TJONÏK 59
Rït yakowin naköchʼ ri kʼayewal yeyaʼöx pan awiʼ
Jontir röj, ri cristianos, yeyaʼöx kʼayewal pa qawiʼ. ¿Kʼo komä rma nqaxiʼij qiʼ chwäch riʼ?
1. ¿Achkë rma kan qataman chik chë xkeyaʼöx kʼayewal pa qawiʼ?
Le Biblia nuʼij chë «jontir ri nkajoʼ nkikʼwaj jun chöj kʼaslemal chwäch Dios, rkʼë Cristo Jesús, xtyaʼöx chqä kʼayewal pa kiwiʼ» (2 Timoteo 3:12). Ri winäq kan itzel xkinaʼ che rä Jesús rma ryä ma xyüj ta riʼ kikʼë. Y, rma röj chqä ma nqaʼän ta riʼ, ri qʼatöy taq tzij chqä ri religiones nkiyaʼ kʼayewal pa qawiʼ (Juan 15:18, 19).
2. ¿Achkë ütz nqaʼän rchë xtqkowin xkeqaköchʼ ri kʼayewal xkeyaʼöx pa qawiʼ?
Röj nkʼatzin nqakowirsaj ri qakʼuqbʼäl kʼuʼx chrij Jehová komä. ¿Achkë rubʼanik nqaʼän riʼ? Nqaʼän riʼ taq nqajäm qawäch rchë nqchʼö rkʼë, nqaskʼij ruwäch Ruchʼaʼäl chqä ronojel mul nqjeʼ chkipan ri qamoloj. Jontir reʼ xtyaʼ awchqʼaʼ rchë kuw xkapaʼeʼ chwäch xa bʼa achkë kʼayewal xtyaʼöx pan awiʼ, yajün taq kan yë ri a-familia xkebʼanö riʼ. Ri apóstol Pablo, ri chaq taqïl xerïl kʼayewal, xuʼij: «Jehová ya riʼ ri ntoʼö wchë. Ma xtinxiʼij ta wiʼ» (Hebreos 13:6).
Jun chik ri xtqtoʼö, ya riʼ chaq taqïl nqatzjoj le Biblia. Ri nqatzjoj Ruchʼaʼäl Dios nqrtoʼ rchë nqakʼuqbʼaʼ qakʼuʼx chrij Jehová chqä rchë ma nqaxiʼij ta qiʼ chkiwäch ri winäq (Proverbios 29:25). We rït ma naxiʼij ta awiʼ natzjoj le Biblia komä, kan ke riʼ chqä xtaʼän chqawäch apü, yajün taq ri qʼatbʼäl taq tzij xtkajoʼ xtkiqʼät qasamaj (1 Tesalonicenses 2:2).
3. ¿Kʼo utzil nqïl taq yeqaköchʼ ri kʼayewal yeyaʼöx pa qawiʼ?
Röj ma nqä ta chqawäch yeyaʼöx kʼayewal pa qawiʼ. Ye kʼa taq yeqaköchʼ ri kʼayewal riʼ, ri qakʼuqbʼäl kʼuʼx más nkowïr. Chqä, más junan nuʼän qawäch rkʼë Jehová, rma nqatzʼët achkë rubʼanik nqrtoʼ pä taq nqanaʼ chë ma xtqkowin ta xtqqʼax chkiwäch ri kʼayewal (taskʼij ruwäch Santiago 1:2-4). Jehová kan poqän nunaʼ ran taq nutzʼët chë röj nqatäj poqän, ye kʼa kan kiʼ rukʼuʼx nuʼän taq nutzʼët chë nqapabʼaʼ qiʼ chkiwäch ri kʼayewal. Le Biblia nuʼij: «We niköchʼ ri kʼayewal yeyaʼöx pan iwiʼ xa rma niwajoʼ niʼän ri ütz, ya riʼ kan jaʼäl nutzʼët Dios» (1 Pedro 2:20). Chkë jontir ri yekochʼon chqä ma nkiyaʼ ta qa Jehová, ryä xtyaʼ kikʼaslemal chwäch ri kʼakʼakʼ Ruwachʼulew, ri akuchï majun ta chik jun winäq itzel ta xtnaʼ che rä rutinamit Dios (Mateo 24:13).
TQATAMAJ MÁS CHRIJ RE NAʼOJ REʼ
Tqatzʼetaʼ jojun naʼoj ri nkikʼüt chqawäch chë nqkowin majun bʼëy nqayaʼ ta qa Jehová tapeʼ yeyaʼöx kʼayewal pa qawiʼ. Chqä, tqatzʼetaʼ achkë utzil xtyaʼ ryä pa qawiʼ we xtqaʼän riʼ.
4. Rït yakowin naköchʼ ri kʼayewal yeyaʼöx pan awiʼ rma a-familia
Jesús kan chöj xuʼij chë jojun chkë ri qa-familiares ma xtkajoʼ ta chë röj nqayaʼ ruqʼij Jehová. Tiskʼij ruwäch Mateo 10:34-36 y kixtzjon chrij reʼ:
-
Taq jun winäq nrajoʼ nuyaʼ ruqʼij Jehová, ¿achkë komä kinaʼoj xtkiʼän ru-familia rkʼë?
Rchë nitamaj kiwäch jojun winäq ri xkiqʼaxaj ri kʼayewal riʼ, titzʼetaʼ ri VIDEO. Chrij riʼ kixtzjon chrij reʼ:
-
¿Achkë xtaʼän rït we jun awachʼalal o jun awachiʼil kan xttäj ruqʼij chawij rchë nayaʼ qa Jehová?
Tiskʼij ruwäch Salmo 27:10 chqä Marcos 10:29, 30. Taq nikʼïs ruskʼixik jun texto, kixtzjon chrij reʼ:
-
¿Achkë rubʼanik yaturtoʼ re texto reʼ rchë naköchʼ ri kʼayewal nkiyaʼ ri awachʼalal o ri awachiʼil pan awiʼ?
5. Ma tayaʼ ta qʼij chë ri kʼayewal yatkiqʼät rchë nayaʼ ruqʼij Jehová
Kʼo chë ma nqaxiʼij ta qiʼ nqayaʼ ruqʼij Jehová tapeʼ ri nkʼaj chik nkajoʼ yojkiqʼät chë nqaʼän riʼ. Titzʼetaʼ ri VIDEO y kixtzjon chrij reʼ:
-
¿Achkë xatzʼët rït chpan ri video ri xkaturtoʼ rchë ma xtaxiʼij ta awiʼ chkiwäch ri kʼayewal?
Tiskʼij ruwäch Hechos 5:27-29 chqä Hebreos 10:24, 25. Taq nikʼïs ruskʼixik jun texto, kixtzjon chrij reʼ:
-
Taq ri qʼatbʼäl taq tzij ma nkiyaʼ ta qʼij chqë nqatzjoj le Biblia o nqjeʼ pa qamoloj, ¿achkë rma kan janina nkʼatzin ma nqayaʼ ta qa ruyaʼik ruqʼij Jehová?
6. Jehová xkaturtoʼ pä rchë xtaköchʼ ri kʼayewal
Ye kʼïy testigos de Jehová ri jalajöj kijunaʼ chqä kitinamit ma kiyaʼon ta qa Jehová tapeʼ yaʼon kʼayewal pa kiwiʼ. Rchë nitamaj achkë rubʼanik kibʼanon riʼ, titzʼetaʼ ri VIDEO. Chrij riʼ kixtzjon chrij reʼ:
-
¿Achkë xtoʼö kichë re Testigos reʼ rchë xkiköchʼ ri kʼayewal xeyaʼöx pa kiwiʼ?
Tiskʼij ruwäch Romanos 8:35 chqä 37-39, y Filipenses 4:13. Taq nikʼïs ruskʼixik jun texto, kixtzjon chrij reʼ:
-
¿Achkë rubʼanik yaturtoʼ re texto reʼ rchë natzʼët chë rït yakowin naköchʼ xa bʼa achkë kʼayewal xtyaʼöx pan awiʼ?
Tiskʼij ruwäch Mateo 5:10-12 y kixtzjon chrij reʼ:
-
¿Achkë rma nqaʼij chë yakowin kiʼ akʼuʼx naʼän tapeʼ yeyaʼöx kʼayewal pan awiʼ?
Kan pa millón chkë rusamajelaʼ Jehová kikochʼon ri kʼayewal yeyaʼon pa kiwiʼ. ¡Rït chqä yakowin napabʼaʼ awiʼ chkiwäch ri kʼayewal riʼ!
JOJUN WINÄQ NKIʼIJ REʼ: «Ma xkikowin ta xtinköchʼ ri kʼayewal xkeyaʼöx pa qawiʼ chqawäch apü».
-
¿Achkë textos naʼij rït chë xkerutoʼ ri winäq ri ke riʼ nkiquʼ?
RI XQATAMAJ QA
Jehová kan nuloqʼoqʼej chë nqatäj qaqʼij rchë nqayaʼ ruqʼij tapeʼ kʼo kʼayewal yeyaʼöx pa qawiʼ. ¡Rkʼë rutoʼik ryä xtqkowin xtqqʼax chwäch xa bʼa achkë kʼayewal!
Tqakamluj ri xqatzʼët qa
-
¿Achkë rma kan qataman chik chë xkeyaʼöx kʼayewal pa qawiʼ?
-
¿Achkë ütz naʼän rït komä rchë xkakowin xtaköchʼ ri kʼayewal xkeyaʼöx pa qawiʼ?
-
Tapeʼ xa bʼa achkë na xtbʼanatäj chpan akʼaslemal, ¿achkë rma kan akʼuqbʼan akʼuʼx chë xkakowin majun bʼëy xtayaʼ ta qa Jehová?
RCHË NATAMAJ MÁS
Tatzʼetaʼ achkë rubʼanik Jehová xtoʼ jun qachʼalal ri xyaʼöx pacheʼ rma ma xrajoʼ ta xok soldado.
Tatamaj achkë xetoʼö jun kʼlaj winäq rchë ma xkiyaʼ ta qa Jehová tapeʼ kan kʼïy junaʼ xeyaʼöx kʼayewal pa kiwiʼ.
Nqayaʼ ruqʼij Jehová tapeʼ kʼo yejalatäj pa qakʼaslemal (7:14)
Tatamaj achkë ütz naʼän rchë xtaköchʼ ri kʼayewal xkeyaʼöx pa qawiʼ chqawäch apü.
«Tqatjoj apü qiʼ rchë kuw xtqpaʼeʼ taq xkeyaʼöx kʼayewal chqij» (Ri Chajinel, julio 2019)
¿Achkë rubʼanik kʼo chë yeqatzʼët ri kʼayewal yeyaʼöx pa qawiʼ rma ri qa-familia? ¿Y achkë ütz nqaʼän rchë ma njeʼ ta chʼaʼoj chqawäch chqä rchë ma nqayaʼ ta qa Jehová?
«¿Achkë rma ri kantzij nuʼän chë njeʼ chʼaʼoj chqakojöl?» (Ri Chajinel, octubre 2017)
Rkʼë jbʼaʼ nawajoʼ natzʼët chqä reʼ
RI KʼUTUNÏK RI NBʼAN CHKIJ RI TESTIGOS DE JEHOVÁ
¿Achkë rubʼanik yekitjoj ri winäq chrij le Biblia ri testigos de Jehová?
Rkʼë ri tjonïk nkiyaʼ ri testigos de Jehová, rït ütz naksaj xa bʼa achkë Biblia nawajoʼ. Chqä ütz naʼän invitar jontir a-familia o xa bʼa achkë awachiʼil.
