ISAMBILILO 59
Kuti Mwatwalilila Ukuba Aba Cishinka na Lintu Balemucusha
Inshita shimo Abena Kristu bonse kuti babakaanya nelyo ukubacusha. Lelo bushe ici cilingile ukutusakamika?
1. Mulandu nshi tulingile ukwenekela abantu ukutucusha?
Baibolo itila: “Bonse abafwaisha ukwikala ukulingana na bukapepa muli Kristu Yesu bakabacusha.” (2 Timote 3:12) Yesu balimucushishe pa mulandu wa kuti tali ulubali lwa calo ca kwa Satana. Na ifwe bene tatwaba ulubali lwa cino calo, kanshi te kuti tupape nga ca kuti balatucusha ku mabuteko nelyo ku filonganino fya mapepo.—Yohane 15:18, 19.
2. Finshi tufwile ukucita pali ino nshita pa kuti tukatwalilile ukuba aba cishinka ilyo bakalatucusha?
Ino e nshita tulingile ukulacita ifingalenga twacetekela sana Yehova. Cila bushiku mulekwata inshita ya kupepa kuli Yehova no kubelenga Icebo cakwe. Kabili mulelongana lyonse. Nga mulecita ifi mukaba na maka ya kushipikisha ilyo bakalamucusha, nangu fye ni balupwa balemucusha. Umutumwa Paulo uo balecusha ilingi line atile: “Yehova e kaafwa wandi; nshakatiine.”—AbaHebere 13:6.
Na kabili nga tulebila imbila nsuma lyonse tukaba abashipa. Ukubila imbila nsuma kulalenga twacetekela sana Yehova no kuleka ukutiina abantu. (Amapinda 29:25) Nga mwatwalilila ukuba abashipa pali ino nshita, mukatwalilila ukubila imbila nsuma na lintu ubuteko bukabinda umulimo wesu.—1 Abena Tesalonika 2:2.
3. Busuma nshi bwaba mu kutwalilila ukushipikisha nga baletucusha?
Kwena tatutemwa nga baletucusha, lelo nga twatwalilila ukushipikisha icitetekelo cesu cilakoselako. Yehova alaba sana cibusa wesu pantu alatwafwa ukutwalilila ukushipikisha na lintu twaumfwa ukuti te kuti tutwalilile ukushipikisha. (Belengeni Yakobo 1:2-4.) Yehova tomfwa bwino nga amona tulecula, lelo alatemwa nga amona ifyo tuleshipikisha. Baibolo itila: “Nga mwashipikisha mu macushi pa mulandu wa kucita icisuma, ninshi Lesa akamupaalilapo.” (1 Petro 2:20) Yehova akapeela bonse abakatwalilila ukuba aba cishinka kuli ena umweo wa muyayaya mu calo cipya umushakabe aba kubakaanya ilyo bakalamupepa.—Mateo 24:13.
SAMBILILENI NA FIMBI
Sambilileni pa cingalenga mwashininkisha ukutila kuti mwatwalilila ukuba aba cishinka kuli Yehova na lintu balemucusha, kabili moneni ne fyo Yehova akamupaala nga mwatwalilila ukuba aba cishinka.
4. Kuti mwashipikisha ilyo balupwa balemukaanya
Yesu alishibe ukuti balupwa lwesu nalimo te kuti batemwe ilyo twasalapo ukubombela Yehova. Belengeni Mateo 10:34-36, lyena lanshanyeni ici cipusho:
-
Umuntu nga asalapo ukubombela Yehova, finshi nalimo balupwa lwakwe bengalanda nelyo ukucita?
Pa kuti mumone fimo ifyo bengalanda nelyo ukucita, tambeni VIDIO, lyena lanshanyeni icipusho cakonkapo.
-
Kuti mwacita shani nga ca kuti lupwa nelyo cibusa wenu alelanda nelyo alecita fimo pa kuti mwitwalilila ukubombela Yehova?
Belengeni Amalumbo 27:10 na Marko 10:29, 30. Pa numa ya kubelenga ilembo limo na limo, lanshanyeni ici cipusho:
-
Bushe ifyaba pali ili ilembo kuti fyamwafwa shani ukushipikisha ilyo balupwa ne fibusa balemucusha?
5. Mwikaleka ukubombela Yehova na lintu balemucusha
Tulingile ukuba abashipa ilyo tulebombela Yehova nga ca kuti kuli abaletukaanya. Tambeni VIDIO, lyena lanshanyeni icipusho cakonkapo.
-
Bushe ifyo twatamba muli vidio fyamukoselesha shani?
Belengeni Imilimo 5:27-29 na AbaHebere 10:24, 25. Pa numa ya kubelenga ilembo limo na limo, lanshanyeni ici cipusho:
-
Mulandu nshi cacindamina ukutwalilila ukulapepa Yehova na lintu babinda umulimo wesu uwa kubila imbila nsuma no kulongana?
6. Yehova akamwafwa ukushipikisha
Inte sha kwa Yehova aba mishinku ne nkulilo ishalekanalekana balitwalilile ukuba aba cishinka na lintu balebacusha. Pa kuti mumone ifyabafwile, tambeni VIDIO. Lyena lanshanyeni icipusho cakonkapo.
-
Finshi fya-afwile ba Nte twatamba muli vidio ukushipikisha?
Belengeni Abena Roma 8:35, 37-39 na Abena Filipi 4:13. Pa numa ya kubelenga ilembo limo na limo, lanshanyeni ici cipusho:
-
Bushe ifili pali ili ilembo fyalenga shani mwashininkisha ukutila kuti mwashipikisha ubwesho ubuli bonse?
Belengeni Mateo 5:10-12, lyena lanshanyeni ici cipusho:
-
Cinshi mwingabela ne nsansa na lintu balemucusha?
Inte sha kwa Yehova abengi nga nshi balitwalilila ukubombela Yehova ne cishinka, nangu ca kuti balabacusha. Na imwe bene kuti mwatwalilila ukubombela Yehova ne cishinka nangu ca kuti balemucusha!
ABANTU BAMO BATILA: “Te kuti nshipikishe nga balencusha.”
-
Malembo nshi mwingabapeela pa kuti bamone ukutila kuti bashipikisha?
IFYO MUSAMBILILE
Yehova alatemwa nga twatwalilila ukumubombela na lintu baletucusha. Nga atwafwa kuti twashipikisha!
Ukupitulukamo
-
Mulandu nshi Abena Kristu balingile ukwenekela ukuti abantu kuti babacusha?
-
Finshi mulingile ukucita pali ino nshita ifingamwafwa ukwisashipikisha nga batendeka ukumucusha?
-
Finshi fingalenga mwashininkisha ukutila kuti mwatwalilila ukubombela Yehova na lintu mule-eshiwa?
ISHIBILENIPO NA FIMBI
Umfweni ifyo munyinefwe wacaice alondolwele ifyo Yehova amwafwile ukushipikisha ilyo bamukakile pa mulandu wa kukanaitumpa mu fya calo.
Moneni ifyalengele abaupana ukutwalilila ukubombela Yehova ne cishinka pa myaka iingi nangu ca kuti balebacusha.
Ifyo Tutwalilila ukubombela Yehova na Lintu Ifintu Fya-aluka (7:11)
Belengeni pa kuti mumone ifyo mwingaba abashipa ilyo balemucusha.
“Ifyo Mwingacita pa Kuti Mukashipikishe Ilyo Bakalamucusha” (Ulupungu lwa kwa Kalinda, July 2019)
Finshi tufwile ukwishiba nga ca kuti balupwa baletukaanya, kabili kuti twacita shani pa kuti tutwalilile ukumfwana nabo pa nshita imo ine no kutwalilila ukuba aba cishinka kuli Yehova?
“Ukwishiba Icine Takuleta ‘Umutende, Kano Ulupanga’” (Ulupungu lwa kwa Kalinda, October 2017)
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
