NLÔ AJÔ 59

Ô ne dañ étibila’a

Vô’ôlô nkobô

Ô ne dañ étibila’a

Bi bete bi sisi, Kristen ése ja ye tôbane mewosan, nge ke étibila’a. Nde, ye bia yiane koo woñ?

1. Amu jé bia yeme na bii tôbane étibila’a?

Kalate Zambe a kôme jô na: “Bôte bese ba kômbô tabe aval ntabane ya be Zambe be Krist Yésus ba ye jibi ékpwe’ele.” (2 Timothée 3:12) Yésus a nga tôban étibila’a amu a nga bene nyoñ ngap mame ya émo Satan. Bia fe bi nji bo bôte ya si nyô, ajô te bia kam ki éyoñe bijôé a miñyebe bia tibili bia.—Jean 15:18, 19.

2. Aval avé bi ne kômesan asu étibila’a?

Dene nnye bia yiane jeñe na bi yemete élate jangan a Yéhôva. Nyoñe’ éyoñe ya ye’elane nye môs ôse a lañe mejô mé. Tabe’e bisulan mban. Mam mete ma ye wônô mbunane wôé a ve wo ngule ya tebe ne bip éyoñe ya étibila’a; to’o ja so nda bôte jôé. Nlômane Paul fe ô nga tôban étibila’a, ô nga tili na: “[Yéhôva] a ne mvolô wom; ma ye ke ko woñ.”—Behébreu 13:6

Bi ne fe bi ngule nyul éyoñ bia bo ésaé nkañete éyoñ ése. Ésaé nkañete ja ye’ele bia mfi ya tabe ndi a Yéhôva, ja volô fe bia na bi bo te koo môta binam woñ. (Minkana 29:25) Nge ô bili ayo’o nleme ya kañete éyoñe ji, wo ye fe bo nkômesane ya ke ôsu a kañete to’o éyoñ bijôé bii tyili ésaé jangan.—1 Bethessalonicien 2:2.

3. Mfi ôvé bia bi éyoñ bia jibi étibila’a?

E ne été na, bi vo’o wô’ô mvaé éyoñ bia tôban étibila’a, ve éyoñ bia jibi je, mbunane wongan wo tu’a yem. Bia tu’a kabetane Yéhôva amu bia yeme na é volô bia éyoñ ngule jangan ja ye bo tyôtyoé. (Lañe’e Jacques 1:2-4.) Nlem wo taé Yéhôva éyoñ bia tôbane minjuk, ve a ne mevak éyoñ a yene bi kele’ ôsu a jibi. Kalate Zambe a jô na: “Éyoñ mia bo mvaé; a mia wô’ô mintaé amu je, nge mia ye jibi [mintaé], jam ete nde e ne mvaé be Zambe.” (1 Pierre 2:20) Ma’ane Yéhôva a ka’ale bôte bese ba ke ôsu a jibi étibila’a me ne ényiñe ya melu mese mfefé si, teke fe môt nge jôm ja wosane nya ékaña’a.—Matthieu 24:13.

TUKA’A FAK

Yene’ avale bi ne ke ôsu a kabetane Yéhôva akusa bo étibila’a, a aval avé a ye botane bia.

4. Ô ne jibi mewosane ma so nda bôte jôé

Yésus a mbe a kôme yeme na menda me bôte mangan me ne bo teke kômbô su’u ntyi’an bi nga nyoñe na bia kañe Yéhôva. Lañe’e Matthieu 10:34-36, mvuse ya valé, yala’ane nsili wu:

Jé nda bôt é ne bo nge môt éziñ ya été a tyi’i na a kañe Yéhôva?

Asu na ô yen éve’an, futi’i VIDÉO, mvuse ya valé, yala’ane nsili wo tôé valé.

VIDEO: Yéhôva a nga dutu bia (5:13)

Jé ô ne bo nge môte ya nda bôte jôé nge ke mvôé jôé ja kômbô kamane wo na ô kañe Yéhôva?

Lañe’e Besam 27:10 a Marc 10:29, 30. Éyoñ ô lañeya éfuse jia, ô yalane nsili wu:

Aval avé ngaka’a nyi é ne volô wo nge wo tôban étibila’a é so’o nda bôte jôé été nge ke bemvôé bôé?

5. Kele’ ôsu a kañe Yéhôva akusa bo étibila’a

Va’a ngule ya ke ôsu a kañe Yéhôva éyoñ bôt bevo’o ba jeñe na be te’e wo. Futi’i VIDÉO, mvuse ya valé, yala’ane nsili wo tôé valé.

VIDÉO: Yeme’e ngul éyoñe ya étibila’a (6:27)

Aval avé bobejañ a besita ya vidéo ba ve wo ngule nyul?

Lañe’e Mame minlôman 5:27-29 a Behébreu 10:24, 25. Éyoñ ô lañeya éfuse jia, ô yalane nsili wu:

Amu jé e ne mfi na bi ke ôsu a kañe Yéhôva to’o bijôé bia tyili ésaé nkañete jangan nge ke bisulan?

6. Yéhôva a ye volô wo na ô ke ôsu a jibi

Bengaa be Yéhôva ya si se, bisoé a benya bôtô, ba ke ôsu a kabetane Yéhôva to’o éyoñ ba tibili be. Asu na ô yeme mam me nga volô be, futi’i VIDÉO. Mvuse ya valé, yala’ane nsili wu: