini, bi ñéba le di nla toi hônba to imbe ndééñga?
Añ Matéô 5:10-12, i mbus ni kwélél i mbadga ini:
-
Inyuki di nla ba maséé to di mboma ndééñga?
Didun di bagwélél ba Yéhôva ba nke ni bisu i gwélél Yéhôva to ibale ba mboma ngolba. Yak we u nla boñ nlélém!
BÔT BAPE BA NKAL LE: “Me ga la bé hônba ndééñga.”
-
Mimbe minlôñ mi Bibel u nla gwélél inyu hôla mut nu a nkal we hala?
I SEM KWEP
Yéhôva a ndiihe biliya di mboñ inyu ke ni bisu i gwés nye to di mboma ndééñga. Ni mahôla mé, di nla hônba ndééñga!
Mambadga ma mbigda
-
Inyuki bikristen gwobisôna bi nlama yi le gw’a kôs ndééñga?
-
Ibôdôl nano, lelaa u nla kôôba inyu boma ndééñga?
-
Kii i nkwés we nkaa le u nla ke ni bisu i gwélél Yéhôva to ibale u mboma mandutu?
KÔNDE YÉÑ
Béñge vidéô i ñéba lelaa mañge wanda wada a bi tjél yoñ ngaba i mam ma nkoñ ’isi, ni lelaa Yéhôva bi hôla nye.
Béñge kii i bi hôla babiina bada i ke ni bisu i gwélél Yéhôva tolakii ba bé boma ngolba.
Lelaa di nla unda ñem ngui i ngéda di mboma ndééñga.
Lelaa di nlama tehe ngolba i bôt bés ba lihaa? Kii di nla boñ inyu ke ni bisu i tééda nsañ ni bo?
“Maliga ma nlona bé ‘nsañ, ndik pansoñ’” (Nkum Ntat, Biôôm 2017)
Yak ini i nla lémél we
MAMBADGA BÔT BA MBÉNA BAT
Lelaa Mbôgi Yéhôva i ntégbaha bôt yigil i Bibel?
Mbôgi Yéhôva i nla hôla we i nigil Bibel ibabé i saa; yigil i ntagbe kiki nkwel ipôla bôt iba, u nla ki gwélél to imbe ngobol i Bibel. U kon bañ woñi i naña lihaa joñ jolisôna tole mawanda moñ.
