CƐ̃́Ɛ́-ÐƐ̀ 59
M̀ Ɓɛ́ìn Nyɔ-Gà-Dyéìn-Dyéìn Hwòɖò Kùɛ̀n
Nyɔ ɓè mu Kɛ́ɖɛ́ì ɖeín-sí-nyɔ̀ séín ɓè gbo vɔ̃ùn mɔɔ wa gà dyéìn. Ɔ se kpá kàùn ní, ɔ mu kpáùn ɖé dyúa. Kɛɛ, ɔ jè mɛ po à fã̀ùnǹ?
1. Xwíníínɔ̀ nyɛ́ kɔ̃̀ jè à dèà nyɔ-gà-dyéìn-dyéìn jè hwìɖìiɛ́?
Baɓoɔ cɛ̃ɛ wáɖáá, ké ɔ ɖá: “Nyɔùn séín ɓè ɓɛ́ wa kè Kɛ́ɖɛ́ì mɔ̀à nyɔ dyúáɖò, ké wa mɔ́ ɓɛ́ wa kéà cĩ́ ɓó Geɖepɔɔ bììɛɛ, wa mu wa gà dyéìn wɛ̃́ɛ́.” (2 Tímétè 3:12) Wa dyéìn ma Jízɛ̀ gà, sepoɛɖe ɔ se ma ɓóɖó-kpà ɓɛ́ Sétɔ̃̀ kɔ̃̀à wuɖuíɛɛ nyɔ. À mɔ̀ùn se ɓóɖó-kpàà nyɔ ɓè ɖekè. Ɔ jèɛɛ, ɔ ní giniìn à dyi ɔ jù ké ɓóɖó-kpàà gɔ̀mànà ɓè kè ɓiè-kpòò ɓè dyi à gà dyéìn ní.—Jɔ̃́ɔ́ 15:18, 19.
2. Xwɛ̀ à ɓɛ́ìn ti dyéɛ ɓó nyɔ gà dyéìn jè kɛ́?
À kɔ̃̀ à ké Jɛhova hwòɖò kɔ̃ dè cá kàùn. Po ti wáká wé séín ɓɛ́ m̀ ké ɔ ɓaà, kè ɓɛ́ m̀ ké ɔ Wuɖuɔ̀ wáká ɖò wuɖuún zà. Mu dyí-poìn-poìn ɓèɔ̀ mú ti séín. Nyuu-ɖɛ̀ ɓè nìà kɛ mu m̀ dyi kùìn ɓɛ́ m̀ ké gà-dyé-dyé séín ɖò mú zĩ̀ìn hwòɖò-ku-kà kɛbì ɔ mɛ sɔ̀ìn ɖé nì gbo-xwíníín-nyɔ̀ ɓè gboɛ. Àpɔ́sò Pɔ́ɔ̀ ɓɛ́ wa dyéìn ma gà kpɛ́-kpɛ́ kɛ cɛ̃ɛ ma, ké ɔ ɖá: “[Jɛhova] mɔ̀ ní gbo-kpá-nyɔ̀. Ḿ se fã̀à ɖò peɖeɛ́ mu.”—Híìbúɖúù 13:6.
À ɓɛ́ìn fã̀à wɔ̃ ziɛ ɖekè dyììn ɖé Geɖepɔɔ-wùɖù wáɖá-wáɖá mú ti séín. Geɖepɔɔ-wùɖù wáɖá-wáɖá kpá à gbo ɓɛ́ à ké Jɛhova hwòɖò kɔ̃ dè, kè ɓɛ́ à ké nyɔùn-dyù fã̀à mú peɖe-peɖe séín ɖò wɔ̃ zi. (Nɔ́ɔ́ 29:25) Ɔ jù ké à se fã̀à peɖe ɓó Geɖepɔɔ-wùɖùɔ̀ wáɖá jè kàùn ní, à mu páún nì ɓɛ́ à ké Geɖepɔɔ-wùɖùɔ̀ wáɖá tee kɛbì gɔ̀mànà mɛ po à kũ̀àɔ̀ ɓɔ́íɛ.—1 Tɛ̀sàɖónìà 2:2.
3. Xwɛ̀ nyɔ-gà-dyéìn-dyéìn hwòɖò-kùìn-kùìn nyu à kpáná dyíɛ́?
Ɔ mɔ̀ jàà nyɔ ní kpáìn nyɔ-gà-dyéìn-dyéìn múàùn dyi dyɛo, kɛɛ à dyi nyɔ-gà-dyéìn-dyéìn hwòɖò kùìn nɔ̀mɔ̀ dyíin ní, ɔ kùìn à hwìɖìì-taɓa-taɓaɔ̀ dyi. À xwɛ̃́ìn Jɛhova bũ̀in, sepoɛɖe ɔ kpá à gbo ti ɓè kɔ̃̀ ɓaɖa ɓɛ́ à hwòɖò ɖá à se kpé ɓɛ́ìn ɖeɛ. (Zà Jĩ́ìn 1:2-4 wuɖuún.) Ɔ puà Jɛhova ɓɛ́ ɔ ké à gà dyéɛ dyé, kɛɛ ɔ dè ɔ hwòɖò dyi ɓɛ́ ɔ ké à hwòɖò kuɛ dyé. Baɓoɔ ɖá: “Ɔ jù ké ɓè dyi ɖɛ nɔ̀mɔ̀ dyíin ɖò nyu, hwɛ̀ ké wa dyi ɓè gà dyéìn ɓó ɔ jè, ké ɓè dyi ɔ hwòɖòi kùìn ní, nìí, ɔ mɔ̀ ɖɛ nɔ̀mɔ̀ dyíin ɖé Geɖepɔɔ gbo.” (1 Píɖɛ̀ 2:20) Pɛ́ɛ̀-ɖɛ̀ ɓɛ́ Jɛhova mu nyɔ séín ɓè ɓɛ́ wa ku hwòɖò kɛ nyíìn nyɛɛ mɔ̀ sè-ná-sèɛ̀ fɛ̀ɛ̀ ɖé ɓóɖó kɔ̃̀ kɔ̃ ɓɛ́ jàà ɓiè-ɓiè gbo-vɔ̃-vɔ̃ ɖò seà nìɛ̀ mu ɖéɛɛ kɔ̃.—Máfíò 24:13.
ÐE ÐƐ MÚIN CÁ
Cɛ̃́ xwíníín kɔ̃̀ jè à ɓɛ́àìn Jɛhova jè gboi kpɔ̃ɔ kóɖó-kóɖó kɛbì wa mɛ dyéìn à gà kɛɛ jè.
4. M̀ ɓɛ́ìn nyɔ-gbo-vɔ̃-vɔ̃ sɔ̀ìn ɖé xwéɖé-dùɔ̀ múɛɛ hwòɖò kùɛ̀n
Jízɛ̀ dyuòɛ̀ ma dyí wáɖáá kà à gbo-xwíníín-nyɔ̀ ɖíɛ́ ɓè seɛ gbo wɔ̃́ìn mu ɓɛ́ à ké Jɛhova ɓiè kɛ. Zà Máfíò 10:34-36 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Ðɛ́ ɓɛ́ìn kpáa ɔ jù ké nyɔ ɖò dyiɛ gbɔ po ɖé xwéɖé-dù ɖò mú ɓɛ́ ɔ ké Jɛhova ɓiè níɛ́?
Ɓɛ́ m̀ ké ɖɛ nìà kɛ hwɔìn-ɖɛ̀ ɖò dyé ní, po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Ðɛ́ nì mu nyuùn ɔ jù ké nì gbo-xwíníín-nyɔ̀ ɖò mɔɔ nì ɓàto ɖò dyi vɔ̃ ɓɛ́ ɔ ké m̀ kpéí hwɔ ɓɛ́ m̀ ké se Jɛhova ɓiè níɛ́?
Zà Wɛ́ɖɛ́ 27:10 kè Máà 10:29, 30 wuɖuún. M̀ ɖà vɔ̀sì ɖò-ɖò ɓèɔ̀ wuɖuún zàà hwɔ ní, ɓè dèìn dyi-diè-ɖɛ̀ nìà kɛ dɔ́ɔ́ kɔ̃in:
-
Xwɛ̀ nyɛ́nɛ́ín-ɖáìn-ɖɛ̀ nìà kɛ ɓɛ́ìn m̀ gbo kpáa ɔ jù ké m̀ dyi gbo-vɔ̃-vɔ̃ dyí dyé sɔ̀ìn ɖé nì gbo-xwíníín-nyɔ̀ ɖò mɔɔ nì ɓàto ɖò xwaún níɛ́?
5. Ɓiè Jɛhova tee kɛbì wa mɛ dyéìn m̀ gà kɛ
Ɔ ɖú hwòɖò-ku-ku dyí ɓɛ́ à ké Jɛhova ɓiè ɔ jù ké nyɔ tɔ̀ɔ̀ ɓè dyi vɔ̃uń nì ɓɛ́ wa ké à ɓɔ́í po ɓó ɔ náa nyu jè ní. Po VÍÐÒƆ̀ kũ̀à gbo, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
• Xwɛ̀ dyí-tɛ̀mɛ̀ìn-ɖɛ̀ ɓè nìà víɖò nìà kɛ múɛɛ nyu m̀ dyi kùɛ̀n nyɛ́?
Zà Àpɔ́sò 5:27-29 kè Híìbúɖúù 10:24, 25 wuɖuún. M̀ ɖà vɔ̀sì ɖò-ɖò ɓèɔ̀ wuɖuún zàà hwɔ ní, ɓè dèìn dyi-diè-ɖɛ̀ nìà kɛ ɖɔ́ɔ́ kɔ̃in:
-
Xwíníínɔ̀ nyɛ́ kɔ̃̀ jè ɔ kpaà ɖɛ ɓɛ́ à kéà Jɛhova ɓiè tee kɛbì wa mɛ po à Geɖepɔɔ-wùɖù-wáɖá-kũ̀àɔ̀ mɔɔ dyí-poìn-poìn ɓèɔ̀ ɓɔ́íɛ́?
6. Jɛhova mu m̀ gbo kpáùn ɓɛ́ m̀ ké hwòɖò ku
Jɛhova Zàse ɓè ɓɛ́ wa mɔ̀ zɔ̃ kò-kò ɓè ké wa sɔ̀ìn nyɔ-dù kò-kò ɓè hwìɛ̀ kɛɛ ɖà Jɛhova jè gboi kpɔ̃ tee kɛbì wa mɛ dyéìn ma wa gà kɛ. Ɓɛ́ m̀ ké ɖɛ kpá ma wa gbo kɛɛ dyé ní, po VÍÐÒƆ̀ kũ̀à gbo. Nìí, ɓɛ́ ɓè ké dyi-diè-ɖɛ̀ kɔà ɓó dyíɛɛ dɔ́ɔ́ kɔ̃in dèìn.
-
Ðé víɖòɔ̀ múɛɛ, ɖɛ́ kpá ma Jɛhova Zàse ɓèa gbo ɓɛ́ wa ké ma hwòɖò ku kɛ́?
Zà Wóɖómà 8:35, 37-39 kè Fèɖópĩ̀ɔ̀ 4:13 wuɖuún. M̀ ɖà vɔ̀sì ɖò-ɖò ɓèɔ̀ wuɖuún zàà hwɔ ní, ɓè dèìn dyi-diè-ɖɛ̀ nìà kɛ dɔ́ɔ́ kɔ̃in:
-
Xwɛ̀ vɔ̀sì ɓè nìà kɛ nyuɛ m̀ dyí tɛ̀mɛ̀ìn kà m̀ ɓɛ́ìn fũ̀à-fṹá séín ɖò hwòɖò kùɛ̀n nyɛ́?
Zà Máfíò 5:10-12 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:
-
Xwíníínɔ̀ nyɛ́ kɔ̃̀ jè m̀ ɓɛ́àìn múàùn kpáa kɛbì wa mɛ dyéìn m̀ gà kɛ́?
Jɛhovaa ɓiè-nyɔ̀ méɔ̀ùn ɓè ɖà nyɔ-gbo-vɔ̃-vɔ̃ mú zĩ̀ìn. M̀ ɓɛ́ìn nyuɛ ɖekè!
NYƆ ÐÍƐ́ ƁÈ ÐÁ: “Ḿ se nyɔ-gà-dyéìn-dyéìn hwòɖò kùɛ̀n ɓɛ́ìn.”
-
Baɓo vɔ̀sìɔ̀ ɓèɔ̀ nyɛ́ ɓɛ́ìn wa kpéí poɛ kɛ́?
SṸÌN-XWÍNÍÍN
Jɛhova kpáìn à dúún-ku-ku ɓó ɔ ɓiè jè ɖé nyɔ-gà-dyéìn-dyéìn xwaún wɛ̃ɛ múàùn dyi. Dyììn ɖé ɔ kpé múɛɛ, à ɓɛ́ìn hwòɖò kuɛ!
Ðɛ-kɔ̃in-kpa-kpa
-
Xwíníínɔ̀ nyɛ́ kɔ̃́ jè Kɛ́ɖɛ́ì ɖeín-sí-nyɔ̀ ɓè mɛ dèà nyɔ-gà-dyéìn-dyéìn jè hwìɖìiɛ́?
-
Ðɛ́ m̀ ɓɛ́ìn nyuɛ kàùn ɓɛ́ m̀ ké ti dyé ɔ jù ké nyɔ ɓè dyi m̀ gà dyéìn níɛ́?
-
Ðɛ́ ɓɛ́ìn m̀ gbo kpáa ɓɛ́ m̀ kéɛ dyí dyuò jɛ́ɛ́ kà m̀ ɓɛ́ìn Jɛhova ɓièɛ̀ ɖé fũ̀à-fṹá séín ɖò xwaún wɛ̃́?
CƐ̃́ ÐƐ PÀÐÀ
Dyé víɖò ɖò kɔ̃̀ mú ɓɛ́ ɖíí-gàà ɖò zaìn kà Jɛhova nyu ma ɔ gbo kpáa ɓɛ́ ɔ ké ma hwòɖò ku ti wa po ma ɔ kpɔɖɔ ɖeín, sepoɛɖe ɔ se ma gɔ̀mànà jè sɔ̃ún po jèɛɛ dyi.
Cɛ̃́ ɖɛ kpá ma dyi-kpɔ̃ìn-nyɔ̀ ɓè ɖò gbo ɓɛ́ wa ké ma Jɛhova ɓiè jàà-kà ɓó zɔ̃ pàɖà xwíníín ɖé nyɔ-gbo-vɔ̃-vɔ̃ xwaún wɛ̃.
Cɛ̃́ kà m̀ ké fã̀à wɔ̃ ziɛ nyu ɔ jù ké wa dyi m̀ gà dyéìn níɛ.
“Dyé Ti Kàùn Ɓó Nyɔ Gà Dyéìn Jè” (Dyí-Gmɔ̀ìn-Gbò-Cèè-Ðɛ̀ɔ̀, Káná-Dyù-Wè 2019)
Xwɛ̀ à mɛ nyu gbo-vɔ̃-vɔ̃ sɔ̀ìn ɖé xwéɖé-dùɔ̀ múɛ dya gmɔ̀ɔ̀ kɛ́, ké xwɛ̀ à ɓɛ́ìn fũ̀à-fṹá ɓè sɔ̀ìn ɖé ɔ múɛɛ kpɔ̃ɔ nyuɛ nɔ̀mɔ̀ dyíin nyɛ́?
“Jààɔ̀ Se ‘Gìɖìì Dyà, Kɛɛ Ɔ Dyà Gàsíà’” (Dyí-Gmɔ̀ìn-Gbò-Cèè-Ðɛ̀ɔ̀, Kpadyua 2017)
